ރާއްޖޭގައި އެންމެފަހުން އުފެއްދި ސިޔާސީ ޕާޓީ ކަމުގައިވާ އެމްއެންޕީގެ ފަރާތުން ކޮމަންޑޫ ދާއިރާގެ ހުސްވެފައިވާ ގޮޑިއަށް ވާދަކުރައްވާ ޢަބްދުލް ޙަންނާން އިދުރީސްގެ ފޯމު އިލެކްޝަންސް ކޮމިޝަނުން ބަލައިގަތުމާއެކު، އެމްއެޕީގެ ލީޑަރޝިޕް ބައި އިލެކްޝަންގެ ކެޕްމޭނަށް ކޮމަންޑޫ ދާއިރާއަށް ވަޑައިގެންފިއެވެ.
މިގޮތުން، އެމްއެންޕީގެ ރައީސް، ދަނގެތީ ދާއިރާގެ މެމްބަރު، ކާނަލް ރިޓަޔަރޑް މުހައްމަދު ނާޒިމްއާއި، އެޕާޓީގެ އެއް ނާއިބު ރައީސް ކަމުގައިވާ ތިމަރަފުށި ދާއިރާގެ މެމްބަރު އަބުދުﷲ ރިޔާޒްގެ އިތުރުންވެސް އެޕާޓީގެ ލީޑަރޝިޕްގެ ގިނަ ބޭފުޅުން ހިމެނިވަޑައިގަންނަވާ ޓީމެއް މިމަހުގެ 27ވަނަ ދުވަހުވަނީ ށ. ކޮމަންޑުއަށް ވަޑައިގެންފައެވެ. މިޓީމާއެކީ، އެމްއެންޕީގެ ޓިކެޓްގައި ވާދަކުރައްވާ ކެނޑިޑޭޓް ހަންނާނުވެސް ދާއިރާއަށް ދަތުރު ކުރައްވާފައިވެއެވެ.
ބައި އިލެކްޝަންގެ ކެމްޕޭނަށް ކޮމަންޑޫ ދާއިރާއަށް އެމްއެންޕީގެ ލީޑަރޝިޕުން މިފެއްޓި ދަތުރުގައި، ހޯމަ ދުވަހު ކޮމަންޑޫގައި ދޮރުން ދޮރަށް ވަނީ ހިންގަވާފައެވެ. އަދި އަންގާރަ ދުވަހު ލީޑަރޝިޕްގެ ޓީމުން ދާއިރާގެ އަނެއް ދެރަށް ކަމުގައިވާ ފޯކައިދޫ އަދި މަރޮށްޓަށް ދަތުރު ކުރުމަށް ވަނީ ހަމަޖެހިފައެވެ.
ކޮމަންޑޫ ދާއިރާގެ ބައި އިލެކްޝަނުގައި ކުރިމަތިލުމަށް ފުރުސަތު ހުޅުވާލާފައިވަނީ އެ ދާއިރާގެ މެމްބަރު ހުސެއިން ވަހީދު އަވަހާރަވުމުން އެދާއިރާގެ ގޮނޑި ހުސްވުމާ ގުޅިގެންނެވެ. ހުސެއިން ވަހީދު މަޖިލީހުގައި ކޮމަންޑޫ ދާއިރާ ތަމްސީލް ކުރައްވަމުން ދިޔައީ އެމްޑީޕީ ޓިކެޓުގައެވެ.
އެމްއެންޕީ ހިމެނިގެން ގޮސްފައިވަނީ، ކޮމަންޑޫ ދާއިރާގެ ބައި އިލެކްޝަންގައި ވާދަކުރުމަށް ފުރުސަތު ހުޅުވާލާ، އަދި އެންމެ ފުރަތަމަ އިލެކްޝަން ކޮމިޝަނުން ކެނޑިޑެސީ ބަލައިގަތް ޕާޓީގެ ގޮތުގައެވެ. މި ބައިލެކްޝަންގައި އެމްއެންޕީގެ އިތުރުން ވެރިކަންކުރާ އެމްޑީޕީ އަދި ޕީޕީއެމްއިންވެސް ވާދަކުރާނެކަން ވަނީ ހާމަ ކޮށްފައެވެ.
