ދެކުނު އެފްރިކާގެ ރައީސް ސިރިލް ރަމަފޯސާ ކޯވިޑަށް ޕޮޒިޓިވް ވެއްޖެއެވެ. އޭނާގެ އޮފީހުން މައުލޫމާތު ދީފައިވާ ގޮތުގައި، ރައީސް ރަމަފޯސާ މިހާރު ގެންދަވަނީ، ކޯވިޑްގެ އާދާއިގެ އަލާމާތްތަކަށް ފަރުވާ ހޯއްދަވަމުންނެވެ.
ރައީސް އޮފީހުން ހާމަ ކޮށްފައިވާ ގޮތުގައި، ރަމަފޯސާ އަށް ކޯވިޑް އާލާސްކަންފުޅު ފާހަގަވާން ފަށާފައިވަނީ، އެގައުމުގެ ކުރީގެ ރައީސް އެފް ޑަބްލިއު ޑިކްލާކްގެ ރަސްމީ ޖަނާޒާގެ އިހުތިފާލެއްގައި ބައިވެރިވެ ވަޑައިގެންނެވުމަށް އެހަފްލާއިން ވަޑައިގަންނަވަނިކޮށް ކަމަށެވެ. އަދި ބުނެފައިވަނީ، އޭނާ މިހާރު ހުންނެވީ ވެރިރަށް ކޭޕް ޓައުންގައި އަމިއްލައަށް އެކަހެރި ވެވަޑައިގެން ކަމަށާއި، ރައީސްގެ ސިއްޙީ ހާލުކޮޅު އެގައުމުގެ މިލިޓަރީ ހެލްތު ސާރވިސްއިން ވަރަށް ގާތުން ބަލަމުން ދާކަމުގައެވެ.
ކޯވިޑަށް ޕޮޒިޓިވް ވުމާއި ގުޅިގެން ރައީސް ރަމަފޯސާ މިހާރުވަނީ ހުރިހާ ޒިންމާއެއް ވަގުތީގޮތުން ނާއިބު ރައީސް ޑޭވިޑް މަބޫޒާއާއި ކުރިޔަށް އޮތް ހަފްތާ ނިމެންދެން ހަވާލު ކޮށްފައެވެ.
ރަމަފޯސާ ޕޮޒިޓިވްވެފައިވަނީ، ދާދި ފަހުން އެގައުމުން ފެނިފައިވާ އޮމިކްރޮން ވޭރިއެންޓަށް ކަމެއް ދެކުނު އެފްރިކާގެ ރައީސްގެ އޮފީހުން ހާމަ ކޮށްފައެއް ނުވެއެވެ.
ފާއިތުވެދިޔަ ނޮވެމްބަރުމަހު ސައުތު އެފްރިކާއިން ފެނިފައިވާ، ފަސޭހައިން ގައިން ގަޔަށް ވާސިލްވާ އޮމިކްރޮ ވޭރިއެންޓުގެ ބިރުވެރިކަން މުޅި ދުނިޔޭގައިވަނީ ފެތިރިފައެވެ. އަދި މި ވޭރިއެންޓް ސައުތު އެފްރިކާއިން ފެނުމާއި ގުޅިގެން، ދުނިޔޭގެ ގިނަ ގައުމުތަކުންވަނީ، ސައުތު އެފްރިކާއަށް ދަތުރު ކުރުން މަނާކޮށް، އަދި އެގަމުން މީހުން އެތެރެވުންވެސް މަނާ ކޮށްފައެވެ.
ދެކުނު އެފްރިކާގެ ރައީސް އޮފީހުން ބުނެފައިވާ ގޮތުގައި، ފާއިތުވި ހަފްތާގައިވެސް، ރައީސް ރަމަފޯސާއާއި އޭނާގެ ޓީމުގެ އޮފިޝަލުންވަނީ، ފާއިތުވި ހަފްތާގަ 4 ގައުމަކަށް ކުރެއްވި ދަތުރުފުޅުގެ ތެރޭގައިވެސް އެތައްފަހަރަކު ކޯވިޑަށް ޓެސްޓު ކޮށްފައެވެ.
މި ދަތުރުފުޅުގެ ތެރޭގައި ރައީސްގެ ޑެލިގޭޝަންގައި ހިމެނޭ ބައެއް އޮފިޝަލުން ނައިޖީރިއާގައި ކުރި ޓެސްޓުތަކުން ކޯވިޑަށް ޕޮޒިޓިވް ވުމާއި ގުޅިގެން އެބުރި ގައުމަށް ވަޑައިގެންފައި ވެއެވެ. އެހެންނަމަވެސް މި ދަތުރުގައި ރައީސް ރަމަފޯސާއާއި ދެން ތިއްބެވި އޮފޝަލުން ކޯވިޑަށް ޓެސްޓު ކުރުމުން ވަނީ ނެގެޓިވް ވެފައެވެ.
ރައީސް އޮފީހުގެ ބަޔާނުގައި ރައީސް ރަމަފޯސާއާއި ހަވާލާ ދެއްވާ ބުނެފައިވަނީ، އޭނާ ކޯވިޑަށް ޕޮޒިޓިވް ވުން ރައީސް ދެކެވަޑައިގަންވަނީ، ވެކްސިން ފުރިހަމަ ކޮށްގެން، އަދި ބަލިން ރައްކާތެރިވެ ތިބުމަށް އެގައުމުގެ ރައްޔިތުންނަށް ލިބިގެން ދިޔަ އިންޒާރެއް ކަމުގައި ކަމަށެވެ.
