ތެލުގެ މުއްސަދިކަން ލިބިފައިވާ ކުވައިތުގައި ދެ އަހަރު ތެރޭގައި ހަތަރުވަނަ ސަރުކާރު ބުދަ ދުވަހު ހުވާ ކޮށްފިއެވެ. ކުވައިތުގެ އެންމެ ފަހުގެ ސަރުކާރު އިސްތިއުފާ ދީފައިވަނީ އުފެދުނު ސިޔާސީ ޚިޔާލު ތަފާތުވުންތަކަށް ހައްލު ނުލިބި، ފާއިތުވި ނޮވެމްބަރުމަހުގެ ތެރޭގައެވެ.
ފާއިތުވި 10 ވަރަކަށް އަހަރުތެރޭ ކުވައިތުގައި ސިޔާސީ ޚިޔާލު ތަފާތުވުންތައް އުފެދިފައިވަނީ، އެގައުމުގެ ގާނޫނުހަދާ މަޖިލިހަށް އިންތިޚާބު ކުރެވޭ މެމްބަރުންނާއި، އެގައުމުގެ ސަރުކާރުގައި ނުފޫޒުގަދަ، ވެރިކަން ކުރަމުން އަންނަ އަލް ސަބާޙު އާއިލާއާއި ދެމެދުއެވެ. އަދި މި ޚިޔާލު ތަފާތުވުންތަކުގައި އެގައުމުގެ ގާނޫނުހަދާ މަޖިލީހާއި ކެބިނެޓްވަނީ އެތައް ފަހަރަކު އުވާލެވިފައެވެ.
ކުވައިތުގެ ސަރުކާރު އެންމެ ފަހުން، ފާއިތުވެދިޔަ ނޮވެމްބަރުމަހު އިސްތިއުފާ ދީފައިވަނީ، އިސްލާހީ ބަދަލުތައް ގެނައުމުގައި ސަރުކާރާއި ގާނޫނުހަދާ މަޖިލީހާއި ދެމެދު އުފެދުނު ޚިޔާލު ތަފާތުވުންތަކާ ގުޅިގެންނެވެ.
ކުވައިތުގެ ރަސްމީ ނިއުސްއޭގެންސީ ކުނާ (KUNA)އިން ރިޕޯޓު ކޮށްފައިވާ ގޮތުގައި އެގައުމުގެ އާ ސަރުކާރުގެ ކެބިނެޓް ހުވާ ކޮށްފައިވަނީ ވަލީ އަހުދުގެ ކުރިފުޅުމަތީގައެވެ.
މިއީ ކުވައިތުގެ މިހާރުގެ ބޮޑުވަޒީރު ސަބާހު އަލް ޚާލިދު އަލް ސަބާހު، 2019ވަނަ އަހަރުގެ ޑިސެމްބަރުމަހު ބޮޑުވަޒީރުކަމަށް އަޔަން ކުރެވުނުފަހުން އޭނާ އެކުލަވާލެއްވި 4 ވަނަ ސަރުކާރެވެ.
ކުވައިތަކީ އަރަބި ގައުމުތަކުގެ ތެރެއިން އާންމު ރައްޔިތުންގެ ވޯޓުން މުޅި މަޖިލިސް އިންތިޚާބު ކުރާ ހަމައެކަނި ގައުމެވެ. އަދި ގާނޫނުހަދާ މަޖިލީހަށް ގާނޫނީ ބޮޑެތި ބާރުތަކެއް ލިބިދީފައިވާ، އަދި މިނިސްޓަރުން މަގާމުން ވަކިކުރުމުގެ ބާރު ގާނޫނުހަދާ މަޖިލީހަށް ލިބި ދީފައިވާ ހަމައެކަނި އަރަބި ގައުމުވެސްމެއެވެ.
ކުވައިތުގެ އަލަށް އެކުލަވާލެވުނު ސަރުކާރުގައި، އޮއިލް މިނިސްޓަރ މުހައްމަދު އަލް ފާރެސްއާއި، ފޮރިންގ މިނިސްޓަރ ޝެއިޚް އަހުމަދު ނާސިރު އަލް މުހައްމަދު އަލް ސަބާހުއަކީ ކުރީ ސަރުކާރުގައިވެސް އެމަގާމުގައި ތިއްބެވި ވަޒީރުންނެވެ.
ފާއިތުވެދިޔަ އަހަރު ކުވައިތުގައި ބޭއްވުނު އިންތިޚާބުގައި އެގައުމުގެ އިދިކޮޅު ފަރާތްތަކުންވަނީ 50 ގޮޑި އެކުލެވޭ ގާނޫނުހަދާ މަޖިލިހުގެ ދެބައިކޮށްފަ އެއްބަޔަށްވުރެ ބޮޑު ކާމިޔާބެއް ހޯދާފައެވެ.
މި އިންތިޚާބަކީ، އެގައުމުން އާ އަމީރު ޝެއިޚް ނަވާފު އަމީރުކަމާއި ހަވާލުވެ ވަޑައިގަތުމަށްފަހު ބޭއްވުނު ފުރަތަމަ އިންތިޚާބެވެ. ޝެއިޚް ނަވާފު ކުވައިތުގެ އަމީރުކަމާއި ހަވާލުވެ ވަޑައިގަތީ، އެގައުމުގެ އަމީރު، އޭނޭގެ އެއްބަފާ ބޭބޭފުޅު ޝެއިޚް ސަބާހު އުމުރުފުޅުން 91 އަހަރުގައި އަވަހާރަ ވުމާއި ގުޅިގެންނެވެ.
