ހުރިހާ ގޮތަކުން ބެލިކަމުގައި ވީނަމަވެސް، އަދުގެ ދުނިޔޭގައި އޮތް އެންމެ ވަރުގަދަ ޑިމޮކްރަސީއަކީ އެމެރިކާއެވެ. ސިޔާސީ ގޮތުންނާއި އިގްތިސާދީގޮތުން ވެސްމެއެވެ. އަދި އެގައުމުގަ ބޭއްވޭ ރިޔާސީ އިންތިޚާބުތަކުގައި ކުރެވޭ ކެމްޕޭތަކާއި އަދި ކެޕޭން ނިމި، ދައުރެއް ފުރިހަމަކޮށް ބާރުތައް ނަގުލު ކުރުމުގައި އެގައުމުގަ ގާއިމް ވެފަ އޮތް ޑިމޮކްރަޓިކް އުސޫލުތަކަކީ އެމެރިކާގެ ކުރިއެރުމާއި ތަރައްގީގެ ހަގިގީ ބިންގާ ކަމުގައި ގަބޫލުކުރަން ޖެހެއެވެ.
އެހެންނަމަވެސް، އެމެރިކާގެ އެތައް ޒަމާނެއްވީ ޑިމޮކްރަސީއަކީ އެތައް ގޮންޖެހުންތަކާއި މިހާތަނަށް އައިއިރު ކުރިމަތިލާ، އެހެންނަމަވެސް އެގޮންޖެހުންތަކުންވެސް އޭގެތަބުތަކަށް ލޮޅުމެއް ނާރާ އޮތް ވަރުގަދަ ޑިމޮކްރަސީއެކެވެ. އެގައުމުން ކޮށްފައިވާ ހަގުރާމަތަކާއި، ޓެރަޒިމާއި ދެކޮޅަށް ކުރެވުނު އެނޫން މަސައްކަތްކަތްކާއި އަދި، ޚިޔާލު ތަފާތވުން ބޮޑެތި އިންތިޚާބުތަކުގައިވެސް ޚިޔާލު ތަފާތުވުންތައް ދޫކޮށް އެމެރިކާގެ ސިޔާސީ މަސްރަހުގެ ތެރެއިން ހައްލު ހޯދާފައި އެބަހުއްޓެވެ.
މިގޮތުން، މިހާތަނަށް އެމެރިކާގައި ބޭއްވުނު ގިނަ ރިޔާސީ އިންތިޚާބުތަކުގެ ނަތީޖާ ނިމިގެން ގޮސްފައިހުރީ މާބޮޑެތި ހަމަނުޖެހުންތަކެއް ހިގުމަކާއި ނުލާ އަދި، ޚިޔާލު ތަފާތުވުންތަކެއްވެސް ނުއުފެދި، ހަމަހިމޭންކަމާއި އެކުއެވެ.
ފާއިތުވެދިޔަ ތަނުގައިވެސް އެމެރިކާގެ ރިޔާސީ އިންތިޚާބުތަކުގައި ދެކެޑިޑޭޓުންގެ މެދުގައި ދެބަސްވުން އުފެދި ގަދަ ހިފުމަކާއި ހަމައަށް ގޮސްފައި އެބަހުއްޓެވެ.
މިސާލަކަށް ދެހާސްވަނަ އަހަރުގެ ރިޔާސީ އިންތިޚާބެވެ. ރައީސް ބިލް ކުލިންޓަންގެ ދައުރުގެ ނާއިބު ރައީސް އަލްގޯއާއި އެއަހަރުގެ ރިޔާސީ އިންތިޚާބުގައި ވާދަކުރެއްވީ ސީނިއަރ ބުޝްގެ ދަރިކަލުން ޖޯޖް ޑަބްލިއު ބުޝްއެވެ. އެއަހރުގެ ރިޔާސީ އިންތިޚާބުގައި އެންމެ ގިނަ ވޯޓު އަލްގޯ ހޯއްދެވި ނަމަވެސް، އިލެކްޓޯރަލް ވޯޓުން ކުރި ހޯއްދެވީ ބުޝްއެވެ. ބުޝް އިންތިޚާބު ކާމިޔާބު ކުރެއްވީ އަލްގޯއަށްވުރެ ފަސްލައްކައަށްވުރެ ގިނަ ވޯޓު މަދުން ހޯއްދަވައިގެންނެވެ. އެހެންނަމަވެސް، ނަތީޖާއާއި ހަމައަށް އަންނަން ޖެހުނީ އެގައުމުގެ ސުޕްރީމް ކޯޓަށް މައްސަލަ ހުށަހަޅާ ސުޕްރީމް ކޯޓުގެ ހުކުމަކާއި ހިސާބުންނެވެ.
