އިދިކޮޅު ޕީޕީއެމް/ޕީއެންސީން ހުޅުމާލޭގެ ދެވަނަ ފިޔަވަހީގައި ހަދާފައިވާ ހިޔާ ފްލެޓްތަކުގެ ކައިރީގައި ބާއްވަން ނިންމި ޖަލްސާއަށް އެޗްޑީސީއާއި ފުލުހުން އެއްބާރުލުން ނުދިނުމުން އެންމެފަހުން ޖަލްސާ ކާނިވަލުގައި ބޭއްވުމަށް ނިންމައިފިއެވެ.
ޖަލްސާ މާދަމާރޭ ހިޔާ ފްލެޓް ސަރަހައްދުގައި ބޭއްވުމަށް ހުރަސް އެޅުމުން ދެން މަސައްކަތް ކުރީ އުސްފަސް ގަނޑުގައި ބޭއްވުމަށެވެ. ނަމަވެސް އެސަރަހައްދުވެސް ނުދިނުމުން އެންމެ ފަހުން ވަނީ ޖަލްސާ ކާނިވާ ސަރަހައްދުގައި ބޭއްވުމަށް ނިންމާފައެވެ.
މިއީ ޕީޕީއެމް ޕީއެންސީގެ ލީޑަރު އަދި ކުރީގެ ރައީސް އަބްދުﷲ ޔާމީންގެ ވެރިކަމުގައި ގާއިމްކުރި ހިޔާ މަޝްރޫއުގެ ފްލެޓްތަކުގައި ދިރިއުޅެން ފަށާފައިވާ ރައްޔިތުންނާއި އެމަނިކުފާނު ބައްދަލު ކުރުމުގެ މަގްސަދުގައި އެ ޕާޓީން ރޭވި ހަރަކާތެކެވެ.
މިޖަލްސާއަށް ސަރުކާރުގެ ހުރަސް އެޅުން އިންތިހާއަށް އޮތް ނަމަވެސް މާދަމާރެއަކީ އެތައް ހާސް ރައްޔިތުން ސަރުކާރާއި ދެކޮޅަށް ތިބިކަން ހާމަވާނެ ރެއެއްކަމަށް އިދިކޮޅުން ބުނެއެވެ. މިޖަލްސާގައި ރައީސް ޔާމީންވެސް ބައިވެރިވާއިރު ޖަލްސާގައި ބައިވެރިވުމަށް މާލެއާއި ކައިރި ރަށްތަކުންނާއި ދުރު ރަށްތަކުންވެސް މީހުން އައިސްފައިވެއެވެ.
މިދިޔަ ހުކުރު ދުވަހުގެ ރޭ ކާނިވާ ސަރަހައްދުގައި ބޭއްވި ފުރަތަމަ ޖަލްސާގައި ވެސް ގިނަ އަދަދެއްގެ އާންމުން ބައިވެރިވިއެވެ.
