އިތުރު އަހަރަކަށް ޓިއުނީޝިއާގެ ގާނޫނު ހަދާ މަޖިލިސް ސަސްޕެންޑް ކުރުމަށް އޭނާ ދެކޮޅު ހައްދަވާފައިވާކަމަށް، ގާނޫނުހަދާ މަޖިލިހުގެ ރައީސް ރަޝީދު ގަނޯޗީ ވިދާޅުވެއްޖެއެވެ.
ޓީއުނީޝީއާގެ އެންމެ ބޮޑު ސިޔާސީ ޕާޓީ ކަމުގައިވާ އެއްނަހުދާ ޕާޓީގެ ލީޑަރު ގަނޯޗީ އޭނާގެ ފޭސްބުކް ޕޭޖުގައި ލިޔުއްވާފައިވާ ގޮތުގައި، ޓިއުޝީއާއަށް މިހާރު ކުރިމަތިވެފައިވާ ސިޔާސީ ކާރިސާއިން ސަލާމަތް ވެވެން އޮތް ހަމައެކަނި ގޮތަކީ، އެގައުމުގެ ރައީސް އަޅުއްވާފައިވާ ޚާއްސަ ފިޔަވަޅުތަކަށް ވަގުތުން ވަގުތަށް ނިމުން ގެނައުން ކަމުގައެވެ.
މި ޑިސެމްބަރު މަހުގެ 13 ވަނަ ދުވަހު ޓިއުނީޝިއާގެ ރައީސް ކައިސް ސައީދު ވިދާޅުވެފައިވަނީ އެގައުމުގެ ގާނޫނު އަސާސީ އިސްލާހު ކުރުމަށްޓަކާ އަންނަ އަހަރުގެ ޖުލައިމަހު އޭނާ އާންމު ފެންނަ ނުފެންނަ ވޯޓެއް ބައްވާނެ ކަމަށެވެ.
އަދި އެއަށްފަހު އަންނަ އަހަރު ފަހުކޮޅު އާ ގާނޫނުހަދާ މަޖިލިހެއް އިންތިޚާބު ކުރުމަށް މަޖިލިސް އިންތިޚާބު ބާއްވާނޭކަމަށްވެސް އޭނާ ވިދާޅުވެފައި ވެއެވެ.
ޓިއުނީޝިއާގެ ގާނޫނުހަދާ މަޖިލިސް ސަސްޕެންޑްކޮށް، އެގައުމުގެ ބޮޑުވަޒީރު، މަގާމުން ދުރުކޮށް، އަދި ވެރިކަމުގެ ގިނަ ބާރުތައް އަމިއްލަ އަޔްޕުޅަށް ނެންގެވިތާ 2 މަހެއްހާ ދުވަސްފަހުން، މިއަހަރުގެ ސެޕްޓެމްބަރު މަހުގެ 29ވަނަ ދުވަހު ރައީސް ކައިސް ސައީދު ވަނީ އެގައުމުގެ ފުރަތަމަ އަންހެން ބޮޑުވަޒީރުގެ ގޮތުގައި ރޮމްދާން އައްޔަން ކުރައްވާފައެވެ.
އަލަށް ބޮޑުވަޒީރުކަމަށް އައްޔަން ކުރެވުނު ރޮމްދާންއަކީ ސިޔާސީ ގޮތުންވެސް އަދި އެނޫން ގޮތަކުންވެސް މިހާތަނަށް ސަރުކާރުގެ އިސް މަގާމެއް ފުރުއްވާފައިވާ ބޭކަނބަލެއް ނޫނެވެ. އަދި އޭނާ އަށް ލިބިވަޑައިގެންފައިވާ ތަޖުރިބާއަކީ، އެގައުމުގެ އެޑިއުކޭޝަން މިނިސްޓްރީގައި، ވާލްޑް ބޭންކުގެ ޕްރޮޖެކްޓްތައް ތަންފީޒުކުރަން އިސް މީހެއްގެ ގޮތުގައި ހުންނަވައިގެން ލިބިވަޑައިގެންފައިވާ ތަޖުރިބާއެކެވެ. އަދި އޭނާއަކީ ޖޮއިލޮޖިކަލް އިންޖިނިއަރެކެވެ.
ރައީސް ސައިދު ގާނޫނު ހަދާ މަޖިލިސް ސަސްޕެންޑްކޮށް، ގައުމު ހިންގުމުގެ ހުރިހާ ބާރެއް ނެންގެވި ނެންގެވުން އިދިކޮޅު ފަރާތްތަކުން ސިފަ ކޮށްފައިވަނީ އޭނާ ގެންނެވި ބަޢާވާތެއްގެ ގޮތުގައެވެ.
އެހެންނަމަވެސް ކައިސް ސައީދު ވިދާޅުވެފައިވަނީ، ގައުމު ފުން އަދަވަޅަކަށް ވެއްޓިގެން ދިއުމުން ސަލާމަތް ކުރެއްމަށް އެއީ އޭނާއަށް ނިމަވަން މަޖުބޫރު ނިންމެވުންތަކެއް ކަމުގައެވެ.
އަދި، މި ނިންމެވުމާއެކު، އެގުމުގެ ގާނުނުހަދާ މަޖިލިހުގެ މެމްބަރުންނަށް ލިބިފައިވާ ހުރިހާ އިމްތިޔާޒެއްވެސް މުއްދަތެއް ނެތްގޮތަށް ސަސްޕެންޑް ކޮށްފައި ބޭއްވުމަށްވެސް ރައީސް ސައީދު ނިންމަވާފައިވާ ކަމަށްވެސް ޓިއުނީޝިއާގެ ރައީސް އޮފީހުން ހާމަ ކޮށްފައިވެއެވެ.
މިހާރުގެ ރައީސް ސައީދުއަކީ، 2019ގެ ޓިއުނީޝިއާގެ ރިޔާސީ އިންތިޚާބުގައި ވާދަކުރުމުގެ ޝައުގުވެރިކަން އެންމެ ފުރަތަމަ ފާޅުކުރެއްވި ކެނޑިޑޭޓޭވެ. އޭނާ އެ އިންތިޚާބުގައި ވާދަކޮށްފައިވަނީ އެއްވެސް ސިޔާސީ ޕާޓީއަކާއި ގުޅިވަޑައިގެނެއް ނޫނެެވެ. ނަތީޖާއެއްގެ ގޮތުން، ސިޔާސީ ފަރާތްތަކުގެ ޗަރުކޭސްތަކުގެ މަތިން ފޫހިވެފައިވާ އެތަކެއް ރައްޔިތުންނެއްގެ ތާއީދު އޭނާއަށް ލިބިގެން ދިޔައެވެ.
އަދި ވަކީން ޚާއްސަކޮށް، ޓިއުނީޝިއާގެ ޒުވާން އާބާދީގެ ބޮޑު އިންސައްތައެއްގެ ތާޢީދުވެސް އޭނާއަށް އެ އިންތިޚާބުގައި ލިބިގެން ގޮސްފައި ވާކަން ފާހަގަ ކޮށްލެވެއެވެ.
