ޔޫކުރެއިންވެސް ހިމެނޭ ގޮތުން، ސޯވިއެޓް ޔޫޔިއަންގައި ކުރިން ހިމެނުނު ގައުމުތަށް ނޭޓޯގައި ބައިވެރިކުރުން މަނާ ކުރުމަށާއި އަދި ޔޫރަޕްގެ ގައުމުތަކުގެ ފައިޖުތަކާއި ހަތިޔާރުތައް ރަޝިއާގެ އަވައްޓެރި އެހެން ގައުމުތަކުގައި ގާއިމް ނުކުރުމަށް ޑިމާންޑްކޮށް ރަޝިއާއިން ތައްޔާރު ކޮށްފައި ޑްރާފްޓް ސެކިއުރިޓީ ފައިލް ހުކުރުދުވަހު އާންމު ކޮށްފިއެވެ.
އެމެރިކާއާއި އަދި އެމެރިކާގެ އެކުވެރި ގައުމުތަކަށް ފާއިތުވެދިޔަ ހަފްތާގައި ރަޝިއާއިން ހުށަހަޅާފައިވާ މި ލިޔެކިޔުން ތަކުގައިވާ ގޮތުން، ދެގައުމަށް އަސްކަރީ ހަމަލާ ދެވޭ ހިސާބުގައި ވާ ހިސާބުތަކަށް އެމެރިކާއާއި ރަޝިއާއިން އަސްކަރީ މަނަވަރުތަކާއި ފައިޓަރޖެޓްތައް ނުފޮނުވުމާއި، އަދި އޭގެ އިތުރުން ރަޝިއާގެ ބޯޑަރު ކަރިން، އެމެރިކާގެ އެކުވެރި ގައުމުތަކުގެ ފައުޖުތައް ދުރަށް ޖެއްސުންވެސް ހިމެނެއެވެ.
މި ޑިމާންޓްތަކުގެ ތެރޭގައި، ޔޫކުރެއިންގެ ނޭޓޯގެ މެމްބަރޝިޕާ ގުޅޭގޮތުން ރަޝިއާގައި ވޯޓެއް ނެގުމަށް ގައުމަތަކުން އެއްބަސްވުމަށްވެސް ހުށަހަޅާފައި ވެއެވެ. މިއީ ހުޅަނގުގެ ގައުމުތަކުން މީގެ ކުރިންވެސް ފާޅުގައި ދެކޮޅު ހަދާފައިވާ ކަމެކެވެ.
ނޭޓޯގެ ސެކެޓްރީ ޖެނެރަލް ހުކުރު ދުވަހު ވިދާޅުވެފައިވާ ގޮތުގައި، މޮސްކޯއާއެކީ ސަލާމަތީ ކަންކަމާ ގުޅޭގޮތުން ކުރެވޭ މަޝްވަރާއެއްގައި ނޭޓޯގެ ކަންބޮޑު ވުންތަކާއި އަދި އޭގެ އިތުރުން ޔޫކުރެއިންއާއި އަދި އެނޫން އެކުރެވި ގައުމުތަށް ހިމެނުން ވެގެންދާނީ މުހިންމު ކަމަކަށެވެ.
ރަޝިއާގެ ޑިމާންޑްތަކާ ގުޅޭގޮތުން ވައިޓް ހައުސްއިން ބުނެފައިވަނީ، ރަޝިއާގެ ޕްރޮޕޯސަލާ ގުޅޭގޮތުން އެކުވެރި ގައުމުތަކާއެކީ އެގަމުން މިހާރުދަނީ މަޝްވަރާ ކުރަމުން ކަމުގައެވެ. އެހެންނަމަވެސް، ހުރިހާ ގައުމަކަށްވެސް، ބޭރުގެ ބާރެއްގެ ބައިވެރިވުމާ ނުލާ އަމިއްލަ އިޚްތިޔާރުގައި އެގައުމެއްގެ މުސްތަގުބަލް ކަނޑައެޅުމުގެ ބާރު ލިބިގެން ވާކަމަށްވެސް ވައިޓް ހައުސްއިން ބުނެފައި ވެއެވެ.
ރަޝިއާއިން ތައްޔާތު ކޮށްފައިވާ ޑިމާންޑްތަކުގެ ޑްރާފް އާންމު ކޮށްފައިމިވަނީ، ޔޫކްރެއިންގެ ބޯޑަރު ކައިރިއަށް ރަޝިއާގެ އެތައް ހާސް ސިފައިންނަކާ އަދި ބަރު ހަތިރާރު ޖަމާކުރަމުން ދަނިކޮށެވެ. އަދި ޔޫކުރެއިންއާއި ހުޅަގުގެ ގައުމުތަކުން ދަނީ ރަޝިއާއިން ޔޫކްރެއިންއަށް އެރުމަށް ރާވަމުންދާކަމަށް ތުހުމަތު ކޮށްފައެވެ. މި ތުހުމަތުތަކާ ރަޝިއާއިން ވަނީ ދެކޮޅު ހަދާފައެވެ.
އެހެންނަމަވެސް ޔޫކްރެއިންއާއި އަދި ރަޝިއާގެ އަވައްޓެރި ގައުމުތަކަށް ނޭޓޯ ފުޅާވެގެން ދިޔަ ނުދޭނެ ކަމުގެ ޔަގީންކަން ގާނޫނީގޮތުން ދިނުމަށް ރަޝިއާއިންވަނީ މީގެ ކުރިންވެސް ޑިމާންޑް ކުރަމުން އައިސްފައެވެ. އަދި ހަމަ އެއާއެކު، އެގައުމުތަކުގައި ނޭޓޯގެ އަސްކަރީ ހަތިޔާރުތައް ނުބެއްހެއްޓުމަކީވެސް ރަޝިއާގެ ޝަރުތެކެވެ.
ރަޝިއާގެ ޑެޕިއުޓީ ފޮރިންގ މިނިސްޓަރ ސާރގީ ރައިބްކޯވް ވިދާޅުވެފައިވަނީ، އެމެރިކާ އަދި ނޭޓޯއާއިއެކު ރަޝިއާއިން ދަމަހައްޓަމުންއައި ގުޅުން މިހާރު ނުރައްކާތެރި ހާލަތަކަށް ގޮސްފައިވާ ކަމުގައެވެ. އަދި އަދި އޭނާ ވިދާޅުވި ގޮތުގައި، ނޭޓޯގެ ފައުޖުތަކާއި އަދި ޑްރިލްތައް ރަޝިއާގެ ކައިރި ހިސާބުތަކުގައި ކުރިޔަށް ދާދިއުން މިހާރު ރަޝިއާގެ ސަލާމަތަށް އޮތް ނުރައްކަލަކަށް ވެގެން ގޮސްފައިވާ ކަމުގައެވެ.
މޮސްކޯއިން ބޭނުންވަނީ، ރަޝިއާއިން ހުށަހަޅާފައިވާ ޕްރޮޕޯސަލްއާއި ގުޅޭގޮތުން ވާހަކަދައްކަން، ޖެނީވާގައި ވަގުތުން ވަގުތަށް ފެށުމަށެވެ.