އެހެން ހުރިހާ އަހަރުތަކާއި މިއަހަރުގެ އެމެރިކާގެ ރިޔާސީ އިންތިޚާބުގަ ތަފާތުތަކެއް އެބަހުއްޓެވެ. މިއިންތިޚާބުގައި ވާދަކުރައްވާ އެމެރިކާގެ ރައީސް ޑޮނަލްޑް ޓްރަމްޕަކީވެސް މުޅި އެމެރިކާގެ ތާރީޚުގައިވެސް އެގައިމުގައި ވެރިކަން ކުރައްވާ އެންމެ ތަފާތު ބޭފުޅާކަންވެސް ގިނަ ފަރާތްތަކުން ފާހަގަކުރައްވައެވެ. ޓަރަމްޕް ވަނީ އެނާގެ ދައުރުގައި އެމެރިކާގެ ވެރިކަމުގެ ނިޒާމުގައި އެގައުމުގެވެރިން ބަލައިގެންފަވީ އެތަކެއް އުސޫލުތަކެއް މުގުރާލައްވާ އޭނާ ގަބޫލުރައްވާ އެތަކެއް ހަމަތަކެއްގެ މަތިން ވެރިކަން ކުރައްވާފައެވެ.
އަދި މި އެންމެހާ ކަންކަމުގެ މައްޗަށް، މިއަހަރުގެ ރިޔާސީ އިންތިޚާބު އެމެރިކާގެ ރައްޔިތުންނާއި ބައްދަކުރީ މުޅި ދުނިޔެ އިންސާނީ ބަލިމަޑުކަމެއްގެ ކާރިސާއެއްގެ ތެރޭގައި ވަނިކޮށެވެ. ވަކީން ޚާއްސަކޮށް، އެމެރިކާގެ ނުވަ މިލިއަން މީހުންނަށް ކޯވިޑް ރޯގާޖެހި، ދެލައްކައަށްވުރެ ގިނަ އެމެރިކާގެ ރައްޔިތުން މިބަލީގަ މަރުވެ ގޮސްފައިވަނިކޮށެވެ. ކޯވިޑް ރޯގާގެ ސަބަބުން އައި އިގްތިސާދީ ގޮންޖެހުންތަކުގައި އެމެރިކާގެ އިގްތިސާދު އެތައް އަހަރެއްގެ ތެރޭގައި ހޯދި ކުރިއެރުންތައް ގެއްލި، އިންތިހާއަށް ހީނަރު ވެފައިވާ ދަޑިވަޅެއްގައެވެ.
އަދި ގައުމު މިހުރިހާ ގޮންޖެހުމެއްގެ ތެރޭގައި ވަނިކޮށް އެމެރިކާގެ ނަސްލީ ތަފާތު ކުރުންތަކާއި ދެކޮޅަށް ކަޅު ނަސްލުގެ އެގައުމުގެ ރައްޔިތުން ތެދުވެ، އެމެރިކާގައި ބޮޑެތި މުޒާހިރާތައްވެސް ކޮށްފައިވަނީ މިދަޑިވަޅާއި ދިމާކޮށެވެ.
