ކުރީގެ ރައީސް އަބްދުﷲ ޔާމީން ބައިވެރިވެ ވަޑައިގަންނަވާ ޖަގަހަ ޖަލްސާއެއް މިރޭ ބޭއްވުމަށް ހަމަޖެހިއްޖެއެވެ.
އިދިކޮޅު ކޯލިޝަންގެ ތަރުޖަމާން ހީނާ ވަލީދު ވިދާޅުވީ ރައީސް ޔާމީން ބައިވެރިވާ ޖަގަހަ ޖަލްސާ ބޭއްވުމަށް ހަމަޖެހިފައިވަނީ މާލޭގައި ހުންނަ ޕީޕީއެމް އޮފީހުގައިކަމަށެވެ. މިޖަލްސާގައި ރައީސް ޔާމީން ޕީޕީއެމްގެ އާންމު މެމްބަރުންނާއި މުޚާތަބު ކުރައްވާގޮތަށް ހަމަޖެހިފައިވާކަމަށެވެ.
އަންނަ ހުކުރު ދުވަހުގެރޭ ޕީޕީއެމްއިން ދަނީ ބޮޑު ޖަލްސާއެއް ބޭއްވުމަށް ތައްޔާރުވަމުންނެވެ. މިޖަލްސާގައިވެސް ރައީސް ޔާމީން ބައިވެރިވެ ވާހަކަ ދައްކަވާ ގޮތަށް ވަނީ ހަމަޖެހިފައެވެ. މިއީ ފާއިތުވެދިޔަ ދެ އަހަރެއްހާ ދުވަހުގެ ތެރޭގައި ރައީސް ޔާމީން ސިޔާސީ މަސައްކަތަށް ނިކުންނަވާ ފުރަތަމަ ފަހަރެވެ.
ރައީސް ޔާމީންގެ މައްޗަށް ކޮށްފައިވާ 5 އަހަރުގެ ޖަލު ހުކުމާއި ގުޅިގެން، ޖަލު ބަންދުގައި ދެ އަހަރު ވަނީ ހޭދަ ކުރައްވާފައެވެ. ނަމަވެސް އިއްޔެ ސްޕްރީމް ކޯޓުން ވަނީ އެމަނިކުފާނު މިނިވަން ކުރައްވާފައެވެ.
