ބ.އަތޮޅު ހޮސްޕިޓަލުގެ ކޯވިޑް ފެސިލިޓީގައި ކޯވިޑަށް ފަރުވާދެމުންދިޔަ މީހަކު ނިޔާވެއްޖެއެވެ
މިއާއިއެކު ރާއްޖޭގައި މިބަލީގައި ރާއްޖެއިން ނިޔާވި މީހުންގެ ޢަދަދު 258 އަށް އަރައިފިއެވެ. ބ.އަތޮޅު ހޮސްޕިޓަލުން ވިދާޅުވީ މިއަދު ހެނދުނު ނިޔާވީ އެއަތޮޅު ދޮންފަނު އުމުރުން 80 އަހަރުގެ އަންހެނެއްކަމަށެވެ. މި އަންހެންމީހާ ފަރުވާދިނުމަށް ފެސިލިޓީއަށް ގެންދިޔައީ މީގެ ހަތަރު ދުވަސް ކުރިންކަމަށްވެސް ބ.އަތޮޅު ހޮސްޕިޓަލުން ވިދާޅުވެއެވެ. މިއީ މިބަލީގައި ރާއްޖެއިން ނިޔާވީ 258 ވަނަ މީހާއެވެ. އަދި މިއީ މިހާތަނަށް މިބަލީގައި ބ.އަތޮޅުންމަރުވި 4 ވަނަ މީހާއެވެ.
ހެލްތު ޕްރޮޓެކްޝަން އެޖެންސީ، (އެޗް.ޕީ.އޭ)އިން އެންމެފަހުން އާއްމުކުރި ތަފާސް ހިސާބުތައް ދައްކާގޮތުން ރާއްޖެއިން 218 މީހަކު ވަނީ ޕޮއިޓިވް ވެފައެވެ. ކޯވިޑް ޖެހިގެން މިވަގުތު 9331 މީހަކު ފަރުވާ ހޯދަމުން އަންނައިރު މީގެތެރެއިން 15 މީހަކަށް ފަރުވާދެމުން އަންނަނީ ހޮސްޕިޓަލްގައި އެޑްމިޓްކޮށްގެންނެވެ.
ކޯވިޑްގެ އައު ވޭރިއެންޓް ކަމަށްވާ "އޮމިކްރޯން" ހަލުވިކަމާއެކު ދުނިޔޭގެ ޤައުމުތަކުގައި ފެތުރެމުން އަންނައިރު ރައްކާތެރިކަމުގެ ގޮތުން އަނެއްކާވެސް މާސްކަށް އިތުރު ސަމާލުކަމެއް ދިނުމަށާއި ގައިދުރުކަން އިސްކޮށް ހުމާއި ރޯގާގެ އަލާމާތެއް ހުރިނަމަ ގެއިން ބޭރަށް ނުދިޔުމަށާއި ޢާއްމު ސާފުތާހިރުކަމަށް އިސްކަންދިނުމަށް އެޗްޕީއޭއިންވަނީ އިލްތިމާސްކުރައްވާފައެވެ. އަދި ވެކްސިން ޖެހުމަށް ސަމާލުވުމަށްވެސް ވަނީ އިލްތިމާސްކުރައްވާފައެވެ.
