އެމެރިކާގެ ރިޔާސީ އިންތިޚާބުގައި ވޯޓުލާނިމި އަދި ގިނަ ސްޓޭޓުތަކުގައި ވޯޓު ގުނާ ނިމިފައި ވާއިރު އިންތިޚާބު ކާމިޔާބު ކުރުމަށް ބޭނުންވާ 270 އިލެކްޓޯރަލް ވޯޓާއިހަމައަށް ދަތުރުކުރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށް ޖޯބައިޑްގެ ކެމްޕޭންގެ ފަރާތުން ބުނެފިއެވެ.
މިހާރުގެ ނަތީޖާއަށް ބަލާއިރު، ޖޯ ބައިޑްން މިހާރުވަނީ އެމެރިކާގެ 50 ސްޓޭޓުގެ މެދުގައި ބަހާލެވިފައިވާ 538 އިލެކްޓޯރަލް ވޯޓުގެ ތެރެއިން 253 އިލެކްޓޯރަލް ވޯޓު ކާމިޔާބު ކުރައްވާފައެވެ. ޓްރަމްޕަށް ކާމިޔާބު ކުރެވިފައިވަނީ 213 އިލެކްޓޯރަލް ވޯޓެވެ. އިންތިޚާބު ކާމިޔާބުކުރާ ކެޑިޑޭޓާކު 270 އިލެކްޓޯރަލް ވޯޓު ކާމިޔާބު ކުރައްވަން ޖެހިވަޑައިގަންނަވާނެއެވެ. ޑިމޮކްރަޓިކް ޕާޓީގެ ކެޑިޑޭޓް ޖޯ ބައިޑްން މިހާރުވެސް ވަނީ 71.5 މިލިއަން ވޯޓު ކާމިޔާބު ކުރައްވާ ރެކޯޑު އަދަދަކަށް ވޯޓު ހޯއްދަވާފައެވެ.
އިންތިޚާބުގެ ނަތީޖާ މިހާރު ހުއްޓިފައިވަނީ އެންމެ ފަހުގެ ނަތީޖާ އިއުލާނު ނުކުރެވިވާ ވާދަވެރި ސްޓޭޓްތައް ކަމުގައިވާ އެރިޒޯނާ، ޖޯޖިއާ، ވިސްކަސިން އަދި ޕެންސަލްވޭނިއާ އަށެވެ. މިސްޓޭޓްތަކުގެ ތެރެއިން އެރިޒޯނާގައި ބައިޑްން ކުރީގައި އުޅުއްވާއިރު، ޕެންސަލްވޭނިއާގައި ކުރީގައި އުޅުއްވަނީ ޓްރަމްޕެއެވެ. އެރިޒޯނާގައި ބައިޑްން 80،000 ވޯޓުން ކުރީގައި އުޅުއްވާއިރު، ޕެންސެލްވޭނިއާގައި ޓްރަމްޕް ކުރީގައި އުޅުއްވަނީ 200،000 ވޯޓުގެ ތަފާތުންނެވެ.
ޕެންސެލްވޭނިއާ ކާމިޔާބުކުރާ ކެޑިޑޭޓަކަށް 20 އެލެކްޓޯރަލް ވޯޓު ލިބިގެންދާއިރު އެރިޒޯނާ ކާމިޔާބުކުރާ ކެޑިޑޭޓަކަށް 11 އިލެކްޓޯރަލް ވޯޓު ލިބިގެން ދާނެއެވެ.
މިހާރުގެ ނަތީޖާއަށް ބަލާއިރު އިންތިޚާބު ކާމިޔާބު ކުރުމަށް ޖޯ ބައިޑްން އިތުރަށް ބޭނުން ވަނީ 17 އިލެކްޓޯރަލް ވޯޓެވެ.
މިހާތަނަށް އައިއިރު ޓްރަމްޕަށް ކާމިޔާބު ކުރެވޭނެ ކަމަށް ދައްކަނީ 50 ސްޓޭޓުގެ ތެރެއިން 23 ސްޓޭޓެކެވެ. މީގެތެރޭ ކުރީގެ ހީކުރުންތަކާއި ޚިލާފަށް، ބޮޑެތި ބައެއް ސްޓޭޓްތައް ކަމުގައިވާ ޓެކްސަސް، އޮހާއޯ އަދި ފްލޮރިޑާ ހިމެނެއެވެ.
ތާއީދު ކުރާ ފަރާތްތަކާއި ވާހަކަ ދައްކަވަމުން އިއްޔެ ޓްރަމްޕްވަނީ، އިންތިޚާބުގައި މަކަރުހަދާފައިވާ ކަމުގެ ތުހުމަތު ކުރައްވާފައެވެ. އެހެންނަމަވެސް ސާބިތު ހެއްކެއް މިހާތަނަށް އައިއިރު ދައްކަވާފައި ނުވެއެވެ. ޚަބަރު ލިބިފައިވާ ގޮތުގައި ޓްރަމްޕްގެ ގާނޫނީ ޓީމުން މިހާރުވަނީ ޕެންސެލްވޭނިއާ، ވިސްކަންސިން، ޖޯޖިއާ އަދި މިޗިގަންގައި ވޯޓު ގުނުން ހުއްޓުވުމަށް ކޯޓަށް މައްސަލަ ހުށަހަޅުއްވާފައެވެ.
ޓްރަމްޕްގެ މި ތުހުމަތުތަކަށް ޖޯ ބައިޑްންވަނީ ވަރަށް ބޮޑަށް ފާޑުވިދާޅުވެފައިއެވެ. އަދި ބައިޑްންއަށް ތާއީދު ކުރާފަރާތްތަކުން، ވޯޓު ގުނަމުންދާ ސަރަހައްދުތަކުގައި، ވޯޓު ގުނުން ކުރިޔަށް ގެންދިއުމަށް ގޮވާލާ ދަނީ މުޒާހިރާ ކުރަމުންނެވެ.
މިހާރުގެ ތަފާސް ހިސާބުތަކުން ދައްކާގޮތުގައި މިއިންތިޚާބަކީ ފާއިތުވެދިޔަ 120 އަހަރު ދުވަހުގެ ތެރޭގައި އެންމެ ގިނަ އަދަދަކަށް އެމެރިކާގައި ރައްޔިތުން ވޯޓުލާން ނިކުތް އިންތިޚާބެވެ. މިހާރު ދައްކާގޮތުން މިއިންތިޚާބުގައި %66.9 ރައްޔިތުން ވަނީ ވޯޓުލާފައެވެ.
އެހެން އަހަރުތަކުގެ އިންތިޚާބުތަކާއި ޚިލާފަށް މިއަހަރުގެ ރިޔާސީ އިންތިޚާބުގައި 100 މިލިއަނަށްވުރެ ގިނަ އެމެރިކާގެ ރައްޔިތުންވަނީ ދުރާލާ ވޯޓު ލާފައެވެ. މީގެ ތެރޭގައި ގިނަ އަދަދެއްގެ ރައްޔިތުން ވޯޓުލާފައިވަނީ ޕޯސްޓުގެ ޒަރީއާއިންނެވެ.
