ލާމަރުކަޒީ އުސޫލުން އިދާރީ ދާއިރާތައް ހިންގުމަށް ޤާނޫނައި ބަދަލުތަކުގެ ތެރެއަށް ހުޅުމާލެއަކީ ވަކި ސިޓީއެއް ކަމަށް ކަނޑައަޅައި، އަވަސް އިންތިޚާބެއް ބާއްވަންޖެހޭ ކަމުގައި ރައްޔިތުންގެ މަޖިލީހުގެ ވިލިނގިލި ދާއިރާގެ މެމްބަރު ސައުދު ހުސެއިން ވިދާޅުވެއްޖެއެވެ.

މާލެ ސިޓީ ކައުންސިލާއި، ހުޅުމާލޭގެ މިލްކުވެރިކަން އޮތް އެޗްޑީސީއާއި ދެމެދު ބޮޑެތި ޚިޔާލު ތަފާތުވުންތަކެއް އުފެދިމާލެ ސިޓީ ކައުންސިލުންވަނީ އިއްޔެ ބޭއްވި އެކައުންސިލްގެ ބައްދަލުވުމުގައި ހުޅުމާލޭގެ ރަޖިސްޓްރީ ބާޠިލްކޮށްފައެވެ. މިއާއިއެކު ދެފަރާތުގައި ބަހުގެ ހޫނު ހަމަލާތަކެއް އުފެދި، އެޗްޑީސީން ވަނީ މާލެ ސިޓީ ކައުންސިލްގެ މިނިންމުމަކީ ޤާނޫނާއި ޚިލާފް ނިންމުމެއް ކަމަށާއި، މާލެ ސިޓީއާއި ދެކޮޅަށް ދައުވާ ކުރާނެކަމަށް ބުނެފައެވެ.

މާލެ ސިޓީ ކައުންސިލާއި އެޗްޑީސީއާއި ދެމެދު އުފެދިފައިވާ ޚިޔާލު ތަފާތުވުންތަކާއި ގުޅިގެން ސައުދު ވިދާޅުވީ ހުޅުމާލެއަކީ މާލެ ސިޓީގެ ބައެއް ނޫންކަމަށެވެ. ހުޅުމާލެ ވާންޖެހޭނީ ލާމަރުކަޒީ ނިޒާމުގެ ދަށުން ވަކިން ހިންގޭ ޤާނޫނީ ޝަޚުޝަކަށް ކަމުގައެވެ. ހުޅުމާލޭގައި ދިރިއުޅެމުންދާ ރައްޔިތުންނަށް ލާމަރުކަޒީ އުސޫލުން ޚިދުމަތް ފޯރުކޮށް ދިނުމަށް މާލެ ސިޓީ ކައުންސިލަކީ ވަކި ސިޓީއެއް ކަމަށް ކަނޑައަޅައި، އަވަސް އިންތިޚާބެއް ބާއްވަންޖެހޭކަމަށް ސައުދު ވިދާޅުވިއެވެ.

ހުޅުމާލެއަކީ މާލެ ސިޓީގެ ބައެއްނޫން! ހުޅުމާލެ ވާންޖެހޭނީ ލާމަރުކަޒީ ނިޒާމުގެ ދަށުން ހިންގާ ވަކި ޝަޚުޝަކަށް/ސިޓީއަކަށް. ހުޅުމާލޭގައި ދިރިއުޅޭ ރައްޔިތުންނަށް ޚިދުމަތް ފޯރުކޮށް ދެއްވަންވާނީ ލާމަރުކަޒީ އުސޫލުން. ހުޅުމާލެ ވަކި ސިޓީއަކަށް ހަދާ، އަވަސް އިންތިޚާބެއް ބާއްވަންޖެހޭ.

– ސައުދު ވިދާޅުވިއެވެ.

ކުއްލިގޮތަކަށް އެޗްޑީސީގެ މިލްކުގެ ދަށުގަވާ ހުޅުމާލެ ބިމުގެ ރަޖިސްޓަރީ ބާޠިލުކުރުމަށް މާލެ ސިޓީ ކައުންސިލުން ނިންމެވި ނިންމުމަކީ ޤާނޫނާ ޚިލާފް ނިންމުމެއް ކަމަށާ، މިކަމުގައި ލިބޭ ގެއްލުމުގެ ބަދަލު ހޯދަން ކޯޓަށް ދާނެކަމަށް އެޗްޑީސީން ވަނީ ވިދާޅުވެފައެވެ. ހުޅުމާލޭގެ ބިމަކީ އެ ކުންފުނީގެ އަމިއްލަ ޚަރަދުގައި ހިއްކާފައިވާ، އަމިއްލަ ބިމެއްކަމަށެވެ. އެ ކުންފުންޏަކީ ޤާނޫނީ ގޮތުން މުދާ މިލްކުކުރުމުގެ ހައްގު ލިބިފައިވާ ވަކި ޝަޚުސަކަށްވީ ހިނދު، އެ ކުންފުންޏަށް ލިބިފައިވާ ހުޅުމާލޭ ބިމުގެ ރަޖިސްޓްރީ ބާޠިލްކުރަން ސިޓީ ކައުންސިލުން ނިންމީ ގާނޫނު އަސާސީއާވެސް ޚިލާފަށް ކަމަށް އެޗްޑީސީން ވަނީ ވިދާޅުވެފައެވެ.

ދިވެހިޖުމްހޫރިއްޔާގެ ޤާނޫނު އަސާސީގެ ދަށުންވެސް، އަމިއްލަ މުދަލަކީ ޤާނޫނު ހުއްދަނުކުރާ ގޮތަކަށް ނިގުޅައިގަނެގެންވާނޭ އެއްޗެއް ނޫންކަމަށާއި، ޤާނޫނުގައި ކަނޑައެޅި ބަޔާންކޮށްފައިވާ ގޮތުގެމަތިން ފިޔަވައި އަދި އެކަމަށްޓަކައި ކޯޓަކުން ކުރާ ޙުކުމަކުން މެނުވީ އެއްވެސް ފަރުދެއްގެ މުދަލެއް އެފަރާތުގެ ރުހުންނެތި ނެގުމަކީ ޤާނޫނު އަސާސީން ކަށަވަރުކޮށްދީފައިވާ އަސާސީ ހައްޤެއް ނިގުޅައިގަތުންކަމަށް އެޗްޑީސީން ވިދާޅުވެއެވެ.

ހުޅުމާލޭގެ ބިމުގެ މިލްކުވެރިކަމާއި އެ މިލްކުވެރިކަމާއި ގުޅިގެން އެޗްޑިސީއަށް ލިބިފައިވާ އެންމެހައި ހައްޤުތަށް ލިބިގެންވީ ހިނދު، ދިވެހިރާއްޖޭގެ ޤާނޫނުތަކާއި ޚިލާފަށް މާލެ ސިޓީ ކައުންސިލުން ނިންމާފައިވާ ނިންމެވުން އެންމެ ހަރުކަށި އިބާރާތުން ކުށްވެރިކޮށް، އަދި، މިކަމުގެ ސަބަބުން ލިބޭ ގެއްލުމުގެ ބަދަލު ހޯދަން މާލެ ސިޓީ ކައުންސިލްގެ މައްޗަށް ދަޢުވާ އުފުލާނެ ވާހަކަމަށް އެޗްޑީސީން ވަނީ ވިދާޅުވެފައެވެ.