ފުރަމާނަ ދަތުރުފުޅެއްގައި ބަންގްލަދޭޝްގެ ބޮޑުވަޒީރު ޝައިޚް ހަސީނާ ރާއްޖެ ވަޑައިގެންނެވިއިރު އެކަމަނާގެ އިސްތިޤުބާލުގެ ކަންކަން ކުރިއަށް ގެންގޮސްފައިވަނީ އިންޓަރނޭޝަނަލް މިންގަނޑުތަކާއި ޚިލާފަށް ކަމުގައި ކުރީގެ އުއްތަމަ ފަނޑިޔާރު ޑރ.އަހުމަދު އަބްދުﷲ ވިދާޅުވެއްޖެއެވެ.

ކުރީގެ އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީ ވިދާޅުވީ، ދުނިޔޭގެ ބޮޑު ޤައުމެއްގެ ވެރިޔަކު ރާއްޖެ ވަޑައިގެންނެވިއިރު، އެކަމަނާގެ އިސްތިޤުބާލުގެ ކަންކަން ކުރިއަށް ގެންގޮސްފައިވަނީ އިންޓަރނޭޝަނަލް ކާރޓެސީއާއި ޚިލާފަށް ކަމަށެވެ.

ބޮޑުވަޒީރު ޝައިޚް ޙަޞީނާގެ އިސްތިޤުބާލަށް، “އިންޓަރނޭޝަނަލް ކާރޓެސީ”ގެ އުޞޫލުތަކާ ޚިލާފަށް ސްޓޭޓް މިނިސްޓަރަކު ވަޑައިގަތުމުން، މިއަދުގެ ސަރުކާރަކީ ބައިނަލްއަޤުވާމީ މައިދާނުގައި ދިވެހި ދައުލަތް ތަމްޘީލުކުރުމުގެ ޤާބިލުކަން ނެތް ސަރުކާރެއްކަން ހާމަވެގެންދޭ!

ޑރ.އަހުމަދު އަބްދުﷲ ވިދާޅުވިއެވެ.

ބޮޑުވަޒީރު ޝައިޚް ޙަޞީނާގެ އިސްތިޤުބާލަށް ވަޑައިގަތީ މިނިސްޓަރ އޮފް ސްޓޭޓް ފޮރ ފޮރިންއެފެއާޒް އަޙުމަދު ޚަލީލާއި ރާއްޖޭގެ ފޮރިން ސެކްރެޓަރީ ޢަބްދުލްޣަފޫރު މުޙައްމަދެވެ. ސަރުކާރުގެ އިތުރު އެއްވެސް ބޭފުޅަކު އަދި ވެރިއަކުވެސް އެކަމަނާގެ އިސްތިގުބާލުގައި ބައިވެރިވެފައި ނުވެއެވެ.

ރާއްޖޭގެ ފޮރިންގ މިނިސްޓަރު އަބުދުﷲ ޝާހިދު ޔޫއެން ޖެނެރަލް އެސެމްބްލީގެ ރައީސްކަމަށް އިސްވެވަޑައި ގަތުމަށްފަހު، ފޮރިންގ މިނިސްޓްރީ ހިންގުވުމުގައި އިސްކޮށް އުޅުއްވަމުން ގެންދަވަނީ ސްޓޭޓް މިނިސްޓަރ ޚަލީލްއެވެ.

ދައުލަތުގެ ވަޒީރުން މަގާމުގެ އަމަލީ މަސައްކަތާއި ވަގުތީގޮތުން ދުރަށް ޖެހިވަޑައިގަންނަވަން ޖެހުމުން ދައުލަތުގެ ކޮންމެވެސް އެހެން ވަޒީރެއްގެ ބެއްލެވުމުގެ ދަށުން އެމިނިސްޓްރީއެއް ބެލެހެއްޓެވުމަކީ ޒަމާނުއްސުރެ ރާއްޖޭގައި ސަރުކާރުތަކުން އަމަލް ކުރަމުން އަންނަ އުސޫލެކެވެ.

