ޕާކިން ސްލޮޓްތަކުގެ ގުރުއަތުގެ ނެގުމުގެ މައްސަލަ އޭސީސީއަށް ހުށަހަޅައިފި

މާލެ ސިޓީގެ ބައެއް މަގުތަކާއި ގޯޅިތަކާއި ބައެއް ސަރަހައްދުތަކުގައި ހަދާފައިހުރި ޕާކިންގ ޒޯންތަކުން އަގުނަގައިގެން ވެހިކަލްތައް ޕާކްކުރުމަށް ކަނޑައަޅާފައިވާ ޖާގަތައް ކަނޑައެޅުމަށް ގުރުއަތު ނެގުމުގައި ސުވާލު އުފެދޭ ކަންތައްތަކެއް ހުރުމުން އެމައްސަލަ އޭސީސީއަށް ހުށަހަޅައިފިއެވެ.

އާންމު ފަރާތަކުން މިމައްސަލަ މިއަދު ހުށަހަޅާފައިވާކަން އޭސީސީން ވަނީ ކަށަވަރު ކޮށްދީފައެވެ. މާލެ ސިޓީ ކައުންސިލްގައި ކުރިއަށްދިޔަ ގުރުއަތުލުމުގައި ސިޓީ ކައުންސިލުން ދޫކުރަން ނިންމާފައިވާ 211 ޕާކިންގ ސްލޮޓް ވަނީ ކަނޑައަޅާފައެވެ. މި ޖާގަތަކަށް އެދި 969 މީހަކު ކުރިމަތިލާފައިވާކަމަށް ސިޓީ ކައުންސިލުން ވިދާޅުވެއެވެ.

ސިޓީ ކައުންސިލުން ގުރުއަތުލުމުގެ ކަންކަން ރޭ ކުރިއަށް ގެންގޮސްފައިވާ ގޮތާއިމެދު ބައެއް ފަރާތްތަކުން ވަނީ ސޯޝަލް މީޑިއާގައި ކަންބޮޑުވުންވެސް ފާޅުކޮށްފައެވެ. ނަމަވެސް މާލެ ސިޓީ ކައުންސިލުން ވިދާޅުވީ ގުރުއަތު ލުމުގެ ކަންކަން ގެންގޮސްފައިވަނީ މީޑިއާތަކުގެވެސް ކުރިމަތީގައި ދެފުށް ފެންނަ ގޮތަކަށް ކަމުގައެވެ.

މާލެ ސިޓީ ކައުންސިލްގެ ޑެޕިއުޓީ މޭޔަރ އަހުމަދު ނަރީޝް ވިދާޅުވީ މި ސްލޮޓްތަކަށް ކުރިމަތިލި ކޮންމެ ފަރާތަކަށްވެސް ސްލިޕެއް ހަވާލުކުރި ކަމަށެވެ. ގުރުއަތު ނެގުމަށް ބޭނުންކޮށްފައިވަނީ ސްލިޕް ނަންބަރު ކަމަށާއި، މި ސްލިޕް ނަންބަރުތައް މިއަދުގެ ވަގުތެއްގައި މާލެ ސިޓީ ކައުންސިލްގެ ވެބްސައިޓް، އަދި ސޯޝަލް މީޑިއާ ޕްލެޓްފޯމްތަކުގައި ހިއްސާކުރާނެ ކަމަށް ނަރީޝް ވިދާޅުވިއެވެ.

ދިހަ ސަރަހައްދަކުން ޕާކިން ޒޯން ކުއްޔަށް ދޫކޮށްފައި ވަނީ 350 ކިލޯ އުފުލޭ ޕިކަޕާއި ކާރު އަދި ވޭނަށެވެ. މި ޖާގަތަކުގެ ތެރެއިން އެންމެ ގިނަ ޖާގައަށް ހުޅުވާލާފައިވަނީ ހެންވޭރު ސަލްމާން މިސްކިތު ސަރަޙައްދުގައި ތަރައްޤީކޮށްފައިވާ ޕާކިންގ ޒޯންތަކުންނެވެ. އެގޮތުން އެ ސަރަޙައްދުން 58 ޖާގަ ކުއްޔަށް ދޫކުރުމަށް ވަނީ ނިންމާފައެވެ. ދެން އެންމެ ގިނަ ޖާގަ ކުއްޔަށް ދޫކުރުމަށް ހުޅުވާލާފައިވަނީ މއ. ވައިދެރިހިނގުން (އަމީނީމަގާއި ކުރެދިގޯޅިއާއި ދެމެދު) އިންނެވެ. އެ ސަރަޙައްދުން 44 ޖާގަ ކުއްޔަށް ދޫކުރުމަށް ހަމަޖެހިފައިވެއެވެ.

ވެހިކަލް ޕާކްކުރަން ކުއްޔަށް ދޫކުރުމަށް ހުޅުވާލާފައިވާ އިތުރު ޖާގަތަކުގެ ތެރޭގައި މއ. ރާދަފަތިހިނގުން (އަމީނީމަގާއި ފަޅުމަތީމަގާއިދެމެދު) އިން 21 ޖާގަ، މއ. ކުރެދިގޯޅިން 10 ޖާގަ، މއ. ހުދުފަޅުހިނގުމުން 8 ޖާގަ، މ. ހިލާލީމަގު އަމީނީމަގުން ފެށިގެން ދެކުނު އިރުމަތީފަޅިން 20 ޖާގަ، މ. ހިލާލީމަގު، އަމީނީމަގު އިރުމަތީ ފަޅި (ސްޓޭޑިއަމް ފަޅީގައި) 10 ޖާގަ، ޞަލާޙުއްދީން ޕާކިންގ ޒޯނުން 10 ޖާގަ އަދި ހ. އަލިމަސް ކާނިވާ ސަރަހައްދުން 6 ޖާގަ ހިމެނެއެވެ.

މީގެ އިތުރުން ހަމައެކަނި ޕްރައިވެޓް ކާރުތައް ޕާކުކުރުމަށް 24 ޖާގައެއް ކުއްޔަށް ދިނުމަށްވެސް މާލޭ ސިޓީ ކައުންސިލުން ނިންމާފައިވެއެވެ. މި 24 ޖާގަ ދިނުމަށް ހަމަޖެހިފައިވަނީ އާޓިފިޝަލް ބީޗް ޕާކިންގ ހިމެނޭ ސަރަޙައްދުން ޗައިނާ އެމްބަސީ ކުރިމަތިންނެވެ.