ދުނިޔޭގައި ހަލުވިކަމާއެކު ފެތުރެމުންދާ ކޯވިޑް-19ގެ އައު ވޭރިއަންޓް "އޮމިކްރޯން"ގެ އިތުރު ހަތަރު ކޭސް ރާއްޖެއިން ފެނިއްޖެއެވެ.
އެފްރިކާގެ ޤައުމުތަކުން ފާޅުވި އައު ވޭރިއަންޓް އޮމިކްރޯން ދުނިޔޭގެ ޤައުމުތަކަށް ހަލުވިކަމާއެކު ފެތުރެމުން އަންނައިރު ރާއްޖެއިން އޮމިކްރޯންގެ ފުރަތަމަ ކޭސް ރެކޯޑްކޮށްފައިވަނީ މީގެ ހަފްތާއެއްހާ ދުވަސްކުރިންނެވެ.
ހެލްތު އިމަޖެންސީ އޮޕަރޭޝަން ސެންޓަރުގައި ބޭއްވި ޕްރެސްކޮންފަރެންސްގައ އެޗްޕީއޭގެ އެޕިޑޮމިއޮލޮޖިސްޓް ޑރ.އިބްރާހީމް އަފްޒަލް ވިދާޅުވީ، އޮމިކްރޯންގެ އިތުރު 4 ކޭސް ރާއްޖެއިން ފެނިފައިވާކަމަށާއި، އެ ހުރިހާ އެންމެންނަކީވެސް ރާއްޖެއަށް އައި ފަތުރުވެރިންކަމަށެވެ.
ޑރ.އަފްޒަލް ވިދާޅުވީ މިހާރު ކުރިއަށްދަނީ އައު ވޭރިއަންޓާއި ގުޅިގެން ހަދާ ރިސްކް އެސެސްމަންޓްގެ މަސައްކަތްކަމަށާއި، އަޅަންވީ ފިޔަވަޅުތަކާމެދު މަޝްވަރާކުރަމުން އަންނަކަމަށެވެ. އަދި ނުކުންނަ ނަތީޖާއަށް ބަލައި ފިޔަވަޅުތައް އަޅާނެކަމަށް ޑރ.އަފްޒަލް ވިދާޅުވިއެވެ.
ސައުތް އެފްރިކާއާއި އެސަރަޙައްދުގެ ބައެއް ޤައުމުތަކުން ކޯވިޑްގެ އާ ވޭރިއެންޓް 'އޮމިކްރޯން' ފެނުމާއި ގުޅިގެން ގިނަ ޤައުމުތަކަކުން އަންނަނީ ރައްކާތެރިވުމުގެ ގޮތުން ފިޔަވަޅުތައް ވަރުގަދަ ކުރަމުންނެވެ. އެގޮތުން ޓެސްޓު ހެދުން އިތުރުކޮށްފައިވާއިރު މިވޭރިއެންޓް ފެނިފައިވާ ޤައުމުތަކުން ދަތުރުތައް ވަނީ ހުއްޓާލާފައެވެ.
ކޯވިޑްގެ އައު ވޭރިއަންޓް "އޮމިކްރޯން" އިން ރައްކާތެރިވުމަށް އަޅާ ފިޔަވަޅެއްގެ ގޮތުން އެފްރިކާ ސަރަހައްދުގެ 7 ޤައުމަކުން ރާއްޖެއަށް މީހުން އެތެރެވުން މަނާކޮށްފިއެވެ. ކޯވިޑްގެ އައު ވައްތަރެއް ދެކުނު އެފްރިކާއިން ފެނި މިއީ ކޯވިޑްގެ ކަންބޮޑުވާންޖެހޭ ބާވަތެއްގެ ވޭރިއަންޓެއްކަން ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯއިންވެސް ވަނީ ކަނޑައަޅާފައެވެ.
ރާއްޖެއަށް މީހުން އެތެރެވުން މަނާކޮށްފައިވަނީ ދެކުނު އެފްރިކާ، ނެމީބިއާ، މޮޒަންބީކް، ލެސޯތޯ، ބޮސްޓްވާނާ، ޒިންމްބާބްވޭ އަދި އެސްވަޓީނީންނެވެ. އެޗްޕީއޭއިން ކުރި އިއުލާނެއްގައި ވިދާޅުވީ ރާއްޖެ އައުމުގެ 14 ދުވަސްކުރިން މި ޤައުމުތަކަށް ދަތުރުކޮށްފައިވާ މީހުންނާއި އެއިން ޤައުމެއްގައި 12 ގަޑިއިރަށްވުރެ ގިނައިރު ޓްރާންސިޓްވެފައިވާ މީހުންނަށް މިވަގުތު ރާއްޖެއަށް އެތެރެނުވެވޭނެ ކަމަށެވެ.
ރާއްޖެއަށް މީހުން އެތެރެވުން މަނާކުރި ޤައުމުތަކުން ރާއްޖެ އަންނަ ދިވެހިންނާއި ދިވެހިންނާއި ވޯކް ޕާމިޓް އޮންނަ މީހުން ރާއްޖެއަށް އެތެރެވެ 14 ދުވަހުގެ ކަރަންޓީނު ފުރިހަމަކުރަންޖެހޭނެ ކަމަށްވެސް އެޗްޕީއޭއިން ވިދާޅުވެއެވެ. އަދި މި މީހުން ކަރަންޓީނު ދޫކޮށްލާނީ 14 ދުވަސް ފުރިހަމަކޮށް އަލުން ކޯވިޑަށް ޓެސްޓްކޮށް ނަތީޖާ ނެގެޓިވްވުމުންކަމަށްވެސް އެޗްޕީއޭއިން ބުނެއެވެ..