ކޮންމެއަކަސް މިހުރިހާ ގޮންޖެހުންތަކުގެ މައްޗަށް، ޑޮނަލް ޓްރަމްޕް ފެށުނީއްސުރެ ވިދާޅުވަމުން ގެންދެވީ، އެމެރިކާގެ މިއަހަރުގެ ރިޔާސީ އިންތިޚާބުގައި އޭނާ ބަލިކުރުމަށްޓަކާ، އިންތިޚާބުގައި މަކަރުހެދުމަށް ތައްޔާރުވަމުންދާކަމުގައެވެ. އަދި ކޯވިޑް ރޯގާއާއި ހެދި، ދުރާލާ ވޯޓުލުމަށް މުވައްސަސާތަކުން ކުރަމުން އައި އިލްތިމާސްތަކަށް ޓްރަމްޕް ގެންދެވީ ފާޅުގައި ދެކޮޅު ހައްދަވަމުންނެވެ.
އިންތިޚާބުގައި ވޯޓު އޮޅުވާލުމަށް މަސައްކަތް ކޮށްފައިވާކަން ސާބިތު ކޮށްދިނުމަށް ދެއްކޭނެ ހުރިހާ ހުއްޖަތަކަށް ޓްރަމްޕް ގެންދެވީ ތައްޔާރު ވެވަޑައިގަންނަވަމުންނެވެ. އަދި އިންތިޚާބުގެ ކުރިން، ތަކުރާރުކޮށް ވިދާޅުވަމުން ގެންދެވީ އިންތިޚާބުގެ ނަތީޖާ ކޮންމެ ކޮންމެ ހާލަތެއްގައި ގަބޫލު ނުކުރައްވާނެ ކަމަށެވެ.
ނަތީޖާއެއްގެ ގޮތުން ރިޔާސީ އިންތިޚާބުގެ ނަތީޖާ ގަބޫލު ނުކޮށް، ވައިޓް ހައުސް ދޫކޮށް ވަޑައި ނުގަންނަވަން ޓްރަމްޕް މަސައްކަތް ކުރައްވައިފި ހާލަތެއްގައި އެގައުމުގެ އަސްކަރިއްޔާއިން އަމަލު ކުރާނޭގޮތަކާއިމެދު ގޮތްކިޔަން އަސްކަރިއްޔާއަށް ވެސް މަޖުބޫރުވެގެން ދިޔައެވެ.
މިއަދު އެމެރިކާގެ ރައްޔިތުން މިވަނީ އެގައުމުގެ ރިޔާސީ އިންތިޚާބުގައި ވޯޓު ލާފައެވެ. ދެކެޑިޑޭޓުންވެސް އިންތިޚާބުގައި ވާދަކޮށްފައި މިވަނީ ގިނަ ފަރާތްތަކުން ކުރިން ލަފާކޮށްފައިވާ މިންވަރަށްވުރެވެސް ވާދަވެރިކޮންނެވެ. އަދި ކުރިން ހީކުރި ވަރަށްވުރެ ގިނަ އަދަދަކަށް ޕޯސްޓު މެދުވެރިކޮށް އެމެރިކާގެ ރައްޔިތުން މިވަނީ އިންތިޚާބުގައި ވޯޓުވެސް ލާފައެވެ.
ސަތޭކަ މިލިއަނަށްވުރެ ގިނަމީހުން މިއަހރުގެ ރިޔާސީ އިންތިޚާބުގައި ޕޯސްޓު މެދުވެރިކޮށް ވޯޓު ލާފައި ވެއެވެ.
ނަޖީއެއްގެ ގޮތުން ރިޔާސީ އިންތިޚާބުގެ ނަތީޖާ އިއުލާންކޮށް ނުނިމެނީސް، ޓްރަމްޕް މިވަނީ ރައްޔިތުންނާ މުޚާތަބުކޮށް، ނަތީޖާ ގަބޫލު ނުކުރައްވާނެކަން އިއުލާނު ކުރައްވާފައެވެ. އަދި ޑިމޮކްރަޓިކް ޕާޓީން އިންތިޚާބު ވަގަށް ނަގަން މަސައްކްތަ ކުރަމުންދާ ކަމަށްވެސް ވަނީ ތުހުމަތު ކޮށްފައެވެ.
މިހުރިހާ ތުހުމަތުތަކާއެކު، އިންސާފު ހޯދުމަށް އެގައުމުގެ ސުޕްރީމް ކޯޓަށް ވަޑައިގަންނަވާނެ ކަމުގެ އިންޒާރުވެސް އިއްޔެ ޓްރަމްޕް ވަނީ ދެއްވާފައެވެ.
