އާލިއާ ބަޓް އާއި ރަންބީރް ކަޕޫރް އެކުގައި ފެނިގެންދާނެ ފުރަތަމަ ފިލްމް "ބްރަހްމަސްތުރަ" އަޅުވަން ނިންމާފައިވާ ތާރީހު އިއުލާން ކޮށްފިއެވެ.
އެކި އެކި ސަބަބުތަކާއި ހެދި ލަސްވަމުން އަންނަ މި ފިލްމުގެ ޝޫޓިންގެ ހުރިހާ މަސައްކަތެއް ގާތްގަނޑަކަށް 200 ވަރަކަށް ދުވަސް ފަހުން މިހާރު ވަނީ ނިމިފައެވެ.
"ބްރަހްމަސްތުރަ" އަކީ ބޮޑު ކާސްޓެއް ހިމެނޭ ފިލްމެކެވެ. އެގޮތުން މި ފިލްމް ގެ މުހިންމު ރޯލުތަކުން އަމީތާބް ބައްޗަން، މޯނީ ރޯއީ، ޑިމްޕަލް ކަޕާޑިއާގެ އިތުރުން ސައުުތުގެ ސުޕަސްޓަރ ނާގައަރުޖުނާ ވެސް ހިމެނެއެވެ.
ފިލްމުގެ ޕްރޮޑަކްޝަން ޓީމުން މިހާރު ފިލްމު ރިލިޒް ކުރުމަށް ނިންމާފައިވަނީ 9 ސެޕްޓެމްބަރ 2022 ގައެވެ. އަޔާން މުކަރްޖީ ޑައިރެކްޓް ކުރާ މި ފިލްމަކީ ސުޕަހީރޯ ފިލްމެކެވެ.
އާންމުކޮށް ބޮލީވުޑް ފިލްމްއެއް ޝޫޓުކުރުމަށް ނަގާ މުއްދަތަަށް ވުރެ ދެގުނަ އިތުރަށް ވަގުތު ނެގި މި ފިލްމުގެ އިންތިޒާރުގައި ރަންބީރާއި އާލިއާގެ ފޭނުން ތިބި އިރު މިއީ މިހާރު ބޮލީވުޑްގެ އެންމެ ލޯބި ކަޕުލްގެ ގޮތުގައި މަޝްހޫރު ވެފައިވާ ޖޯޑެކެވެ. މިދެ މީހުންގެ ލޯބީގެ ގުޅުމުގެ ފެށުން ކަމުގައިވެސްވީ މި ފިލްމެއެވެ. މީޑީއާގެ ފަހުގެ ރިޕޯޓްތަށް ބުނާގޮތުގައި މި ދެތަރިންގެ ކައިވެނިވެސް ވަރަށް އަވަހަށް ފެނިގެންދާނެއެވެ.
