އޮމިކްރޮން ވޭރިއެންޓަށް ޕޮޒިޓިވްވާ ފަރާތްތަކުގެ ކިބައިން އަދި ފެންނަމުންދަނީ އާދައިގެ މިންވަރެއްގެ އަލާމާތްތަކެއްކަމަށް، ދެކުނު އެފްރިކާގައި މި ވޭރިއެންޓް އެންމެ ފުރަތަމަ ދެނެގަތް ޑޮކްޓަރު އޭންޖެލިކް ކޯޓްޒީ ވިދާޅުވެއްޖެއެވެ.
އެހެންނަމަވެސް އޭނާ ވިދާޅުވި ގޮތުގައި، ސިއްޙީ ނިޒާމު ބަލިކަށި މީހުންނަށް މި ވައިރަހަކީ ކިހާ ސީރިއަސް ވައިރަހެއްތޯ ދެނެގަތުމަށް އަދިވެސް މުއްދަތެއް ނަގާނެކަމަށްވެސް އޭނާ ވިދާޅުވިއެވެ.
އަދި އޭނާ އިތުރަށް ވިދާޅުވި ގޮތުގައި މި ވޭރިއެންޓަށް ޕޮޒިޓިވް ވެފައިވާ މީހުންގެ ކިބައިން ކެއްސުމާއި އަދި ވަސްދުވުމުން މަހުރޫމްވުން ފަދަ އަލާމާތަތައްވެސް ފެންނަމުން ނުދާކަމުގައެވެ. މިއީ ކޯވިޑަށް ޕޮޒިޓިވްވާ މީހުންގެ ކިބައިން އާންމުކޮށް ފެންނަ އަލާމާތްތަކެކެވެ. އަދި މި ވޭރިއެންޓަސް ޕޮޒިޓިވް ވެގެން އެތައް ބަޔަކު އަންނަމުންދާއިރު، އަދި އެއްވެސް ބަލިމީހަކު ހާލު ދެރަވެގެން އެޑްމިޓް ކޮށްފައި ނުވާކަމަށްވެސް އޭނާ ވިދާޅުވެފައި ވެއެވެ.
އެހެންނަމަވެސް، އޮމިކްރޮން ވޭރިއެންޓަށް ޕޮޒިޓިވްވާ ފަރާތަތަކުގެ ކިބައި އާންމުކޮށް ކޯވިޑް ޖެހޭ މީހުންގެ ނުފެންނަ އަލާމާތްތައް ފެންނަމުންދާ ކަމުގައިވެސް އޭނާ ވިދާޅުވެފައި ވެއެވެ. މީގެ ތެރޭގައި، ވަގުތުން ވަރުބަލިވުމާއި، އަދި ވިންދު މައްޗަށް ދިއުމުން ހިމެނޭކަމަށް ޑރ. ކޯޓްޒީ ވިދާޅުވިއެވެ.
ޑރ. ކޯޓްޒީ އިތުރަށް ވިދާޅުވީ، މި ވައިރަހާމެދު ކަންބޮޑުވެގެން ބޯޑަރުތައް ބަންދު ކޮށްފައިވާ ގައުމުތަކަށްވެސް މިހާރު ވައިރަސް ވަދެފައިވުން ވަރަށް ގާތް ކަމަށާއި، އަދި ކުރިޔަށް ދެ ހަފްތާގެ މުއްދަތުގައި ހާލަތު ބަދަލުވެގެން ދިއުން ވަރަށް ގާތް ކަމުގައެވެ.
ފާއިތުވި ހަފްތާފައި ދެކުނު އެފްރިކާއިން ފެނުނު ކޯވިޑް19ގެ އާ ވޭރިއެންޓަކީ "ކަންބޮޑު ވާންޖެހޭ" ވޭރިއެންޓެއްގެ ގޮތުގައި ދުނިޔޭގެ ސިއްހަތު ޖަމިއްޔާއިން ނިންމުމާއި ގުޅިގެން ދުނިޔޭގެ ގިނަ ގައުމުތަކުން މިހާރުވަނީ އެގައުމަށް އެފްރިކާގެ ގިނަ ގައުމުތަކުން މީހުން ވަނުން މަނާ ކޮށްފައެވެ.
އެހެންނަމަވެސް، މިހާރުވެސް މި ވައިރަސްވަނީ ދުނިޔޭގެ ގިނަ ގައުމުތަކަށް ފެތުރިފައެވެ. މީގެ ތެރޭގައި މިއަދި އަލަށް އޮސްޓްރޭލިއާއިންވަނީ މި ވޭރިއެންޓަށް ޕޮޒިޓިވް މީހަކު ފެނިފައެވެ. އޭގެ އިތުރުންވެސް މި ވޭރިއެންޓް އެންމެ ފަހުން ފެނިގެން ގޮސްފައިވާ ގައުމުތަކުގެ ތެރޭގައި، އިސްރާއިލް، އިގިރޭސިވިލާތް، ނެދަރލޭންޑްސް ހިމެނެއެވެ.
އޮމިކްރޮން ވޭރިއެންޓް ދުނިޔޭގެ ގައުމުތަކަށް ފެތުރެންފަށާފައިވާއިރު، އިސްރާއީލުންވަނީ ގައުމުން ބޭރުގެ އެއްވެސް މީހަކު އެގައުމަށް ވަނުން މަނާކޮށްފައެވެ.
