އދ.ދަނގެތީގައި ރަޙުމްކުޑަގޮތަކަށް މަރާލާފައި އޮއްވައި ފެނުނު މަޙްމޫދު އަބޫބަކުރުގެ މަރުގެ މައްސަލާގައި އެރަށޫގައި ދިރިއުޅޭ ބަންގްލަދޭޝްގެ މީހެއްކަމަށްވާ ޝާ އަލޮމް މިއާ (ސާލިމް) ކުށަށް އިއުތިރާފްވެފައިވާކަމަށާއި، ދަޢުވާކުރުމަށް އަންނަ ހަފްތާގައި ޕްރޮސެކިއުޓަރ ޖެނެރަލްގެ އޮފީހަށް ފޮނުވާނެކަމަށް ފުލުހުން ބުނެފިއެވެ.

މަޙްމޫދުގެ މަރުގެ ތުހުމަތުގައި ޝާ އަލޮމް މިއާ ހުރީ ބަންދުގައެވެ.

މަހްމޫދުގެ މަރުގެ މައްސަލާގައި މިއަދު އިސްކަންދަރު ކޮށީގައި ބޭއްވި ޕްރެސްކޮންފަރެންސްގައި ފުލުހުން ބުނީ، މަރުގެ މޯޓިވްއަކީ ފައިސާ ހޯދުންކަމަށެވެ. އެގޮތުން މަހްމޫދު އަތުން ފައިސާ ހޯދަން ޝާ އަލޮމް މިއާ އުޅުނު ސަބަބު ތަހުގީގަށް ފާހަގަކުރެވިފައިވާކަމަށާއި، ޝާ އަލޮމް މިއާ އުޅޭ ގެއަށް މަހްމޫދު ގެންދިޔަ ސަބަބުވެސް ތަހުގީގަށް ސާފުވެފައިވާކަމަށް ފުލުހުން ބުންޏެވެ. ނަމަވެސް ފުލުހުން ތަފްސީލެއް ނުދެއްވައެވެ.

ފުލުހުން ބުނީ، މަހްމުދު މަރާލިކަމަށް ޝާ އަލޮމް މިއާ ކޯޓުގައި އިއުތިރާފްވެފައިވާކަމަށާއި، އޭނާގެ މައްޗަށް ދައުވާކުރުމަށް އަންނަ ހަފްތާގައި ޕީޖީއަށް ފޮނުވުމަށް މަސައްކަތްކުރަމުން އަންނަކަމަށްވެސް ފުލުހުން ބުންޏެވެ.

ފުލުހުން ބުނީ މަހްމޫދު މަރާލުމަށް ޝާ އަލޮމް މިއާ ތިން ހަތިޔާރެއް ބޭނުންކޮށްފައިވާކަމަށާއި، އޭނާގެ ހަށިގަނޑުގެ 30އަށް ވުރެ ގިނަ ތަނަށް ހަމަލާދީފައިވާކަމަށެވެ.

ޝާ އަލޮމް މިއާއަކީ އެރަށު ނެދުންގޭގައި ބިދޭސީއަކު ބެލުމަށް ހުންނަ މީހެކެވެ.

ފުލުހުން ބުނީ ބިދޭސީ މީހާ ހައްޔަރުކޮށް އެގެ ބަލާ ފާސްކުރުން ވަރަށް ގިނަ ހެކި ފެނިފައިވާކަމަށެވެ. އެގޮތުން މަހްމޫދުގެ ބައެއް ތަކެއްޗާއި، މަރާލިއިރު ޝާ އަލޮމް މިއާ ލައިގެން ހުރި ތަކެތިވެސް ފެނިފައިވާކަމަށެވެ.

ފުލުހުން ބުނީ ޝާ އަލޮމް މިއާ މަހްމުދު މަރާލިއިރު މަހްމޫދު އަތުގައި އޮތީ 500ގެ ވި ނޫޓުކަމަށެވެ. އެހެންކަމަށްވަނަމަ އެއީ 10،000 ރުފިޔާއެވެ.

މަޙުމޫދު އެންމެ ފަހުން ފެނިފައިވަނީ އޭނާ ރަށުގައި ހިންގާ ކެފޭ "މޮނަލާޒް"އިން ނުކުމެގެންދަނިކޮށް އޮކްޓޫބަރު 13ވަނަ ދުވަހުގެރޭ 11 ޖަހާ އެހާކަންހާއިރުއެވެ. މަޙްމޫދަކީ ކެފޭ ހިންގުމުގެ އިތުރުން ގޭހާއި ކާޑުގެ ބާވަތްތައްވެސް ރަށަށް އެތެރެކޮށް ވިއްކުމުގެ މަސައްކަތްކުރާ ވިޔަފާރިވެރިއެކެވެ. ރިސޯޓުތަކުގައި މަސައްކަތްކުރާ ޑައިވިން ދެ ދޯނިވެސް މަޙްމޫދުގެ އަތުގައި އޮވެއެވެ. އެކި ގޮތްގޮތުން އޭނާގެ އެހީތެރިކަން އެރަށުގެ ރައްޔިތުންނަށް ވަރަށް ބޮޑަށް ލިބެއެވެ. އިޖުތިމާޢީ ކަންކަމުގަވެސް ދީލަތިކަމާއެކު ރަށާއި ރައްޔިތުންނަށް އޭނާ އެހީތެރިވެއެވެ.

މަޙުމޫދަކީ 5 ކުދިންގެ ބައްޕައެވެ. އޭނާގެ އަންހެން ކުއްޖަކާއި 4 ފިރިހެންކުދިން ދުނިޔޭގައި އެބަތިއްބެވެ. ކާފަކިޔާ ކުދިންވެސް ތިބެއެވެ.