އިނގިރޭސި ޕްރިމިއާ ލީގުގައި ލެސްޓާ ސިޓީން ވަރުގަދަ ލިވަޕޫލް ބަލިކޮށްފިއެވެ.
ލެސްޓާ ސިޓީގެ ދަނޑުގައި ކުޅުނު މި މެޗުގައި ލިވަޕޫލް ލެސްޓާ އަތުން ބަލިވީ، 0-1 ގެ ނަތީޖާއަކުންނެވެ. މި ނަތީޖާއާއެކު ލީގުގެ އެއްވަނައިގައި އޮތް ސިޓީއާއި މެދު އޮތް ފަރަގު ކުޑަކުރުމުގެ ފުރުޞަތު ލިވަޕޫލަށް ވަނީ ގެއްލިފައެވެ.
މި މެޗު ފަށައިގެން ލަނޑު ޖަހާ ލީޑު ނަގަން އެންމެ ހުސް ފުރުޞަތު ފުރަތަމަ ލިބުނީ ލިވަޕޫލަށެވެ. މެޗުގެ 16 ވަނަ މިނެޓުގައި ލިވަޕޫލުގެ މުހައްމަދު ސަލާހަށްލެސްޓާގެ ވިލްފްރިއެޑް އެންޑީޑީ ކުރި ފައުލަކަށް ރެފްރީ ވަނީ ޕެނަލްޓީއެއް ދީފައެވެ. ނަމަވެސް ސަލާހް ފޮނުވާލި ޕެނަލްޓީ ވަނީ ލެސްޓާގެ ކީޕަރ ޝްމައިކަލްދިފާޢުކޮށްފައެވެ. މިއީ 2017 ގެ ފަހުން ސަލާހް އަތުން ޕެނަލްޓީއެއް ނާކާމިޔާބުވި ފުރަތަމަ ފަހަރެއެވެ.
މި މެޗުގައި ލެސްޓާ ސިޓީން ޖެހި ހަމައެކަނި ލަނޑު ޖެހީ ދެވަނަ ހާފުގައެވެ. މި ލަނޑު މެޗުގެ 59 ވަނަ މިނެޓުގައި ލެސްޓާއަށް ކާމިޔާބުކޮށްދިނީ، ދެވަނަހާފުގައި ކުޅެން ނުކުތް އެޑަމޯލާ ލުކްމަންއެވެ.
މި ނަތީޖާއާއެކު ލިވަޕޫލް އޮތީ ކުޅުނު 19 މެޗުން ލިބުނު 41 ޕޮއިންޓާއެކު ދެ ވަނައިގައެވެ. އަދި ތިންވަނައިގައި އޮތް ޗެލްސީއަށްވެސް 19 މެޗުން ލިބެނީ41 ޕޮއިންޓެއެވެ. ލިވަޕޫލަށް ކުރި ލިބެނީ ލަނޑުގެ ތަފާތުންނެވެ. ލީގުގެ އެއްވަނައިގައި 19 މެޗުން ލިބުނު 47 ޕޮއިންޓާއެކު އޮތީ، ޗެމްޕިއަން ސިޓީއެވެ.
