އުންމީދު ކުރިވަރާއި ގާތަށްވެސް މަސައްކަތް ނުކުރެވި، ކޮރަޕްޝަނާއި ދެކޮޅަށް ސަރުކާރުން ވެފައިވާ ވައުދުތަކުގެ ނަތީޖާ ނުނެރެވޭތީ މިސަރުކާރުން އައްޔަންކުރި އެސީސީގެ މެމްބަރުންނަށް މަސައްކަތް ނުކުރެވިގެން ކަމަށް ސަރުކާރު ނިސްބަތްވާ މައި ޕާޓީ އެމްޑީޕީގެ މެމްބަރުން ވަނީ ވިދާޅުވެފައެވެ.

އޭސީސީގެ މެމްބަރުން ވަކި ކުރުމަށްޓަކައި މެމްބަރުންގެ މަސައްކަތް ހުރި ގޮތުން ބެލުމަށް ހެދި އޮޑިޓަށްފަހުން މެމްބަރުން މަޤާމުން ވަކި ކުރުމަށް ރައްޔިތުންގެ މަޖިލީހުގެ މަނިވަން މުވައްސަސާ ތަކާއި ބެހޭ ކޮމެޓީން ވަނީ ނިންމާފައެވެ. މިހާރު ކޮމިޝަންގައި ތިއްބެވި މެމްބަރުނަކީވެސް މިސަރުކާރުން ވެރިކަމަށް ވަޑައިގަތުމަށްފަހު އައްޔަން ކުރެއްވި މެމްބަރުންތަކެކެވެ. އޭސީސީގެ މިހާރު އޮތް ކޮމިޝަނަށް މަސައްކަތް ނުކުރެވިގެން، މަޖިލީހުގައި ހިމެނޭ އެމްޑީޕީގެ މެމްބަރުން ވަކީ މީގެ ކުރިންވެސް ތަކުރާރުކޮށް އިންޒާރުދީ ގަދާފައެވެ.

ކޮމިޝަންގެ މެމްބަރުން ވަކި ކުރުމަށް ކޮމެޓީން ނިންމި ނިންމުމާއިއެކު މަޖިލީހުގެ ކުއްލި ޖަލްސާއެއް ބޭއްވުމަށް މިހާރު ދަނީ ތައްޔާރު ވަމުންނެވެ. މަޖިލިސް މިއަހަރުގެ ފަހު ދައުރުގެ މަސައްކަތް ނިންމައި، ޗުއްޓީގައި އޮތް ނަމަވެސް ކޮމިޓީން އޭސީސީގެ މެމްބަރުން ވަކި ކުރުމަށް ނިންމުމަށްފަހުވެސް މަޤާމުގައި ތިބީތީ ގިނަ ބަޔަކު ވަނީ ސުވާލު އުފައްދާފައެވެ.. މިއާއިއެކު މަޖިލީހުން މިހާރު މަސައްޖަތް ކުރަމުންދަނީ ކުއްލި ޖަލްސާއެއް ބާއްވަ އޭސީސީގެ މެމްބަރުން ވަކި ކުރުމާއިމެދު ގޮތެއް ނިންމުމަށެވެ.

އޭސީސީގެ މެމްބަރުން ވަކި ކުރުމަށް ފާސްކޮށްފައިވަނީ އޭސީސީން މައްސަލަތައް ބެލުމުގައި ލަސްކަމުގެ ފާޑުކިއުންތަކާއެކު ތަކުރާރުކޮށް މިނިވަން މުއައްސަސާތަކާބެހޭ ކޮމިޓީއަށް ހާޒިރުކޮށް ޕާފޯމަންސް އޮޑިޓެއް ހެދުމަށް ފަހުއެވެ. ކޮމިޓީން ވަނީ މިއަދު އޮޓިޓަރ ޖެނެރަލްއާއިއެކުވެސް ބައްދަލުކޮށް އޮޑިޓްގެ މަސައްކަތް ކުރިއަށް ދިޔަގޮތުގެ ތަފްސީލް ދެއްވާފައެވެ. ނަމަވެސް މިބައްދަލުވުން ވަނީ ސިއްރުކޮށްފައެވެ.

