އަރަބި ގައުމުތަކުން އިސްރާއީލާއެކީ ސިޔާސީ ގުޅުން ގާއިމް ކުރަމުން ދިއުމަކީ އިސްރާއީލުން ފަލަސްތީނުގެ ބިންތައް ހިފާ، އިސްތިއުމާރު ކޮށްގެން ތިބޭ ތިބުމަށް ދެވޭ ހަދިޔާއެއް ކަމުގައި ރައްޔިތުންގެ މަޖިލިހުގެ ވިލިގިލި ދާއިރާގެ މެމްބަރު ސައުދު ހުސެއިން ވިދާޅު ވެއްޖެއެވެ.

ސައުދު ކުރެއްވި ޓުވީޓެއްގައި ވިދާޅުވެފައިވަނީ، ޕާލަމެންޓްރީ އެސެމްބްލީ ފޯރ އަލް ޤުދުސްގެ މެމްބަރެއްގެ ހައިސިއްޔަތުން، އަރަބި ގައުމުތަކުން އިސްރާއީލާއެކީ ގުޅުން ގާއިމް ނުކުރުމަށް ގޮވާލައްވަނީ، އެއީ އިސްރާއީލުގެ އިތިއުމާރަށް ދެވޭ އެއްބާރުލުމަކަށް ވުމުގެ އިތުރުން އެއީ ފަލަސްތީނުގެ ރައްޔިތުން ތަހައްމަލް ކުރަމުންދާ ވޭނާއި ކެކުޅުންތަކަށް ވެވޭ އިހުމާލަކަށްވެސް ވާތީއެވެ.

As a member of the League I, reiterate the call on Muslim countries, not to normalize their relations with Israel or establish diplomatic relations, as it would only be a reward for the occupation, and a complete disregard to the suffering of the Palestinian people. pic.twitter.com/ok9BcBBMje

— Saud Hussain MP (@SaudVillingili) December 1, 2021

މީގެ އިތުރުންވެސް ސައުދު ވިދާޅުވެފައިވަނީ، ދިވެހި ރައްޔިތުންނާއި އަދި ރައްޔިތުންގެ މަޖިލީހުގެ ފަރާތުންވެސް، އދ އަށާއި، ޔުރަޕިއަން އިއްތިހާދަށާއި އަދި  އޯގަނިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އަށް، ހިފާފައިވާ ބިންތަކުގައާއި އެނޫން ތަންތަނުގައިވެސް ދިރިއުޅެމުންދާ ފަލަސްތީނުގެ ރައްޔިތުންނަށް، ކުރިމަތިވެފައިވާ މައްސަލަތަކަށް ހައްލު ހޯދާ ދިނިމަކަށްޓަކާ، ފަލަސްތީނު އިސްރާއީލުގެ މައްސައަށް ދާއިމީ ހައްލެއް ހޯދުމަށް ސީރިއަސް މަސައްކަތްތަކެއް ކުރުމަށް ގޮވާލައްވާކަމަށެވެ.

ސައުދު ވިދާޅުވި ގޮތުގައި، ދުނިޔޭގެ އެހެން ގައުމުތަކުން އަމާންކަމާއެކު މިނިވަން ދައުލަތެއްގެ ހިޔާވަހި ކަމުގައި ތިބިއިރު، ފަލަސްތީނުގެ ރައްޔިތުން އަދިވެސް ތިބީ އަމިއްލަ މިނިވަން ދައުލަތެއްގެ ހިޔާވަހިކަން ނުލިބި ކަމުގައެވެ. އަދި އެމީހުންގެ އިންސާނީ ހައްގުތައްވެސް ވަނީ ނިގުޅައިގަނެވިފައި ކަމަށާއި، އަމިއްލަ ގެދޮރުންވެސް ފަލަސްތީނުގެ ރައްޔިތުން ބޭރު ކުރެވިފައިވާ ކަމުގައެވެ. އެހެންކަމުން، ވަކި ފަރާތަކަށް ނުޖެހި، ހަމަ ހަމަކަމާއެކު، ފަލަސްތީނުގެ ރައްޔިތުންގެ އިންސާނީ ހައްގުތައް ކަށަވަރު ކޮށްދިނުމަކީ ދުނިޔޭގެ ބާރުގަދަ ގައުމުތަކުގެ ޒިންމާއެއްކަން ސައުދު ފާހަގަ ކުރައްވާފައި ވެއެވެ.

ސައުދު ވިދާޅުވެފައިވަނީ، ޖޭރުސެލަމް ވާންވާނީ މިނިވަން ފަލަސްތީނުގެ ވެރިރަށް ކަމަށާއި، ފަލަސްތީނުގެ ބިމަކީ ފަލަސްތީނުގެ ރައްޔިތުންގެ މިލްކެއް ކަމުގައެވެ. އަދި ދިވެހި އެންމެހާ ރައްޔިތުންގެ ދުޢާއަކީވެސް އަދި އެދުމަކީވެސް ފަލަސްތީން މިނިވަންވެ، ސުލަހައާއި އަމާންކަން ގާއިމްވެގެން ދިއުންކަމުގައި ސައުދުގެ ކުރެއްވި ޓުވީޓުގައި ވިދާޅުވެފައި ވެއެވެ.