އެމެރިކާގެ ރިޔާސީ އިންތިޚާބުގެ ވޯޓު ލާ ދުވަހާއި ހަމައަށް އައިއިރު، 99.6 މިލިއަން މީހުން އެމެރިކާގައި ވޯޓު ލައިފިއެވެ.
މިއީ މިހާރު ކުރިޔަށްދާ މިއިންތިޚާބުގައި، ދުރާލާ ވޯޓުލުމަށް ހުޅުވާލެވުނު ފުރުސަތުގައި، ޕޯސްޓުގެ ޒަރީޢާއިން މިހާތަނަށް ވޯޓު ލީމީހުންގެ އަދަދެވެ. މި އަދަދަށް ބަލާއިރު ފާއިތުވެދިޔަ އެއް ގަރުނުގެ ތެރޭގައިވެސް އެމެރިކާގައި އެންމެ ގިނަ އަދަދަކަށް ވޯޓުލާން މީހުން ނިކުންނަ އިންތިޚާބަށް މިއިންތިޚާބު ވުން ވަރަށް ގާތެވެ.
ދުރާލާ ވޯޓުލާ މީހުންގެ އަދަދު މިއިންތިޚާބުގައި އިތުރުވެގެން ގޮސްފައިވަނީ، ކޯވިޑް19 ކާރިސާގެ ސަބަބުން، ޕޯސްޓު (މެއިލް-އިން-ބެލޮޓު) މެދުވެރިކޮށް ދުރާލާ ވޯޓު ލުމަށް އެމެރިކާގެ ސިއްޙީ އިދާރާތަކުން މިކަމަށް ބާރުއަޅާފައި ވަނިކޮށެވެ. އަދި ވަކިން ޚާއްސަކޮށް ޑިމޮކްރަޓިކް ޕާޓީގެ ރިޔާސީ ކެޑިޑޭޓު، ކުރީގެ ނާއިބު ރައީސް ޖޯ ބައިޑްންގެ ކެމްޕޭއިންއިން ވަނީ މިކަމަކަށް ބާރުއަޅާ އެތަކެއް ކެމްޕެއިންތަކެއް ކޮށްފައެވެ. އެހެންނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވަމުން ގެންދެވީ ޕޯސްޓު މެދުވެރިކޮށް ގިނަ އަދަދެއްގެ ބަޔަކު ވޯޓު ލާން ނިކުތުމަކީ ވޯޓު އޮޅުވާލުމަށް ލިބޭ ފުރުސަތެއްކަމަށެވެ. އަދި ޓްރަމްޕް ވަނީ އިންތިޚާބުގެ ނަތީޖާ ކޮންމެ ކޮންމެ ހާލަތެއްގައި ގަބޫލުކުރައްވާނެކަމަށް ވިދާޅުވާން ދެކޮޅު ހައްދަވާފައެވެ.
މިއަހަރުގެ ރިޔާސީ އިންތިޚާބުގައި ކުރިން ވޯޓުލާ މީހުންގެ އަދަދު އިތުރުވެގެން ދިއުމުގެ ނަތީޖާއެއްގެ ގޮތުން މިއިންތިޚާބުގައި ރެކޯޑު އަދަދަކަށް މީހުން ވޯޓުލާން ނިކުތުމުގެ ފުރުސަތު ވަރަށް ބޮޑުކަމަށް މަސްރަހު ދިރާސާކުރާ ފަރާތްތަކުން ބުނެއެވެ. މިގޮތުން މި އިންތިޚާބުގައި 150 މިލިއަން މީހުން ވޯޓުލާނެކަމަށް މިހާރު ދަނީ ބެލެވެމުންނެވެ. މިއަދަދަށް މީހުން ވޯޓުލައިފިނަމަ، މި އިންތިޚާބު ވެގެންދާނީ، 1908އަށްފަހު އެމެރިކާގައި އެންމެ ގިނައަދަދަކަށް މީހުން ވޯޓުލާން ނިކުތް އިންތިޚާބު ކަމުގައެވެ.
އެމެރިކާގެ ރިޔާސީ އިންތިާޚާބުގެ އެންމެ ފަހުވަގުތުގައިވެސް، ދެޕާޓީގެ ކެޑީޑޭޓުންވެސް ގެންދެވީ ވަރުގަދައަށް ކެމްޕޭން ކުރައްވަމުންނެވެ. މިގޮތުން އެންމެ ފަހުދުވަހު ރައީސް ޓްރަމްޕް ވަނީ 4 ސްޓޭޓެއްގައި 5 އެއްވުމެއް ބާއްވާފައެވެ. ޖޯ ބައިޑްން ކެމްޕޭންގެ އެންމެ ފަހު ދުވަސް ހޭދަކުރެއްވީ ޕެންސެލްވޭނިއާ އަދި އޯހިއޯގައެވެ.
މި އިންތިޚާބުގައި އެމެރިކާގެ ރައްޔިތުންގެ މެދުގައި އެންމެ ބޮޑަށް ބަހުސްކުރެވެމުންދަނީ، އެގައުމުގެ އިގްތިސާދާއި، މިހާރު އެގައުމުގައި ހިގަމުންދާ ނަސްލީ ހަމަނުޖެހުންތަކުގެ އިތުރުން، މުޅި ދުނިޔެއަށް ކުރިމަތިވެފައިވާ ކޯވިޑް19 ކާރިސާގައި އެގައުމުގެ ސަރުކާރުން އަމަލު ކޮށްފައިވާ ގޮތާއި ގުޅޭގޮތުންނެވެ.
އިންތިޚާބުގެ އެންމެ ފަހުގެ ޚިޔާލު ހޯދުންތަކުން ދައްކާގޮތުގައި މިއިންތިޚާބުގައި ކުރީގައ އުޅެނީ ޑިމޮކްރަޓިކް ޕާޓީގެ ކެޑިޑޭޓް ޖޯބައިޑްންއެވެ.