އޭސީސީގެ މިހާރު ތިއްބެވި މެމްބަރުން ވަކި ކުރުމުގެ މަސައްކަތް ކުރިއަށްދާނީ މަޖިލީހުގެ ތަޅުމަށް ކޮންމެ ނަމެއް ވަކިވަކިން ހުށަހެޅުމަށްފަހު، ވަކިކުރަން ފާސްކުރާ ނަންތަން ކޮމިޓީއަށް ފޮނުވުމުން އެބޭފުޅުންގެ ތަހުގީގީ މަރުހަލާ ހިންގައިގެންނެވެ. މަޖިލީހުން ޖަލްސާތައް މިއަހަރަށް ނިންމާލާފައިވުމުން މިމަސައްކަތް ދެން ކުރިއަށްގެންދެވޭނީ އަންނަ އަހަރުގެ މަޖިލިސްގެ ދައުރު ފެށުމަށްފަހުއެވެ.

އޭސީސީގެ 5 މެމްބަރުންގެ ތެރެއިން ކޮމިޝަންގެ މެމްބަރު އަލީ އަޝްރަފް ވަނީ މަޤާމުން އިސްތިއުފާ ދެއްވާފައެވެ. ކޮމިޝަންގައި މިވަގުތު ތިބި މެމްބަރުންނަކީ ކޮމިޝަންގެ ރައީސް މަރިޔަމް ޝިއުނާ، ނައިބް ރައީސް ފާތުމަތު އަނޫލާ އަދި މެމްބަރު އިބްރާހިމް ޝަކީލްގެ އިތުރުން ޢާއިޝަތު ޢަބްދުﷲއެވެ.

އޭސީސީގެ މެމްބަރުން ވަކި ކުރުމަށް މަސައްކަތް ފަށާފައިވާއިރު، މިސަރުކާރުގެ "ޒީރޯ ކޮރަޕްޝަން" ސިޔާސަތުގެ ދަށުން މިހާތަނަށް މާއެދެވޭ ނަތީޖާތަކެއް ހާސިލް ކުރެވިފައި ނުވާކަމަށްބުނެ ގިނަ ބައެއްގެ ފާޑުކިޔުންވަނީ ސަރުކާރަށް އަމާޒުވެފައެވެ. ޚާއްސަކޮށް، އެމްއެމްޕީއާރުސީގެ ކޮރަޕްޝަނާއި، މިސަރުކާރުގެ ތެރެއިން ހިގަމުންދާ ބޮޑެތި ކޮރަޕްޝަންގެ މައްސަލަތައް ނުބެލި ދައުވާ ކުރުން ލަސްވާތީ ގިނަ ބައެއްގެ ފާޑުކިޔުންވަނީ އަމާޒުވެފައެވެ.

ކޮމިޝަންގެ މެމްބަރުން ވަކި ކުރުމަށް މަސައްކަތް ކުރަމުންދާއިރު، މިހާރު އުފެދޭ އެންމެ ބޮޑު ސުވާލަކީ މިހާރު އޮތް ކޮމިޝަން ބަދަލު ކުރުމަކުން ނަތީޖާ ނެރެވިދާނެތޯއެވެ. ނުވަތަ ކުރިއަށް އޮތް ދެ އަހަރުގެ ތެރޭގައި މިހާރު އޭސީސީގައި ހުރި މައްސަލަތައް ނިންމައި އެމްޑީޕީގެ މެމްބަރުން އެދޭ މިސްރާބަށް ކަންކަން ބަދަލު ކުރެވިދާނެތޯއެވެ. މިސުވާލުތަކުގެ ޖަވާބު އޭސީސީގެ މިހާރުގެ ރައީސާ ވަނީ ދެއްވާފައެވެ.

ވިދާޅުވެފައިވަނީ ކޮމިޝަނަށް މިނިވަން ކަމާއިއެކު މަސައްކަތް ކުރެވޭނެ މާހައުލެއްނެތި އެހެން ކޮމިޝަނެއް އައި ކަމުގައިވީނަމަވެސް ނަތީޖާ ނުނެރެވޭނެކަމަށެވެ.