ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމްގެ) މެންބަރުކަމަށް އައްޔަންކުރުމަށް ރުހުން ހޯއްދެވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިސްކަންދެއްވާ ތިން ބޭފުޅެއް ނަން ދިރާސާކުރުމަށް ކޮމިޓީއަށް ފޮނުއްވައިފިއެވެ.
އެޗްއާރުސީއެމްގެ މެންބަރުކަމަށް ކުރިމަތިލެއްވި މީހުންގެ ނަންތައް ބަޔާންކޮށް ރައީސުލްޖުމްހޫރިއްޔާ ފޮނުއްވާފައިވާ ސިޓީ މަޖިލީހުގެ އަމީން ޢަންމު ވަނީ މަޖިލީހުގެ ތަޅުމަށް އިއްވަވާފައެވެ. އެޗްއާރުސީއެމްގެ މެންބަރުކަމަށް އައްޔަންކުރުމަށް ފެންނަ ބޭފުޅުންނަށް ރުހުން ހޯއްދެވުމަށް ރައީސުލްޖުމްހޫރިއްޔާ ފޮނުއްވާފައިވާ ސިޓީފުޅުގައި އިސްކަންދެއްވާ ތިން ބޭފުޅުންނަކީ:
- މަރިޔަމް މުނާ/މ.ބާރަނާގެ/ ކ.މާލެ
- އަލްއުސްތާޛް އަހުމަދު ސަމީނު/ ފިނިވާގެ/ އއ.ތޮއްޑޫ
- އަލްއުސްތާޛާ މަހީރާ މުޙައްމަދު/ ހިޔާވަހި/ ޅ.ހިންނަވަރު
މި ބޭފުޅުންނަށް ރުހުން ދިނުމުގެ މައްސަލަ ދިރާސާކުރުމަށް ހިއުމަން ރައިޓްސް އެންޑް ޖެންޑަރ ކޮމިޓީއަށް ރިޔާސަތުން ވަނީ ފޮނުއްވާފައެވެ.
އެޗްއާރުސީއެމްއަށް މެންބަރުން އައްޔަން ކުރައްވަނީ ކުރިން އެކޮމިޝަނުގެ ނާއިބު ރައީސްގެ މަޤާމުގައި ހުންނެވި މުޙައްމަދު ޒާހިދު މަގާމުން ވަކިކުރުމަށް މިދިޔަ ޖުލައި މަހުގެ 22 ވަނަ ދުވަހު ރައްޔިތުންގެ މަޖިިލީހުން ފާސްކުރުމުން އޭނާގެ މަޤާމު ހުސްވުމުންނެވެ.
އެ ކޮމިޝަންގެ މެމްބަރުން މަޤާމުގެ މަސްއޫލިއްޔަތު ފުރިހަމައަށް އަދާނުކުރާ ކަމަށް ބުނެ އެމައްސަލަ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން ބަލަން ފެށްޓެވުމާއެކު އެކޮމިޝަނުގެ 3 މެންބަރަކު ވަނީ އިސްތިއުފާދެއްވާފައެވެ. އިސްތިއުފާދެއްވި ތިންބޭފުޅުންނަކީ އެ ކޮމިޝަންގެ ރައީސް އައިމިނަތު އީނާސް އާއި މެމްބަރު އައިޝަތު އަފްރީންގެ އިތުރުން މެމްބަރު މޫސާ ޢަލީ ކަލޭފާނެވެ. އަދި ކޮމިޝަނުގެ ނާއިބް ރައީސް ޒާހިދު މަޤާމުން އިސްތިއުފާ ނުދެއްވުމުން ޒާހިދުގެ އިތުބާރު ނެތްކަމަށް މަޖިލީހުން ފާސްކުރިއެވެ.
މިހާރު އެޗްއާރުސީއެމްގެ މެންބަރުކަމުގެ މަޤާމުގައި ތިއްބެވީ ކުރިން އެކޮމިޝަންގެ މެންބަރުކަމަށް އައްޔަންކުރައްވާފައިވާ ނައިވީން ޢަބްދުﷲގެ އިތުރުން މިދިޔަ ސެޕްޓެމްބަރު މަހުގެ 8 ވަނަ ދުވަހު ޢައްޔަންކުރެއްވި ސ. ފޭދޫ، ޑޯރެންސީވިލާ، އާމިނަތު ޝިފާޢަތު ޢަބްދުއްރައްޒާޤާއި، މ.ޖިއެނާ، މުއުމިނާ ވަޙީދާއި މއ.މާވެޔޮގެ، ޑރ.އަޙްމަދު އަދުހަމް ޢަބްދުﷲއެވެ. ނައިވީންގެ މެންބަރުކަމުގެ މަޤާމުން ދުރުކުރައްވާފައި ނުވަނީ އޭނާގެ މަޤާމުގެ މުއްދަތު ވަރަށް އަވަހަށް ހަމަވާނެތީއެވެ.
ކޮމެންޓު ފޮނުވާ