ސަރުކާރުން މަސައްކަތްކުރީ، ޝަރުއީ ދާއިރާ މެދުވެރިކޮށް އިދިކޮޅު ލީޑަރު ސިޔާސީ މަސައްކަތުން އެކަހެރިކުރުމަށް ކަމުގައި، ކުރީގެ އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީ ވިދާޅުވެއްޖެއެވެ.
މަނީލޯންޑްރިންގެ ދައުވާ ސާބިތު ނުވާ ކަމަށް ކަނޑައަޅައި, ކުރީގެ ރައީސް އަބްދުالله ޔާމީން އަބްދުލްގައްޔޫމްގެ މައްޗަށް ކްރިމިނަލް ކޯޓުން އިއްވާފައިވާ ޚުކުމް ސްޕްރީމް ކޯޓުން ބާތިލް ކުރުމަށް ކުރި ހުކުމުގައި ހުރި މުހިންމު ނުކުތާތަކަށް އަލި އަޅުވާލަމުން ޑރ.އަހުމަދު އަބްދުﷲ ދީދީ ވިދާޅުވީ، ހުކުމުން އެންމެ ބޮޑަށް ސާފުވި އެއްކަމަކީ ޢުންޞުރު ފުރިހަމަނުވާ ބާޠިލް ދަޢުވާއެއް އުފުލައި ޖުޑިޝަލް ސިސްޓަމް ބޭނުންކޮށްގެން އިދިކޮޅު ލީޑަރު ސިޔާސީ މައިދާނުން އެކަހެރިކުރުމަށް ސަރުކާރުން މަސައްކަތް ކޮށްފައިވާކަމަށެވެ.
މިއާއިއެކު ބެސްޓް ޕްރެކްޓިސްއާ ޚިލާފަށް އިސްތިއުނާފީ މަރްޙަލާގައި ރައީސް ޔާމީން ބަންދުން ދޫނުކޮށް ގިނަ ދުވަސްތަކެއް ފާއިތުވުމަށްފަހު، ތުހުމަތުން ބަރީއަވުމުން ގެއްލުމުގެ ބަދަލު ދައުލަތުން ދޭންޖެހޭކަމާއި، މިކަން ޔޫރަޕްގެ އިންސާނީ ޙައްޤުތަކާބެހޭ ކޯޓުގެ ނިންމުންތަކުން އެނގެން އޮންނަކަމަށް ކުރީގެ އުއްތަމަ ފަޑިޔާރު ވިދާޅުވިއެވެ.
ރާއްޖޭގެ ޖިނާއީ ޢަދްލުގެ ނިޒާމުގެ މިނިވަންކަމާއި މުސްތަޤިއްލުކަން ކަށަވަރުކުރުމަށް ބޭނުންވާ އިޞްލާޙުތައް ލަސްނުކޮށް ގެންނަން ޖެހިފައިވާކަމަށާއި، މިގޮތުން އެންމެ ފުރަތަމަ އިޞްލާޙުކުރަންޖެހޭ ދެ މުއައްސަސާޔަކީ JSC އާއި PG ކަން ހުކުމުން ސާފުވެގެން ގޮސްފައިވާކަމަށް އަހުމަދު އަބްދުﷲ ދީދީ ވިދާޅުވިއެވެ.
ރައީސް ޔާމީންގެ މައްޗަށް ކުށް ސާބިތުވާކަމަށް ކްރިމިނަލް ކޯޓުންނާއި ހައިކޯޓުން ނިންމި ނިންމުން ބާތިލުކުރަންޖެހޭކަމަށް ފެންނަކަމަށް މައްސަލަ ބެއްލެވި ފަނޑިޔާރުންގެ ބެންޗުގެ 3 ފަނޑިޔާރުންގެ އިއްތިފާގުންނެވެ. މި މައްސަލައިގައި ފަނޑިޔާރު މަހާޒްގެ ރަޢުޔަށް ދެން ތިއްބެވި ފަނޑިޔާރު އަޒްމިރަލްދާ ޒާހިރުގެ އިތުރުން ފަނޑިޔާރު އިބްރާހިމް މުހައްމަދުވަނީ ތާއީދުކުރައްވާފައެވެ.
ރައީސް ޔާމީންގެ ފަރާތުން ސުޕްރީމް ކޯޓަށް ހުށައެޅި މިމައްސަލާގައި ސުޕްރީމް ކޯޓުގައި ގިނަ އަޑުއެހުންތަކެއް ބާއްވާފައިވާއިރު، ސުޕްރީމް ކޯޓުގެ ފަނޑިޔާރުންގެ ކިބައިން ރައީސް ޔާމީން އެދިވަޑައިގަންނަވަމުން ގެންދެވީ އެމަނިކުފާނާމެދު ވަަރަށް ބޮޑަށް ބޭއިންސާފުން ޢަމަލުކޮށްފައިވާ ކަަމަށާއި އެކަންކަމަށް ރިއާޔަތްކޮށްދިނުމަށެވެ.
ސުޕްރީމް ކޯޓުގައި ރައީސް ޔާމީންގެ ފަރާތުން އިސްތިއުނާފީ ނުކުތާގެ ގޮތުގައި 22 ނުކުތާއެއް ފާހަގަކުރިނަމަވެސް އޭގެ ތެރެއިން ގިނަ ކަންކަން ހައިކޯޓުން ނިންމެވީ ޤާނޫނާއި ޚިލާފަށްކަމަށް ބެލެވެން ނެތްކަމަށް ސުޕްރީމް ކޯޓުގައި މި މައްސަލަ ބެއްލެވި ފަނޑިޔާރުންގެ ބެންޗުގެ ރިޔާސަތުގައި އިންނެވި ފަނޑިޔާރު މަހާޒްގެ ރައުޔުގައި ވިދާޅުވިއެވެ.
ޔާމީންގެ މައްޗަށް އިއްވާފައިވާ މަނީ ލޯންޑަރިންގެ ދަޢުވާއިން ސަލާމަތްވީ އެމަނިކުފާނުގެ އެކައުންޓަށް ޖަމާވި ފައިސާ އަކީ ދަޢުލަތަށް ލިބެން ޖެހޭ ފައިސާ ކަމާ މެދު ސުވާލު އުފައްދައި ހުށަހެޅި ނުކުތާއާ ގުޅިގެން އެމަނިކުފާނާ އެއްކޮޅަށް ރައުޔު އިއްވުމުންނެވެ.
ސުޕްރީމް ކޯޓުންވަނީ މިމައްސަލައިގަ ހެކިބަސް ހޯދާފައިވާ އަދީބާއި ޒިޔަތުގެ ހެކިބަހާ ގުޅޭ އެހެން ހެކިތަކަކީ ކޮބައިކަމެއް ފާހަގަކޮށްފައި ނެތމުން އަދީބާއި ޒިޔަތުގެ ހެކިބަސް ބަލައިގެންފައިވަނީ ޤާނޫނީ އުސޫލުގެ ތެރެއިން ނޫންކަން ފާހަގަކޮށްފައެވެ. އަދި, އަދީބާއި ޒިޔަތުގެ ހެކިބަސް ބަލައިގަތުމަކީ ރައްކާތެރިކަމެއް ކަމަށް ގަބޫލު ނުކުރައްވާ ކަމަށް ވެސް ޙުކުމްގައިވެއެވެ.
