އޮކްޓުބަރު މަހުގެ 14ގައި އދ.ދަނގެތީގައި ރަޙުމްކުޑަގޮތަކަށް މަރާލާފައި އޮއްވައި ފެނުނު މަޙްމޫދު އަބޫބަކުރުގެ މަރުގެ މައްސަލައާއި ގުޅޭ އިތުރު މަޢުލޫމާތު މިއަދު ހާމަކުރާނެކަމަށް ފުލުހުން ބުނެފިއެވެ. ފުލުހުން ވިދާޅުވީ، މަޙްމޫދުގެ މަރާއި ގުޅޭ އިތުރު މަޢުލޫމާތު ހިއްސާކުރުމަށް މިއަދު ޕްރެސް ކޮންފަރެސްއެއް ބޭއްވުމަށް ނިންމާފައިވާކަމަށެވެ. އެ ޕްރެސް އޮންނާނީ ހަވީރު 16:00ގައެވެ.
މިދިޔަ އޮކްޓޫބަރު މަހުގެ 14ވަނަދުވަހު އދ.ދަނގެތީގައި ރަޙުމްކުޑަގޮތަކަށް މަރާލާފައި އޮއްވައި ފެނުނު މަޙްމޫދު އަބޫބަކުރު މަރާލީ އެރަށުގައި ދިރިއުޅޭ ބަންގްލަދޭޝް މީހެއްކަމަށްވާ ޢުމުރުން 29 އަހަރުގެ ޝާ އަލޮމް މިއާ (ސާލިމް) ކަމަށް ފުލުހުން ވަނީ ބުނެފައެވެ. މަޙްމޫދުގެ މަރުގެ މައްސަލައިގައި ޝާ އަލޮމް މިއާ ދިރިއުޅެމުންދިޔަ ގެ ކޯޓު އަމުރެއްގެ ދަށުން ބަލައި ފާސްކޮށް، މިމައްސަލައާ ގުޅުންހުރި ކަމަށް ބެލެވޭ ގިނަ ޢަދަދެއްގެ ތަކެތި ވަޅުލާފައި ވަނިކޮށް ހޯދައި، ތަހުލީލުކުރުމަށްޓަކައި ފުލުހުންގެ ބެލުމުގެ ދަށަށް ވަނީ ގެންގޮސްފައެވެ. އޭގެ ތެރޭގައި، މަޙްމޫދު އަބޫބަކުރުގެ ފޯނާއި އައިޑީ ކާޑުގެ އިތުރުން މައްސަލައާ ގުޅުންހުރި އިތުރު ހެކި ހިމެނޭކަމަށްވެސް ފުލުހުން ބުންޏެވެ.
ފުލުހުން ބުނީ، މަޙްމޫދު އަބޫބަކުރު މަރާލުމުގައި ސާލިމްގެ އިތުރުން، އިތުރު މީހެއް ނުވަތަ ބައެއްގެ ބައިވެރިވުން އޮތްކަމަށް މިހާތަނަށް ތަހުގީގުގައި ކުރެވުނު މަސައްކަތުން ފާހަގަކުރެވިފައި ނުވާކަމަށެވެ.
ޢުމުރުން 57 އަހަރުގެ މަހުމޫދު އަބޫބަކުރު މަރާލައި ފަޅު ވަޅެއްގެ ތެރެއަށް އެއްލާލާފަ އޮއްވާ ފެނުނީ، އޭނާ ގެއްލިގެން ހޯދަމުންދަނިކޮށެވެ. އޮކްޓޫބަރު މަހުގެ 13ވަނަ ދުވަހުގެ ރެއިންސުރެ އޭނާގެ ޚަބަރެއް ނުވެގެން ހޯދަނިކޮށް ފެނުނީ 14ވަނަދުވަހުގެ މެންދުރު 02:45 ހާއިރުއެވެ.
މަޙުމޫދު އެންމެ ފަހުން ފެނިފައިވަނީ އޭނާ ރަށުގައި ހިންގާ ކެފޭ "މޮނަލާޒް"އިން ނުކުމެގެންދަނިކޮށް އޮކްޓޫބަރު 13ވަނަ ދުވަހުގެރޭ 11 ޖަހާ އެހާކަންހާއިރުއެވެ. މަޙްމޫދަކީ ކެފޭ ހިންގުމުގެ އިތުރުން ގޭހާއި ކާޑުގެ ބާވަތްތައްވެސް ރަށަށް އެތެރެކޮށް ވިއްކުމުގެ މަސައްކަތްކުރާ ވިޔަފާރިވެރިއެކެވެ. ރިސޯޓުތަކުގައި މަސައްކަތްކުރާ ޑައިވިން ދެ ދޯނިވެސް މަޙްމޫދުގެ އަތުގައި އޮވެއެވެ. އެކި ގޮތްގޮތުން އޭނާގެ އެހީތެރިކަން އެރަށުގެ ރައްޔިތުންނަށް ވަރަށް ބޮޑަށް ލިބެއެވެ. އިޖުތިމާޢީ ކަންކަމުގަވެސް ދީލަތިކަމާއެކު ރަށާއި ރައްޔިތުންނަށް އޭނާ އެހީތެރިވެއެވެ.
މަޙުމޫދަކީ 5 ކުދިންގެ ބައްޕައެވެ. އޭނާގެ އަންހެން ކުއްޖަކާއި 4 ފިރިހެންކުދިން ދުނިޔޭގައި އެބަތިއްބެވެ. ކާފަކިޔާ ކުދިންވެސް ތިބެއެވެ.
މަޙުމޫދުގެ ޖަނާޒާ ބާއްވާފައިވަނީ މިމަހުގެ އޮކްޓޫބަރު ވަނަދުވަހުގެ އަސުރު ނަމާދަށްފަހު ދަނގެތީގައެވެ.
