އިދިކޮޅު ފަރާތްތަކުން މާލެއާއި ރާއްޖޭގެ އެކި ކަންކޮޅުތަކުގައި ކިތަންމެ ވަރަކަށް ހަޅޭލަވައި މުޒާހަރާ ކުރަމުން ދިޔަ ނަމަވެސް މަސްތުވާތަކެތި ރާއްޖެއަށް އެތެރެކުރަން ދެން އެހާ ފަސޭހައެއް ނުވާނެކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.
އިދިކޮޅު ކޯލިޝަނުން މާލެއާއި ރާއްޖޭގެ އެކި ކަންކޮޅުތަކުގައި ކުރަމުންދާ ސިލްސިލާ މުޒާހަރާތަކާއި ގުޅިގެން މެމްބަރު ނިހާދު ވިދާޅުވީ އާންމު މެމްބަރުން ރުއްސުމަށްޓަކައި، އަވަށްޓެރި ޤައުމުތައް މަތިކޮށް، އެޤައުމުތަކުގެ ނަން ބޭނުންކޮށްގެން ކުރަމުންދާ މުޒާހަރާތަކަކީ ވަކި މަޤްސަދެއްގައި ކުރަމުންދާ މުޒާހަރާ ތަކެއްކަމަށެވެ. މިކަންކަމުގެ ސަބަބުން ޤައުމުގެ ތަރައްޤީއާއި، ހިންގަން ރާވާފައިވާ މަޝްރޫޢުތަކަށް ހުރަސް އެޅުމަކީ އެއްވެސް ހާލެއްގައި ކުރެވިގެން ވާނެކަމެއް ނޫންކަމަށް އޭނާ ވިދާޅުވިއެވެ.
މަގުތަކުގައި މުޒާހަރާކޮށް އަޑު ގަދަ ކުރަމުންދަނީ މިއަދު ރާއްޖެއަށް އެތެރެކުރެވޭ މަސްތުވާތަކެތީގެ މަގު ބަންދުވަމުންދާތީ ކަމަށާއި، ނަމަވެސް ކުރިން އެކަން ކުރެވުނުހާ ފަސޭހައިން ދެން އެކަން ނުވާނޭކަމަށް ނިހާދު ވިދާޅުވިއެވެ.
ކިޔާނެ އެއްޗެއް ނެތީމާ އަވަށްޓެރި ޤައުމުތަކާއި ޖައްސާލައިގެން ކަމަށް ދައްކައިގެން މެމްބަރުން ރުއްސައިގެން މަގުމައްޗަށް ނެރެ ޤައުމުގައި ހިންގަމުންދާ ތަރައްޤީގެ މަޝްރޫޢުތައް ހުއްޓުވަން އުޅުން ވަރަށް ކަޑަ! ކިތަންމެ ހަޅޭކެއް ލެވިޔަސް ދެން ޑްރަގް އެތެރެ ކުރުން އެހާ ފަސޭހައެއް ނުވާނެ.
– ނިހާދު ވިދާޅުވިއެވެ.
އިދިކޮޅު ޕްރޮގްރެސިވް ކޯލިޝަނުން ގެންދަނީ "އިންޑިއާ އައުޓް"ގެ ނަމުގައި ސިލްސިލާ ގިނަ މުޒާހަރާތަކެއް މާލެއާއި އަތޮޅުތެރޭގެ ގިނަ ރަށްތަކުގައި ކުރަމުންނެވެ. އެކޯލިޝަނުން ބުނެފައިވަނީ މުޒާހަރާތަކާއި އެއްވުންތައް ބާއްވަން ޖެހެނީ ރާއްޖޭގެ މިނިވަންކަން އިންޑިއާށްދީ، ރާއްޖޭގައި އިންޑިއާ ސިފައިން ތިބުމާއި ދެކޮޅަށް ކަމުގައެވެ. އަދި އިންޑިއާއިއެކު ހަދަމުންދާ ގޮތް ނޭގޭ އެއްބަސްވުނަތަކުގެ ސަބަބުން މިނިވަންކަމާއި ސިޔާދަތަށްބުރޫއަރާއި، ޤައުމުގެ ހަމަޖެހުން ގެއްލެމުންދާކަމަށެވެ.
އިދިކޮޅު ފަރާތްތަކުން ބާއްވާ ހަރަކާތްތަކުގައި ބައިވެރިވާ މީހުންގެ އަދަދު އެއްދުވަހުން އަނެއް ދުވަހަށް އިތުރުވެ، މުޒާހަރާތައް ވަނީ ބައިނަލް އަގުވާމީ މިޑިއާތަކުގެ ސަމާލުކަމަށްވެސް އައިސްފައެވެ. ނަމަވެސް ސަރުކާރުން ބުނަމުންދަނީ އިންޑިއާއާއިއެކު އޮތް ގުޅުމުން މިނިވަންކަމަށް އެއްވެސް އަސަރެއް ނުކުރާނެކަމަށެެވެ.
ކޮމެންޓު ފޮނުވާ