ހުސްވެފައިވާ ކޮމަންޑޫ ދާއިރާގެ ގޮޑިއަށް ވާދަކުރައްވާ އިދިކޮޅު ޕީޕީއެމްގެ ކެނޑިޑޭޓް މޫސާ ފަތުހީގެ ކެމްޕެއިނަށް އެކޯލިޝަންގެ ލީޑަރޝިޕްގެ ބޭފުޅުން މިރޭ ކޮމަންޑިއަށް ވަޑައިގެންފިއެވެ.
ކޮމަންޑޫއަށް މިރޭ ދިޔަ ޓީމުގައި އިސްކޮށް ހަރަކާތްތެރިވަނީ ޕީއެންސީގެ ރައީސް އަބްދުއްރަހީމް އަބްދުﷲއެވެ. ޕީޕީއެމްގެ ޓީމު މިރޭ ފީކައިދޫއަށް ދިއުމުން ވަނީ ވަރަށް ހޫނު މަރުހަބާއެއް ދަންނަވާފައެވެ. މިދަތުރުގައި ކޮމަންޑޫއަށްފަހު، މަރޮށި އަދި ފޯކައިދޫއަށްވެސް އިދިކޮޅު ލީޑަރޝިޕްގެ ބޭފުޅުން ވަޑައިގަތުމަށް ވަނީ ހަމަޖެހިފައެވެ.
އިދިކޮޅު ލީޑަރޝިޕުން ކޮމަންޑޑޫ ދާއިރާގައި ކެމްޕެއިން ކުރިއަށް ގެންދާއިރު، މި އިންތިޚާބުގައި އެމްއެންޕީން ވާދަކުރާ ކެނޑިޑޭޓުގެ ކެމްޕެއިންގައި އެޕާޓީގެ ލީޑަރޝިޕްގެ ބޭފުޅުން ދަނީ ހަރަކާތްތެރިވަމުންނެވެ. މިއިންތިޚާބުގައި އެމްޑީޕީގެ ކެނޑިޑޭޓުގެ ކެމްޕެއިން ހަރަކާތްތައް އަދި ނުފެށުނަމަވެސް މިއިންތޚާބުގައި އެންމެ ނުފޫޒު ގަދަ ކެނޑިޑޭޓަކަށް ވާނީ އެމްޑީޕީގެ ކެންޑިޑޭޓްކަމަށް ބެލެވެއެވެ.
ކޮމަންޑޫ ދާއިރާގެ ބައި އިލެކްޝަނުގައި ކުރިމަތިލުމަށް ފުރުސަތު ހުޅުވާލާފައިވަނީ އެ ދާއިރާގެ މެމްބަރު ހުސެއިން ވަހީދު އަވަހާރަވުމުން އެދާއިރާގެ ގޮނޑި ހުސްވުމާ ގުޅިގެންނެވެ. ހުސެއިން ވަހީދު މަޖިލީހުގައި ކޮމަންޑޫ ދާއިރާ ތަމްސީލް ކުރައްވަމުން ދިޔައީ އެމްޑީޕީ ޓިކެޓުގައެވެ.
އިލެކްޝަންސް ކޮމިޝަނުންރި މިހާރުވަނީ ކޮމަންޑޫ ދާއިރާގެ ބައި-އިލެކްޝަނަށް ކުރިމަތިލުމަށް އެދޭ ބޭފުޅުންނަށް މި މަހުގެ 30ވާ ބުރާސްފަތި ދުވަހުގެ 15:00ގެ ނިޔަލަށް އެފުރުސަތު ހުޅުވާލައްވާފައެވެ. މިއިންތިޚާބުގެ ކެނޑިޑޭޓުންގެ ނަން ތަރުތީބު ކުރުމަށް ބާއްވާ ގުރުއަތުލުން މާދަމާރޭ ބޭއްވުމަށް ވަނީ ހަމަޖެހިފައެވެ.