ހުރިހާ ކަމެއްގަވެސް ދޫނުދެއްވާ، ގޮތުގަ ހިފަހައްޓަވާ ޓްރަމްޕްގެ މިއިންޒާރާއެކު، އެމެރިކާގެ ރިޔާސީ އިންތިޚާބުގެ ނަތީޖާ އަވަސް މުއްދަތެއްގައި ނެރެވިދާނެކަމާއިމެދު މިއަދު މިވަނީ ޝައްކު އުފެދިފައެވެ. އަދި ކޯޓު ހުކުމަކުން މެނުވީ ޓްރަމްޕް ވައިޓް ހައުސްއިން ނިކުމެ ވަޑައިނުގަންނަވާނެކަންވެސް މިވަނީ ޔަގީންވެފައެވެ.
އެމެރިކާގެ ރައީސްއަކީ އެގައުމުގެ ކޮމާންޑާރ އިން ޗީފްވެސްމެއެވެ. އެމެރިކާގެ ދައުލަތާއި ދެކޮޅަށް އެގައުމުގެ އެތެރެއާއި ބޭރުން އަންނަ ކޮންމެ ލޮޅުމަކުން ދައުލަތް ސަލާމަތްކުރުމުގެ ޒިންމާއާއި މަސްއޫލިއްޔަތު އެގައުމުގެ އަސްކަރިއްޔާއިން އުފުލާނެއެވެ.
އިއްޔެވެސް، މިއަދުވެސް ޓްރަމްޕް ދައްކަވަމުން ގެންދަވަނީ އެއްވާހަކައެކެވެ. ހުންނެވީ ވެރިކަން ދޫކުރައްވަން ތައްޔާރުވެވަޑައިގެން ނޫންކަމުގެ ވާހަކަތަކެވެ. ސާބިތު ހެއްކެއް ދެއްކެވުމެއް ނެތި، ހުއްޖަތް ގާއިމް ކުރައްވަނީ އިންތިޚާބުގައި ބޮޑެތި މަކަރުތައް ހަދާފައިވާ ކަމުގެ ވާހަތައް ދައްކަވައިގެންނެވެ. އެހެންނަމަވެސް އަދި އެގެން ނެތް ކަމަކީ މިގޮތުގައި ޓްރަމްޕް ވަޑައިގަންނަވާނީ ކިހާ ދުރުމިނަކަށް ކަމެވެ.
ނަތިޖާއެއްގެ ގޮތުން، އެމެރިކާގެ ޑިމޮކްރަސީގެ އެންމެ މުހިންމު އަސާސްކަމުގައިވާ ވެރިކަމުގެ ބާރުތައް ސުލްހަވެރިކަމާއި އެކު ނަގުލް ކުރުމުގެ މުހިންމު ބިނާ މި އިންތިޚާބާ ހަމައިން ފުޑުފުޑުވެގެން ހިގައިދާނެކަމުގެ ބިރު މިވަނީ ހީވެފައެވެ.
ގަދަކަމުން ޓްރަމްޕް ވެރިކަމުން ބާލަން ޖެހިދާނެފަދަ ހާލަތެއްވެސް އަތުވެދާނެކަމަގެ ހީތައްވެސް ބައެއްފަރަތަކުން މިއަދު މިވަނީ ކުރަން ފަށާފައެވެ. މުޅި އެމެރިކާގެ ވެރިކަމުގެ ނިޒާމު ގަޑުބަޑުވެގެން ހިގައިދާނެ ކަމުގެ ބުރި މިވަނީ ހީވެފައެވެ.
ޑިމޮކްރްސީގެ ޗެމްޕިއަނުން ކަމުގައި ދައުވާކޮށް، އެހެން ގައުމުތަކުގައި ޑިމޮކްރަސީ އުސޫލުތައް ދަމަހައްޓަން ވަކާލާތުކުރާ އެމެރިކާގެ ޑިމޮކްރަސީއަށް މިއަދު މިވަނީ ޑިމޮކްރަސީގެ ހަގިގީ އިމްތިހާނަކާއި ކުރިމަތި ލާން ޖެހިފައެވެ.
