މިއަހަރު އޮގަސްޓުމަހު އަފްއާނިސްތާން ތާލިބާން ޖަމާއަތުގެ ބާރުގެ ދަށަށް ދިއުމާއެކު، އެގައުމު ދޫކުރައްވާ ވަޑައިގަންނަވަން ނިންމެވި ނިންމެވުން ކުރީގެ ރައީސް އަޝްރަފް ޢަނީ އަނެއްކާވެސް ދިފާއު ކުރައްވައިފިއެވެ. އޭނާ ވިދާޅުވި ގޮތުގައި، ކުރިންވެސް ވިދާޅުވެފައިވާ ފަދައިން، އޭނާ އަފްއާނިސްތާނުގައި ހުންނެވިނަމަ އަފްއާނިސްތާނުގެ ވެރިރަށް ކާބުން ސުންނާފަތިވެގެން ދިޔައީސް ކަމުގައެވެ.

ތާލިބާން ޖަމާއަތުން އަފްއާނިސްތާނުގެ ވެރިކަމަށް އައިސްފައިވަނީ، ފާއިތުވެދިޔަ އޮކްޓޯބަރުމަހުގެ 15ވަނަ ދުވަހު އެގައުމުގެ ވެރިރަށް ކާބުލް އެ ޖަމާއަތުގެ ބާރުގެދަށަށް ގެނައުމަށްފަހުއެވެ.

ބީބީސީގެ ރޭޑިއޯ4 ގައި ވާހަކަ ދައްކަވަމުން ޢަނީ ވިދާޅުވި ގޮތުގައި، މިއަހަރުގެ އޮގަސްޓުމަހުގެ 15ވަނަ ދުވަހު ހެނދުނު އޭނާ ހޭފުޅުލެއްވި އިރުވެސް، އެއީ އޭނާ އަފްއާނިސްތާނުގައި ހުންނަވާނޭ އެންމެ ފަހު ދުވަސްކަމުގައި އޭނާއަށް އިހުސާސް ކުރެއްވިފައެއް ނުވެއެވެ.

އެހެންނަމަވެސް އޭނާ ވިދާޅުވި ގޮތުގައި އެކަން އޭނާއަށް އިހުސާސް ކުރެއްވުނީ، އޭނާ ދަތުރު ކުރެއްވި މަތިންދާ ބޯޓު އަފްއާނިސްތާނުގެ ވެރިރަށް ކާބުލްއިން ނައްޓާލުމާ ހަމައިންނެވެ.

އެހެންނަމަވެސް، އެ މުހިންމު ދަނޑިވަޅުގައި އެނާ އަފްއާނިސްތާން ދޫކޮށް ވަޑައިގަތުމާއި ގުޅިގެން، ދުނިޔޭގެ ގިނަގައުމުތަކުންނާއި އަދި އިތުރު އެތައްބައެއްގެ ފާޑުކިއުން އަޝްރަފް ޢަނީއަށްވަނީ އަމާޒުވެގެން ގޮސްފައެވެ. އަފްއާނިސްތާން ދޫކޮށް ވަޑައިގަތުމަށްފަހު ޢަނީ މިހާރު ދިރިއުޅުއްވަމުން ގެންދަވަނީ ޔުނައިޓޑް އަރަބް އެމިރޭޓްސްގައެވެ.

ބީބީސީގެ ރޭޑިއޯ4 ގައި ވާހަކަ ދައްކަވަމުން ޢަނީ ވިދާޅުވި ގޮތުގައި، އޮގަސް 15ވަނަ ދުހުގެ އިރުއެރި ފަހުންވެސް ތާލިބާން ޖަމާއަތުން ވަނީ ވެރިރަށް ކާބުލްއަށް ނުވަނުމަށް ވައުދުވެފައި ކަމުގައެވެ. އެހެންނަމެވެސް، "އޭގެ ދެ ގަޑިއެއްހާ އިރުފަހުން، މި ހަގީގަތް އޮތީ ބަދަލުވެފަ،" ޢަނީ ވިދާޅުވިއެވެ.

"ތާލިބާން ޖަމާއަތުގެ ތަފާތު ދެ ފެކްޝަނަކުން ދިޔައީ، ދެ ދިމާލަކުން ކާބުލް އާއި ދިމާލަށް ދަތުރު ކުރަމުން،" އެދުވަހު ކަން ހިގައިދިޔަ ގޮތް ތަފްސީލު ކޮށްދެއްވަމުން ޢަނީ ވިދާޅުވެފައި ވެއެވެ. "އަދި އެމީހުންނާއި ކުރިމަތި ލުމަކަށްގޮސް، ބޮޑު ހަމަނުޖެހުމެއް ހިނގާ، 5 މިލިއަން މީހުންގެ އާބާދީއެއް އޮތް ސިޓީ ފުނޑުފުނޑުވެ، ރައްޔިތުންނަށް ގެއްލުމާއި ހަލާކު ކުރިމަތި ވެގެން ދިއުމުގެ ފުރުސަތު އިންތިހާއަށް އޮތް."

