الحمد لله والصلاة والسلام على رسول الله وعلى آله وصحبه، أما بعـد:
ދާއިމީ ގޮތެއްގައި ޙަދަޘްވެރި ވެފައި ހުންނަ ނަމަ ކޮންމެ ނަމާދު ވަގުތަކަށް ވުޟޫކޮށްގެން ނަމާދު ކުރާނީއެވެ. އަނެއް ނަމާދު ވަގުތު ވަނުމާއި ހަމައަށް އެމީހަކު ބޭނުން ވަރަކަށް ސުންނަތް ނަމާދުތައް ވެސް ކުރާނީ އެވެ.
މިކަމުގެ ދަލީލަކީ އުއްމުލް މުއިމިނީނަ ޢާއިޝާ-ރަޟިޔަﷲ ޢަންހާ ރިވާ ކުރައްވާފައިވާ އަންނިވި ޙަދީޘެވެ. (جاءت فاطمة بنت أبي حبيش إلى النبي صلى الله عليه وسلم فقالت : يا رسول الله إني امرأة أستحاض فلا أطهر أفأدع الصلاة ؟ فقال رسول الله صلى الله عليه وسلم : لا ، إنما ذلك عرق وليس بحيض ، فإذا أقبلت حيضتك فدعي الصلاة وإذا أدبرت فاغسلي عنك الدم ثم صلي ، ثم توضئي لكل صلاة حتى يجيء ذلك الوقت) . رواه البخاريމާނައަކީ :" ރަސޫލުﷲ-ޞައްލަﷲ ޢަލައިހި ވަސައްލަމަ-ގެ އަރިހަށް ފާޠިމަތު ބިންތި އަބީ ޖައިޝް ވަޑައިގެން ދެންނެވިއެވެ. އޭ ﷲ ގެ ރަސޫލާ އެވެ. އަހަންނަކީ އަބަދު ލޭފައިބާ އަންހެނަކީމެވެ. ދުވަހަކުވެސް ޠާހިރުވެގެން ނުހުރެވެއެވެ. އެހެންވީމާ އަހަރެން ނަމާދުތައް ދޫކޮށްލަންވީ ތޯއެވެ؟ ޙަދީޘް ކުރެއްވިއެވެ. ނޫނެވެ. އެއީ ބައްޔެއްގެ ސަބަބުން ފައިބާ ލެއެކެވެ. އެއީ ޙައިޟުގެ ލެޔެއް ނޫނެވެ. ކަމަނާ ޙައިޟުގެ ދުވަސްވަރު އަތުވެއްޖެނަމަ ނަމާދު ދޫކޮށްލާށެވެ. އެދުވަސްވަރު ނިމުމުން ފެންވަރައިގެން ލޭތައް ދޮވެލާ ސާފުކޮށްލާފައި ނަމާދު ކުރާށެވެ. އަދި ކޮންމެ ނަމާދަކަށް ވުޟޫ ކުރާށެވެ. އަނެއް ނަމާދު ވަގުތު އައުމާއި ހަމައަށެވެ".
ކުޑަގިފިލި ކުރުމުގައި މައްސަލަ ދިމާވުމުގެ ސަބަބުން އަބަދުމެ ހީސްތިކި ޖެހިފައި ހުންނަ މީހުން ގެ ޙުކުމަކީ އިސްތިޙާޟާ ވެރި އަންހެނާ ގެ ޙުކުމް ކަމުގައި ޢިލްމުވެރިން ވިދާޅުވެއެވެ.
ކުޑަގިފިލި ކުރުމުގައި މައްސަލަ ދިމާވުމުގެ ސަބަބުން އަބަދުމެ ހީސްތިކި ޖެހިފައި ހުންނަ މީހާ، ނަމާދު ވަގުތުގެ ތެރޭގައި ކޮންމެވެސް ވަގުތެއް ޠާހިރުވެގެން ހުރެ ނަމާދު ކުރުމަށް ފުރުޞަތު ލިބޭނެ ކަމަށް ލަފާ ކުރެވޭނަމަ އެވަގުތެއް ޖެހެން ދެން ނަމާދު ކުރުން ލަސްކުރާނީއެވެ.
والله أعلم
