ރަޝިއާއިން ޔޫކުރެއިންއަށް އަރައިފިނަމަ، ހީވެސް ނުކުރާވަރުގެ އަގެއް ދައްކަން ޖެހޭނެ ކަމަށާއި އަދި ގެއްލުން ދެނިވި ދަތިކުރުމުގެ ފިޔަވަޅުތަކާ ރަޝިއާ ކުރިމަތި ލާންޖެހޭނެ ކަމަށް ޕުޓިންގ ގާތު ވިދާޅުވެފައިވާނެ ކަމަށް އެމެރިކާގެ ރައީސް ޖޯ ބައިޑްން ވިދާޅު ވެއްޖެއެވެ.
ރިޕޯޓަރުންނާ ވާހަކަ ދައްކަވަމުން ބައިޑްން ވިދާޅުވެފައިވަނީ، ރަޝިއާއިން ޔޫކްރެއިންއަށް އަރައިފި ހާލަތެއްގައި އެމެރިކާ ސިފައި ޔޫކްރެއިން ހިމާޔަތް ކުރުމަށް ފޮވުމަށް އޭނާ ވިސްނަވާފައި ނުވާ ކަމުގައެވެ. އެހެންނަމަވެސް އެފަދަ ހާލަތެއްގައި އެމެރިކާއާއި ނޭޓޯއިން، ނޭޓޯގެ އިރުމަތީގައިވާ ގައުމުތަކަށް، އެގައުމުތަކުގެ ހިމާޔަތަށްޓަކާ ސިފައިން ފޮނުވުމަށް މަޖުބުރުވާނެ ކަމުގައި ބައިޑްން ވިދާޅުވިއެވެ.
"އަހަރެންވާނީ ޕުޓިންއަށް ވަރަށް ސާފުކޮށް ދަންނަވާފަ.. އޭނާ ޔޫކުރެއިންއަށް އަރައިފިނަމަ، އޭނާގެ ގައުމަށް، އިންތިހާއަށް ގެއްލުން ދެނިވި އިގްތިސާދީ ފިޔަވަޅުތަކާ ކުރިމަތި ލާން ޖެހޭނެ ކަމަށް، އެއީ ވަރަށް ގެއްލުން ދެނިވި ފިޔަވަޅުތަކަކަށް ވެގެން ދާނެ،" ހުކުރު ދުވަހު އެމެރިކާއަށް އެރި ނުރައްކާތެރި ނަގޫރޯޅިއާބެހޭ މައުލުމާތު ދެއްވުމަށްފަހު ބައިޑްން ރިޕޯޓަރުންނަށް ވިދާޅުވެފައި ވެއެވެ.
ފާއިތުވެދިޔަ ހަފްތާގައި 2 ގަޑިއިރު ވަންދެން ޕުޓިންއާއި ފޯނުން މަޝްވަރާ ކުރައްވާފައިވާ ބައިޑްން ވިދާޅުވީ، ރަޝިއާއިން ޔޫކުރެއިން އަރައިފިނަމަ، ދުނިޔޭގެ ކުރިމަތީގައި ރަޝިއާގެ މަގާމް ބޮޑު ތަނުން ބަދަލުވެގެން ދާނެކަމަށް އޭނާ ޕުޓިންގއަށް ވަރަށް ރަގަޅަށް ސާފު ކޮށްދީފައި ވާނެކަމަށެވެ.
ދުނިޔޭގެ އެންމެ މުއްސަދި 7 ގައުމުގެ ޚާރިޖީ ވަޒީރުން މި ހަފްތާގެ ހޮނިހިރު ދުވަހު އިނގިރޭސިވިލާތުގެ ލިވަރޕޫލްގައި ބައްދަލު ކުރައްވާ ހަމަ މިމޭރުމުން ވަނީ ރަޝިއާއަށް އެބޭފުޅުންގެ މެސެޖު ފޯރު ކޮށްދީފައެވެ. އަދި ޚާރިޖީ ވަޒީރުންވަނީ، ރަޝިއާއިން ޔޫކުރެއިން އަށް އަރައިފިނަމަ ރަޝިއާއަށް އޭގެ ގޮންޖެހުންތަކާ ކުރިމަތިލާން ޖެހޭނެކަމަށް ވިދާޅުވެ އިންޒާރު ދެއްވާފައެވެ. އަދި ވަނީ ރަޝިއާއިން މަޝްވަރާގެ މޭޒަށް އައުމަށް ގޮވާލައްވާފައެވެ.
ޔޫކުރެއިން ތުހުމަތުކުރާ ގޮތުގައި ރަޝިއާއިން އެގައުމުގެ ބޯޑަރު ކައިރިއަށް އެތައް ހާސް ސިފައިންނެއް ޖަމާކުރަމުންދަނީ، އެގައުމަށް އަސްކަރީ ހަމަލާދީ އަގައުމަށް އެރުމަށެވެ.