ޢަނީ ވިދާޅުވި ގޮތުގައި އެދުވަހު، އޭނާގެ ނޭޝަނަލް ސެކިއުރިޓީ އެޑްވައިޒަރާއި އޭނާގެ އަނބިކަބަލުން ކާބުލް ދޫކޮށް ވަޑައިގަތުމުގެ ހުއްދަ ދެއްވުމަށްފަހު ދެން އޭނާ މަޑު ކުރެއްވީ ޑިފެންސް މިނިސްޓްރީއަށް ވަޑައިގަތުމަށްޓަކާ ކާރު އަންނާނެ ވަގުތަކަށް ކަމަށެވެ. އެހެންނަމަވެސް އޭނާ ވިދާޅުވި ގޮތުގައި އެކާރު އައިސްފައެއް ނުވެއެވެ. އަދި އޭގެ ބަދަލުގައި، "ބިރުގެންފައި ހުރި" ޗީފް އޮފް ޕްރެޒިޑެންޝަން ސެކިއުރިޓީ އޭނާގެ އަރިހަށް ވަޑައިގެން ވިދާޅުވެފައިވަނީ، ޢަނީ ހަގުރާމަ ކުރެއްވުމަށް ނިންމަވައިފިނަމަ، "އެމީހުން އެންމެން މަރުވެގެން ދާނެ" ކަމަށް ކަމުގައެވެ.

"އޭނާ އަހަރެންނަށް 2 މިނިޓްވެސް ދީފައެއް ނުވޭ،" ޢަނީ ވިދާޅުވިއެވެ. "އަހަރެން އޭނާއަށް އިރުޝާދު ދިނިން، ޚޯސްޓް ސިޓީއަށް ދިއުމަށް ތައްޔާރު ވުމަށް. އެހެންނަމަވެސް އޭނާ ވިދާޅުވީ ޚޯސްޓް ތާލިބާން ޖަމާއަތުގެ ބާރުގެ ދަށަށް ގޮސްފައިވާކަމަށް، އެހެންކަމުން ދެން ދެވެން އޮތް ތަނަކަށް އޮތީ ޖަލާލްއާބާދު."

"އަހަރެންނަށް އެގިފައެއް ނުވޭ ދަނީ ކޮންތާކަށް ކަމެއް. މަތިންދާ ބޯޓު އެއަރޕޯޓުން ނައްޓާލުމުން އަހަރެންނަށް އެގުނީ އަހަރެމެން މިސްރާބު ޖަހާފައި ހުރީ އަފްއާނިސްތާން ދޫކޮށް ދިއުމަށްކަމަށް. އެހެންކަމުން އެ ހުރިހާ ކަމެއް ހިގައި ދިޔައީ ކުއްލިއަކަށް ކަހަލަ ގޮތަކަށް،" އަފްއާނިސްތާން ދޫކޮށް ވަޑައިގެންނެވި ދުވަހު ކަން ހިގައިދިޔަ ގޮތް މީޑިއާކަށް ފުރަތަމަ ފަހަށް ތަފްސީލުކޮށް ދެއްވަމުން ކުރީގެ ރައީސް ވިދާޅުވެފައި ވެއެވެ.

އަފްއާނިސްތާންގެ ވެރިރަށް ކާބުލް ތާލިބާން ޖަމާއަތުގެ ބާރުގެ ދަށަށް އައި ދުވަހު، އެގައުމުގެ އޭރުގެ ރައީސް އަޝްރަފް ޢަނީ ގައުމު ދޫކުރައް ފިއްލެވީކަމަށް ޚުދު އޭނާގެ ސަރުކާރުގެ އިސްބައެއް ބޭފުޅުންވެސް ފަހުންވަނީ ވިދާޅުވެފައެވެ. އަދި ދުނިޔޭގެ ގައުމުތަކުގެ ފާޑުކިއުންވެސް އޭނާއަށް ވަނީ އަމާޒުވެގެން ގޮސްފައެވެ. އަދި ވަޑައިގެންނެވި އިރު އޭނާ އަފްއާނިސްތާނުން ގިނަ އަދަދެއްގެ ފައިސާވެސް ގެންދެވިކަމުގެ ތުހުމަތުވެސް ބައެއް ފަރާތްތަކުންވަނީ އޭނާގެ މައްޗަށް ކޮށްފައެވެ.

އެހެންނަމަވެސް ޢަނީވަނީ ތަކުރާރުކޮށް މިތުހުމަތުތަކަށްވެސް އިންކާރު ކުރައްވާފައެވެ.