ރާއްޖޭގެ އެއްބައިވަންތަކަމާއި ހަމަޖެހުމަށް އޮތް އެންމެ ބޮޑު ކަމަކީ ރާއްޖޭގައި ތިބި އިންޑިއާގެ މިލިޓަރީ ސިފައިން ރާއްޖެއިން ބޭލުން ކަމުގައި އިދިކޮޅު ޕީއެންސީގެ ނައިބް ރައީސް މުހައްމަދު ސައީދު ވިދާޅުވެއްޖެއެވެ.

ނަފްރަތު އުފެދޭ ކަންކަމާއި ދުރުވެ، ސުލްހަވެރި ސިޔާސީ ހަރަކާތުގައި ދެމިތިބުމަށް އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ގޮވާލެއްވި ގޮވާލުމާއި ގުޅިގެން ސައީދު ވިދާޅުވީ ރާއްޖޭގެ ހަމަޖެހުން ގާއިމް ކުރުމަށް ކުރަންޖެހޭ ފުރަތަމަ މަސައްކަތަކީ ރާއްޖޭގައި ތިބި އިންޑިއާ ސިފައިން ރާއްޖެއިން ބޭލުންކަމަށެވެ.

އިންޑިއާއާއިއެކު ވެފައިވާ ސިއްރު އެއްބަސްވުންތަކާއި، އަސްކަރީ ސަރަހައްދުތަކުގެ މައުލޫމާތު ދިވެހި ރައްޔިތުންނަށް އެގެންޖެހޭ ކަމަށާއި، އެކަން ސަރުކާރުން ކުރަންޖެހޭކަމަށެވެ. ރާއްޖޭގެ ހަމަޖެހުން ނަގާލައި ނަފްރަތު އުފައްދަނީ އަބަދުވެސް އެމްޑީޕީން ކަމަށް ސައީދު ވިދާޅުވިއެވެ.

ޤައުމު އެއްބައިވަންތަ ކަމުގައި އެންމެ މުހިންމީ އިތުރު ބަހަނާ އަކާއި ނުލައި، އިންޑިއާ ސިފައިން ރާއްޖެއިން ފޭބުން. ޔޫޓީއެފް އެއްބަސްވުން ބާތިލްކޮށް، ރައްޔިތުންގެ ކުންފުނިތަކާއި ކަނޑުގެ ސަރަހައްދު ހިމެނޭ ހައިޑްރޯގްރަރީގެ ކޮންޓްރޯލް ވިއްކާލުމުން! ނަފްރަތު އުފެއްދުމަކީ އެމްޑީޕީން ކުރާކަމެއް.

– ސައީދު ވިދާޅުވިއެވެ.

މިއަދު ފާހަގަ ކުރަމުންދާ ރާއްޖޭގެ އެއްބައިވަންތަ ކަމުގެ ދުވަހާއި ގުޅިގެން ރައީސް ނަޝީދު ކުރެއްވި ޓުވީޓުގައި ވިދާޅުވީ މިފަދަ ދުވަހެއްގައި ޤައުމުގައި ބައިބައިވުން އުފެދި ހަމަޖެހުން ގެއްލޭފަދަ ކަންކަމުން ދުރުވުމަށް އަޒުމް އާކުރަން ޖެހޭކަމަށެވެ. ނަފްރަތު އުފެދޭ ކަންކަމާއި ދުރުވެ، ސުލްހަވެރި ސިޔާސީ ހަރަކާތުގައި ދެމިތިބުމަކީ މިއަދު އަޒުމް އާކުރަންޖެހޭ ކަމެއްކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު މިޓުވީޓުގައި މާނަކުރައްވަނީ އިދިކޮޅުން ހިންގަމުންދާ "އިންޑިއާ އައުޓް" ހަރަކާތަށް ކަމަށްބެލެވެއެވެ. ރައީސް ނަޝީދު ވަނީ އެހަރަކާތް ހުއްޓުވަމަށާއި، އެހަރަކާތް ހިންގޭނެ ޖާގަ ނުދިނުމަށް ފުލުހުންނަށް ރައީސް ނަޝީދު ވަނީ ގޮވާލާފައެވެ.