ކ. މާފުށީގައި އަލަށް ހިއްކި ބިމުގެ ކަނެކްޝަން ބުރިޖު އެޅުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ހަވާލުކޮށްފިއެވެ.
މާފުށި ޕިކްނިކް އައިލެންޑްގައި މިއަދު ބޭއްވި ރަސްމިއްޔާތުގައި ޕްލޭނިން މިނިސްޓްރީގެ ފަރާތުން މަޝްރޫއުގައި ސޮއިކުރެއްވީ އެ މިނިސްޓްރީގެ ޕާމަނަންޓް ސެކްރެޓަރީ ޒީނިޔާ އަހުމަދު ހަމީދެވެ. އަދި އެމްޓީސީސީގެ ފަރާތުން މަޝްރޫއުގައި ސޮއިކުރެއްވީ އެ ކުންފުނީގެ ސީއީއޯ އާދަމް އާޒިމެވެ.
ޕްލޭނިން މިނިސްޓްރީން ބުނީ ޑިޒައިން އެންޑް ބިލްޑް އުސޫލުން މާފުށީގައި އަލަށް ހިއްކި ބިމާއި މާފުއްޓާއި ދެމެދު ދިގުމިނުގައި 137 މީޓަރު (450 ފޫޓު) ގެ ބްރިޖެއް އަޅާނެ ކަމަށެވެ. އަދި ބްރިޖުގެ ފުޅާ މިނުގައި 65 ފޫޓު ހުންނާނެ ކަމަށް ވެސް ޕްލޭނިން މިނިސްޓްރީން ބުންޏެވެ.
މި ބްރިޖުގައި ބައިސްކަލް ލޭނަކާއި ހިނގާފައި އުޅޭ މީހުންނަށް ވެސް ހާއްސަ ލޭންއެއް ހަދާނެއެވެ. ޒަމާނީ ގޮތަކަށް ހަދާ މި ބްރިޖުގައި ބެލްކަނިތަކެއް ވެސް ހެދުމަށް ވަނީ ހަމަޖެހިފައެވެ.
އެމްޓީސީސީއާއި ކ. މާފުށީގައި އަލަށް ހިއްކި ބިމުގެ ކަނެކްޝަން ބުރިޖު އެޅުމަށް ހަވާލުކޮށްފައިވާއިރު، އެމް.ޓީ.ސީ.ސީގެ މިސްރާބު ދެން ބަަދަލުކުރަންވީ ބްރިޖްއެޅުމާއި ބައިނަލްއަޤްވާމީ މަޝްރޫޢުތަކާއި ދިމާލަށްކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ އެމްޓީސީސީގެ އަހަރީ ދުވަހު ދެއްކެވި ވާހަފުޅުފައި ވިދާޅުވެފައެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، އެމް.ޓީ.ސީ.ސީ.އޭ ބުނުމުން މިއަދު ލިބޭ ވަރަށް ބޮޑު ހިތްހަމަޖެހުމެއް އެބައޮތްކަމަށެވެ. އެއީ، އެ ކުންފުންޏާ ޙަވާލުކުރާ ކޮންމެ މަޝްރޫޢެއްވެސް އޭގެ އެންމެ ރަނގަޅު ފެންވަރުގައި، ވަގުތަށް ނިންމައިދޭނެ ކަމުގެ ޔަޤީންކަންކަމަށް އެމަނިކުފާނު ވިދާޅުވިއެވެ. އަދި މިއީ މިއަދު އެމް.ޓީ.ސީ.ސީ.އާ މެދު އަޅުގަނޑުމެންގެ ހިތްތަކުގައި އޮތް ޔަޤީންކަންކަމަށާއި، ރައްޔިތުންގެ ހިތްތަކުން އެމް.ޓީ.ސީ.ސީ އިތުބާރާއެކު ޖާގަ މިއަދު ހޯދާފައިވާކަމަށް ރައީސް ވިދާޅުވިއެވެ.
ޢާންމު ރައްޔިތުން ބޭނުންވާ އެންމެ މުހިންމު ޚިދުމަތްތަކާ އެންމެ ބޮޑަށް ގުޅިފައިވާ ކުންފުންޏަކީ އެމް.ޓީ.ސީ.ސީކަން ފާހަގަކުރައްވާ، ރާއްޖޭގެ އިޤްތިޞާދީ ދާއިރާގައި ރައްޔިތުންނަށް އެކި އެކި ފުރުޞަތުތައް ފަހިކޮށްދިނުމަށް އެކުންފުނިން ކުރަމުންދަނީ ތަޢުރީފު ޙައްޤު މަސައްކަތްތަކެއްކަމަށް ރައީސުލްޖުމްހޫރިއްޔާ ވިދާޅުވިއެވެ.
ކޮމެންޓު ފޮނުވާ