އެމްއެންޕީގެ އިލެކްޓޯރަލް ޓިކެޓް ށ. ކޮމަންޑުއަށް އުފަން، ތައުލީމީ ދާއިރާއަށް ގިނަގުނަ ޚިދުމަތްތަކެއް ކުރައްވާފައިވާ ހަންނާންއާއި ހަވާލުކުރުމަށް މިމަހުގެ 25ވަނަ ދުވަހުގެރޭ އެމްއެންޕީން ބޭއްވި ޖަލްސާގައި ވާހަކަ ދައްކަވަމުން ހަންނާން ވިދާޅުވެފައިވަނީ، މަޖިލީހުގެ އޭނާގެ މަސައްކަތުގެ އަމާޒަކަށް ހައްދަވާނީ، ދާއިރާގެ ރައްޔިތުންނަށް ފަހި ފާގަތި ދިރިއުޅެއް ހޯދާދިނުންކަމުގައެވެ. އަދި އެޖަލްސާގައި ޕާޓީގެ ރައީސް، ދަނގެތީ ދާއިރާގެ މެމްބަރު، ކާނަލް ރިޓަޔަރޑް މުހައްމަދު ނާޒިމް ވިދާޅުވެފައިވަނީ ހަންނާނު އިދުރީސްއަކީ ޖީލެއް ބިނާ ކުރެއްވި ބޭއްފުޅެއްކަމުގައެވެ.
ހަންނާނަކީ 1987 ވަނަ އަހަރުން ފެށިގެން 2019ވަނަ އަހަރާހަމައަށް، ދިގު މުއްދަތެއް ވަންދެން ތައުލީމީ ދާއިރާއަށް އަގުހުރި ގިނަގުނަ ޚިދުމަތްތަކެއް ކުރައްވާފައިވާ ބޭފުޅެކެވެ. މިގޮތުން ތައުލީމީ ދާއިރާގައި އޭނާ ޚިދުމަތް ކުރެއްވި މުއްދަތުގެ ތެރޭގައި، ގިނަ ސްކޫލްތަކެއްގެ ޕްރިންސިޕަލްކަން އޭނާވަނީ ކުރައްވާފައެވެ. އޭގެ ތެރޭގައި ހދ. ހަނިމާދޫ ސްކޫލް، ރ. އިނގުރައިދޫ ސްކޫލް، ށ. އަތޮޅު ތަޢުލީމީ މަރުކަޒު، ނ. މާފަރު ސްކޫލްގެ އިތުރުން ރ. ހުޅުދުއްފާރު ސްކޫލްގެ ޕްރިންސިޕަލްކަންވެސް އޭނާ ކުރައްވާފައި ވެއެވެ.
މީގެ އިތުރުން، ޕްރައިމަރީ ސްކޫލް ޓީޗަރުކަމާއި ސުޕަރވައިޒަރުކަމުގެ އިތުރުން ހެޑްމާރސްޓަރކަމުގެ މަގާމްވެސް ތައުލީމީ ދާއިރާގައި ޚިދުމަތް ކުރެއްވި މުއްދަތުގައި އޭނާވަނީ އަދާ ކުރައްވާފައެވެ. 2013ވަނަ އަހަރުން 2019ވަނަ އަހަރުގެ ނިޔަލަށް އޭނާވަނީ ވިލާ ކޮލެޖްގެ ޝަރިއްޔާ އެންޑް ލޯ ފެކަލްޓީގެ މެނޭޖަރު ކަމުގެ މަގާމުވެސް ފުރުއްވާފައެވެ.
