ސީއެންއެންގެ މަޝްހޫރު ޕްރެސެންޓަރު ކްރިސް ކުއޯމޯ މުއްދަތެއް ނެތް ގޮތަށް ސަސްޕެންޑް ކޮށްފި

ސީއެންއެންގެ އެންމެ މަޝްހޫރު އެއް ޕްރެސެންޓަރ ކަމުގައިވާ ކްރިސް ކުއޯމޯ ވަކި މުއްދަތެއް ނެތް ގޮތަށް އެ ސްޓޭޝަނުން ސަސްޕެންޑް ކޮށްފިއެވެ.

ޕްރެސެންޓަރ ކުރިސް ކުއޯމޯ ސަސްޕެންޑް ކޮށްފައި މިވަނީ، އޭނާ، އޭނާގެ ބޭބެގެ އަދި ނިއުޔޯކުގެ ކުރީގެ ގަވަރުނަރު އެންޑްރޫ ކުއޯމޯގެ ގާތް ފަރާތްތަކާ އެކަށީނުވާ ގުޅުންތަކެއް ބާއްވާފައިވާކަން ލިޔެކިޔުންތަކުން ހާމަވެގެން ދިއުމާ ގުޅިގެންނެވެ.

ޕްރެސެންޓަރ ކްރިސް ކުއޯމޯވަނީ މި ޚަބަރާ ގުޅިގެން މީޑިއާތަކާއި އެއްވެސް މައުލޫމާތެއް ހިއްސާ ކުރެއްވުމަށް ދެކޮޅު ހައްދަވާފައެވެ.

މަޝްހޫރު ޕްރެސެންޓަރ ސަސްޕެންޑް ކުރިކަމުގެ ޚަބަރު އާންމުވެގެން ގޮސްފައިވަނީ ގިނަބަޔަކަށް ގެނުވި ހައިރާންކަމާއެކުއެވެ.

ކްރިސް ކުއޯމޯ މިހާތަނަށް، ކޮންމެ ރެއެއްގެވެސް 9:00ގައި ގެނެސްދެމުން އައިސްފައިވާ ޕްރޮގްރާމަކީ ކޮންމެ ދުވަހަކުވެސް ސީއެންއެންގައި އެންމެ ގިނަ މީހުން ބަލަމުން އައިސްފައިވާ އެއް ޕްރޮގްރާމެވެ. އަދި އޭނާއަކީ ސީއެންއެންގައި ގިނަ ދުވަސްތަކެއް ވަންދެން މަސައްކަތް ކުރަމުން އައިސްފައިވާ ޕްރެސެންޓަރެކެވެ.

އަދި އޭނާގެ ބޭބެ، ނިއުޔޯކް ސިޓީގެ ކުރީގެ ގަވަރުނަރުގެ މައްޗަށް ކުރެވިގެން ގޮސްފައިވާ ޖިންސީ ފުރައްސާރައިގެ ތުހުމަތުތަކާއެކުވެސް، ކްރިސް ކުއޯމޯވަނީ މިއަހަރު ސީއެންއެންގައި މަސައްކަތް ކުރަމުން ގެންދުމަށް މީގެ ކުރިން ނިންމާފައެވެ.

ކްރިސް ކުއޯމޯގެ ބޭބެ، ނިއުޔޯކް ސިޓީގެ ގަވަރުނަރު ކަމުގައި ހުންނެވި އެންޑްރޫ ކުއޯމޯވަނީ އޭނާގެ މައްޗަށް ކުރެވިގެންދިޔަ ޖިންސީ ފުރައްސާރައިގެ ތުހުމަތުތަކާ ގުޅިގެން މީގެ 3 މަސްދުވަސް ކުރިން ގަވަރުނަރުކަމުން އިސްތިއުފާ ދެއްވާފައެވެ.

މިހަފްތާގެ ހޯމަ ދުވަހު އާންމު ކޮށްފައިވާ ލިޔެކިޔުންތަކުގައިވާ ގޮތުން، ކްރިސް ކުއޯމޯ ވަނީ، ކުރިން ހީކުރެވިފައިވާ ވަރަށްވުރެ ބޮޑަށް، އޭނާގެ ބޭބެގެ ހިމާޔަތުގައި މަސައްކަތް ކޮށްފައެވެ.

"ނިއުޔޯކް ސިޓީގެ އެޓާރނީ ޖެނެރަލްގެ އޮފީހުން އާންމު ކޮށްފައިވާ ލިޔެކިޔުންތަކުން އެބަހުރި، ކްރިސް ކުއޯމޯ އޭނާގެ ބޭބެ ދިފާއި ކުރުމަށް ކޮށްފައި ހުރި މަސައްކަތްތައް ވަރަށް ތަފްސީލުކޮށް އެގެން،" ސީއެންއެންގެ ތަރުޖަމާން އަންގާރަ ދުވަހު ވިދާޅުވެފައި ވެއެވެ. "ކުރިން ފެނިފައިވާ ނުވާ ލިޔެކިޔުންތައް އާންމު ވެގެން ދިއުމުން، ވަނީ ވަރަށް ސީރިއަސް ސުވާލުތަކެއް އުފެދިގެން ގޮސްފަ."

"ކްރިސް އޭނާގެ ބޭބެގެ މުވައްޒިފުންނަށް އިރުޝާދާއި ލަފާ އަރުވާފަ ވާނެކަމަށް އަމިއްލައަށް އެއްބަސްވުމުން، އޭނާ މިތަނުގެ އުސޫލުތަކާ ޚިލާފް ވެފައިވާކަން ވާނީ އާންމު ވެގެން ގޮސްފަ،" ސީއެންއެންގެ ތަރުޖަމާން ވިދާޅުވިއެވެ. "އެހެންނަމަވެސް އަހަރެމެންނަށްވެސް އޭނާ އެހުރި ޚާއްސަ މަގާމް އިގޭ، އަދި ވަޒީފާއަށްވުރެ އާއިލާ އޭނާއަށް މުހިންމުވާނެ ކަންވެސް އަހަރެމެންނަށް އިގޭ."

"އެހެންނަމަވެސް ލިޔެކިޔުންތަކުން އޭނާ އޭނާގެ ބޭގެ ހިމާޔަތުގައި ކުރިން ހީކުރެވިފައިވާ މިންވަރަށްވުރެ ބޮޑަށް އުޅެފައިވާކަން އެގެން އެބައޮތް،" ތަރުޖަމާން ވިދާޅުވިއެވެ. "ނަތީޖާއެއްގެ ގޮތުން، އަހަރެމެން ވާނީ ކްރިސް، މުއްދަތެއް ނެތްގޮތަށް ސަސްޕެންޑް ކޮށްފަ، ތަހުގީގުން ގޮތެއް ނިމެންދެން."

ސީއެންއެންއިން ކްރިސް ކުއޯމޯ ސަސްޕެންޑް ކޮށްފައިވަނީ، ޖިންސީ ގޯނާގެ ތުހުމަތު ކުރެވިފައިވާ އޭނާގެ ބޭބެގެ ހިމާޔަތުގައި ކްރިސް ކުއޯމޯ މަސައްކަތްކޮށް، ނޫސްވެރިކަމުގެ އުސޫލުތަކާ އޭނާ ޚިލާފްވެފައިވަ ކަމަށްބުނެ، ގިނަ ބައެއްގެ ފާޑު ކިއުން އަމާޒުވެފައި ވަނިކޮށެވެ.