އިނގިރޭސި ކޯޓަކުން މިހާތަނަށް ނިންމި އެންމު އަގުބޮޑު ވަރީގެ މައްސަލައިގެ ގޮތުގައި، ދުބާއީގެ ވެރިޔާ، ޝެއިޚް މުހައްމަދު ބިން ރާޝިދު އަލް-މަޚްތޫމް އޭނާގެ ކުރީގެ އަނބި މީހާ، ޕްރިންސެސް ހަޔާ ބިންތި އަލް-ހުސެއިންއަށް 728 މިލިއަން ޑޮލަރު ދެއްކުމަށް އިނގިރޭސި ކޯޓަކުން ހުކުމް ކޮށްފިއެވެ.
މި އަދަދަކީ ޕްރިންސެސް ހަޔާ އޭނާގެ ހަޔާތުގެ ބާކީ އޮތްތަނުގައި އޭނާގެ އަމިއްލަ ސެކިއުރިޓީ ބެލެހެއްޓުމަށާއި، އޭގެ އިތުރުން، މިހާރުވެސް ޕްރިންސެސް ހަޔާ ބަލަހައްޓަވަމުން ގެންދަވާ ޝެއިޚް މުހައްމަދުގެ ދެ ދަރިން ކަމުގައިވާ އަލް ޖަލީލާ ބިންތި މުހައްމަދު ބިން ރާޝިދު އަލް މަޚުތޫމް އާއި ޝެއިޚް ޒައިދު ބިން މުހައްމަދު ބިން ރާޝިދު އަލް މަޚުތޫމްގެ ޚަރަދަށް ހިގާނެކަމަށް ހިސާބު ކުރެވިގައިވާ ޚަރަދުގެ ޖުމްލަ އަދަދެވެ.
އަދި މި އަދަދުގެ ތެރެއިން ކުރިޔަށް އޮތް 3 މަސްދުވަހުގެ ތެރޭގައި 333 މިލިއަން ޑޮލަރު ދެއްކުމަށްވެސް އިނގިރޭސި ކޯޓުން ހުކުމް ކޮށްފައި ވެއެވެ.
ފަނޑިޔާރު ލިޔުއްވާ އަންގާރަދުވަހު އާންމުކޮށްފައިވާ ހުކުމްގައި ވާގޮތުން، ޕްރިންސެސް ހަޔާއާއި އޭނާގެ ދެދަރިންނަށް ސަލާމަތީގޮތުން ކުރިމަތިވެފައިވާ އެންމެ ބޮޑު ނުރައްކަލެއް ކުރިމަތިވެފައިވަނީ ޚުދު ޝެއިޚް މުހައްމަދު ފަރާތުންނެވެ.
ފަނޑިޔާރުގެ ހުކުމް ބިނާ ކުރައްވާފައިވަނީ، ޕްރިންސެސް ހަޔާއަށް ދަތިކޮށް އޭނާއަށް ފުރައްސާރަ ކުރުމަށް ޝެއިޚް މުހައްމަދު މިހާރުވެސް ކުރައްވަމުން ގެންދަވާ މަސައްކަތްތަކާއި އަދި މިމަސައްކަތް ކުރުމުގައި އޭނާއަށް ލިބިގެން ގޮސްފައިވާ ގާބިލްކަމުގެ މައްޗަށެވެ. މިގޮތުން ހުކުމްގައި ފާހަގަ ކޮށްފައިވާގޮތުން މިގާބިލްކަން ޝެއިޚް މުހައްމަދަށް ލިބިގެން ގޮސްފައިވަނީ، ސަރުކާރުތަކަށް އެކަނި މެނުވީ ނުލިބޭ ބާވަތްތަކުގެ ސްޕައިވެއަރތަކުގެ ބޭނުން ކުރުމުގެ ފުރުސަތު އޭނާއަށް ލިބިގެން ގޮސްފައިވާތީއެވެ.
ފާއިތުވި އޮކްޓޯބަރުމަހު ކޯޓު ޑޮކިއުމަޓްތަކުން ހާމަވެގެން ގޮސްފައިވާ ގޮތުގައި، ޝެއިޚް މުހައްމަދުވަނީ، މިފަދަ ސްޕައިވެއަރ ބޭނުން ކޮށްގެން، ޕްރިންސް ހަޔާއާއި އޭނާގެ މުވައްޒިފުންގެ ފޯނުތައް މީގެކުރިން ހެކް ކޮށްފައެވެ.
އެތައް އަހަރަކަށް ދިގުދެމިގެން ގޮސްފައިވާ، ޝެއިޚް މުހައްމަދުއާއި ޕްރިންސެސް ހަޔާގެ ވަރީގެ މައްސަލަ މިހުކުމާއެކު ނިމުމަކާ ދިމާލަށް ދަތުރު ކޮށްފައިވާއިރު، އިނގިރޭސި ހައި ކޯޓުން ނިންމާފައިވާ ގޮތުގައި، ޕްރިންސް މުހައްމަދު ވަނީ އޭނާގެ މުއްސަދިކަމާއި އަދި ސިޔާސީ ނުފޫޒުގެ ބޭނުންކޮށްގެން، 47 އަހަރުގެ ޕްރިންސް ހަޔާގެ އަނގަ ބަންދު ކުރުމަށް މަސައްކަތް ކޮށް އަދި ހަނގާވެސް ކޮށްފައެވެ.
އެހެންނަމަވެސް ޝެއިޚް މުހައްމަދު ވަނީ މި ހުރިހާ ތުހުމަތުތައްވެސް ދޮގު ކުރައްވާފައެވެ.
ކޮމެންޓު ފޮނުވާ