ނިޝާން ޢިއްޒުއްދީންގެ ޢިއްޒަތުގެ ވެރިޔާ ޢުމަރު ޒާހިރަކީ މުޅި އުމުރު ދަޢުލަތަށް ޚިދުމަތް ކުރެއްވުމުގައި ހޭދަކުރެއްވި ވިޝަނަރީ ލީޑަރެއް ކަމުގައި މޯލްޑިވްސް ނޭޝަނަލް ޕާޓީ (އެމްއެންޕީ) އިން ބުނެފިއެވެ.
އުމަރު ޒާހިރު އަވަހާރަ ވުމާއި ގުޅިގެން އެމްއެންޕީން ނެރުނު ބަޔާނެއްގައި ބުނެފައިވަނީ ޤައުމަށް ގިނަގުނަ ޚިދުމަތްތަކެއް ކޮށްދެއްވާފައިވާ ނިޝާން ޢިއްޒުއްދީންގެ ޢިއްޒަތުގެ ވެރިޔާ އޮނަރަބަލް ޢުމަރު ޒާހިރަކީ ދިވެހި ދަޢުލަތާއި ސަރުކާރުގެ އެތައް މަޤާމެއް ފުރުއްވާ، ޤައުމަށް ނުހަނު އިޚްލާސްތެރި މަސައްކަތްތަކެއް ކޮށްދެއްވާފައިވާ ޚިދުމަތްތެރި ބޭފުޅެއްކަމަށެވެ.
އޮނަރަބަލް ޢުމަރު ޒާހިރު ފާހަގަކުރެވިގެން ދިޔައީ ވިޝަނަރީ ލީޑަރެއްގެ ގޮތުގައި، އޭގެ އިތުރުން ޒުވާނުންނަށް ނަމޫނާ ދެއްކެވި މަދަދުގާރެއްގެ ގޮތުގައި ކަމަށާއި، އަދި ރާއްޖޭގެ ތަރައްޤީގެ ބޮޑެތި މަޝްރޫއުތަކުގައި ޚިއްޞާ ބޮޑު، މުޅި އުމުރު ދަޢުލަތަށް ޚިދުމަތް ކުރެއްވުމުގައި ހޭދަކުރެއްވި ބޭފުޅެއްގެ ގޮތުގައެވެ.
މޯލްޑިވްސް ނެޝަނަލް ޕާޓީގެ ފަރާތުން އޮނަރަބަލް ޢުމަރު ޒާހިރު އަވަހާރަވި ޚަބަރު އެހީ ނުހަނު ފުން ހިތާމައާއެކުގައެވެ. އޮނަރަބަލް ޢުމަރު ޒާހިރު އަޅުގަނޑުމެންނާ ވަކިވެގެން ދިއުމަކީ މުޅި ޤައުމަށް ލިބުނު ފޫނުބެއްދޭވަރުގެ ގެއްލުމެއް ކަމުގައި މިޕާޓީން ދެކެން. އަދި މިފުން ހިތާމައިގައި އެމްއެންޕީގެ ހުރިހާ މެންބަރުން ބައިވެރިވަން. އަދި މަރްހޫމްގެ ފުރާނައަށް ސުވަރުގޭގެ ދާއިމީ ނިޢުމަތް މިންވަރުކުރައްވާ، މިހިތާމަވެރި ދަނޑިވަޅުގައި މަރްހޫމްގެ ޢާއިލާއާއި އެކުވެރިންނަށް ކެތްތެރިކަން ދެއްވުން އެދި މާތް ﷲ ގެ ހަޟްރަތުގައި ދުޢާ ދަންނަވަން.
– އެމްއެންޕީން ބުނެފައިވެއެވެ.
އުމަރު ޒާހިރު އަވަހާރަވީ ކޯވިޑް-19ގެ އާލާސްކަންފުޅަށް ދަރުމަވަންތަ ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށް މިއަދު މެންދުރު 2 ޖަހާ އެހާކަށްހާއިރު ކަމަށް އެޗްޕީއޭއިން ހާމަކުރައްވައެވެ.
ޢުމަރު ޒާހިރު ކޯވިޑަށް ޕޮޒިޓިވްވެފައިވާކަން އެނގުނީ މީގެ ދެހަފްތާއެއްހާ ދުވަސް ކުރިން ކޯވިޑަށް ޓެސްޓްކުރެއްވުމުންނެވެ. ޢުމަރު ޒާހިރުގެ ޢާއިލާއިން މީގެ ކުރިން މަޢުލޫމާތު ދެއްވިގޮތުގައި އެމަނިކުފާނުގެ އަމިއްލަފުޅު ޚަރަދުގައި ފުވައްމުލަކުގައި ބިނާކުރެއްވި މިސްކިތް ހުޅުވުމަށް އެރަށަށް ކުރެއްވި ދަތުރުފުޅަށްފަހު އެނބުރި މާލެވަޑައިގެންވި ފަހުން އުޅުއްވީ އާލާސްކަންފުޅާއެވެ. ގަދަ ހުމުގެ އާލާސްކަންފުޅެއް ޖެހި، ހިންގަވައި އުޅުއްވުމަށްވެސް އެމަނިކުފާނަށް އުނދަގޫފުޅުކަމަށް ޢާއިލާއިން ކުރިން މަޢުލޫމާތު ދެއްވާފައިވެއެވެ. އަދި އެމަނިކުފާނުގެ ހާލުކޮޅު އިތުރަށް ގޯސްވެ، ދަރުމަވަންތަ ހޮސްޕިޓަލުގައި ފަރުވާ ދޭން ފަށާފައިވަނީ މިމަހުގެ 14ވަނަ ދުވަހުއެވެ.