އެހެންނަމަވެސް ފޮރިންގ މިނިސްޓަރު އަބުދުﷲ ޝާހިދު ޔޫއެން ޖެނެރަލް އެސެމްބްލީގެ ރައީސް ކަމުގެ މަގާމު އަދާކުރެއްވުމަށް ޔޫއެންއަށް ވަޑައިގެންނެވުމަށްފަހު އެމިނިސްޓްރީގެ ކަންކަން ބެލެހެއްޓެވުން އެހެން ވަޒީރަކާ ރައީސުލްޖުމްހޫރިއްޔާ ހަވާލުކުރައްވާފައެއް ނުވެއެވެ. އަދި ޚާރިޖީ ކަންކަމާ ގުޅޭގޮތުން ކެބިނެޓަށް ޖަވާބުދާރީވާނެ ވަޒީރެއްވެސް އެ މިނިސްޓްރީގައި އޭގެފަހުން ނުހުންނަވައެވެ.

ދިވެހިރާއްޖޭގެ ގާނޫނު އަސާސީގައި ވާގޮތުން، ވަޒީރަކަށް ދެމަގާމެއް އަދާ ނުކުރެވޭނެ ކަމަށް ބަޔާން ކޮށްފައިވާކަމަށް ވިދާޅުވެ، ފޮރިންގ މިނިސްޓަރ އަބުދުﷲ ޝާހިދު މަގާމުން އިސްތިއުފާ ދެއްވަން ޖެހިވަޑައި ގަންނަވާނޭކަމަށް އިދިކޮޅު ފަރާތްކުން ބުނަމުން އައިނަމަވެސް، އެމަނިކްފާނުވަނީ ވަޒީރުކަމުން އިސްތިއުފާ ނުދެއްވާނޭކަމަށް ވިދާވެފައެވެ.

ޝައިޚް ހަސީނާގެ މި ދަތުރުފުޅަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަހަރުގެ މާރޗް މަހު ބަންގްލަދޭޝަށް ކުރެއްވި ދަތުރުފުޅުގައި އެކަމަނާއަށް އެރުވި ދަޢުވަތަކަށް ކުރައްވާ ފުރަމާނަ ދަތުރުފުޅެކެވެ. މިއީ ދެ ދުވަހުގެ ދަތުރުފުޅެކެވެ. ދަތުރުފުޅުގެ ރަސްމީ ހަރަކާތްތައް އޮންނާނީ މާދަމާއެވެ.

‎މި ދަތުރުފުޅުގައި އެކަމަނާ އާ ރާއްޖޭގެ ރައީސުލްޖުމްހޫރިއްޔާ ބައްދަލުކުރައްވައި ރަސްމީ ވާހަކަފުޅުތައް ބޭއްވެވުމަށް ވަނީ ހަމަޖެހިފައެވެ. މި ވާހަކަފުޅުތަކުގައި، ދެ ޤައުމުގެ ދެމެދުގައި އެކި ދާއިރާތަކުން އިތުރަށް ގުޅުން ބަދަހި ކުރެއްވުމާބެހޭގޮތުން މަޝްވަރާކުރައްވާނެއެވެ. އަދި ދެ ޤައުމުގެ ދެމެދު އެކި ދާއިރާތަކުން ގުޅުން ބަދަހިކުރުމުގެ ގޮތުން ފަހުމުނާމާތަކެއްގައި ސޮއިކުރުމަށް ވަނީ ހަމަޖެހިފައެވެ.

އެގޮތުން މަސްވެރިކަމުގެ ދާއިރާ، އަދި އެނޫންވެސް އެކި ދާއިރާތަކުން މީހުން ބިނާކުރުމާއި ތަޢުލީމީ ދާއިރާއަކީ މިހާރުވެސް ދެ ޤައުމުގެ ދެމެދުގައި ގާތް ގުޅުމެއް އޮންނަ ބައެއް ދާއިރާތަކެވެ. ދެ ޤައުމު ދެމެދު ސޮއިކުރެވޭ މި އެއްބަސްވުންތަކާއެކު ދެ ޤައުމުގެ މެދުގައި އޮތް ގުޅުން އިތުރަށް ވަރުގަދަވެ ހަރަދަނާވެގެންދާނެކަމަށް ދިވެހި ސަރުކާރުން ވިދާޅުވެއެވެ.

‎ދިވެހިރާއްޖެއާއި ބަންގްލަދޭޝާ ދެޤައުމުގެ މެދުގައި ޚާރިޖީ ގުޅުން ޤާއިމްކުރީ 22 ސެޕްޓެމްބަރ 1978ގައެވެ.