ސައުދީ ސަރުކާރުގެ ޚަރަދުގައި ބިނާކުރާ ކިންގް ސަލްމާން މިސްކިތަށް ދިވެހި ސަރުކާރުން ކުރަމުން އަންނަ ޚަރަދު ސަޢުދީ ސަރުކާރުން އަނބުރާ ދެއްވާނެކަމުގެ ފުރިހަމަ ޔަގީކަން އެބައޮތްކަމަށް ދިވެހި ސަރުކާރުން ހާމަކުރައްވައިފިއެވެ.
ކިންގ ސަލްމާން މިސްކިތަކީ ސަޢުދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒްގެ އެހީގެ ދަށުން ބިނާކުރާ މިސްކިތެކެވެ. ސަޢުދީ ސަރުކާރުގެ އެހީގައި ޢިމާރާތްކުރަމުން އަންނަ މިސްކިތް ޢިމާރާތްކޮށް ނިމި އެތައް ދުވަހެއް ވޭތުވެގެންދާއިރުވެސް މިސްކިތް ރަސްމީކޮށް ބޭނުންކުރަން އަދި ފަށާފައެއް ނުވެއެވެ. މިސްކިތް ނުނިމި މަސައްކަތް ދިގުލައިގެން ދިޔުމުގެ ކަންބޮޑުވުމާއެކު މިހާރުވަނީ އިތުރު ކަންބޮޑުވުމެއް ކުރިމަތިވެފައެވެ.
ސަޢުދީ ސަރުކާރުގެ ހިލޭ އެހީގެ ދަށުން މިސްކިތް ބިނާކުރަންފެށިނަމަވެސް މިސްކިތަށް ކުރާ ހޭދައިގެ ބޮޑުބައެއް ކުރަމުންދަނީ ދިވެހި ދައުލަތުގެ ބަޖެޓުންކަމަށް ބުނެ އެކަމުގެ ކަންބޮޑުވުން މިހާރު ވަނީ އިތުރުވެފައެވެ. މިކަމާއި ގުޅޭގޮތުން ރައްޔިތުންގެ މަޖިލީހުގެ ޖަލްސާގައި ދާންދޫ ދާއިރާގެ މެމްބަރު ޔަޢުޤޫބް ޢަބްދުﷲ ވަނީ ކިންގް ސަލްމާން މިސްކިތަށް ދައުލަތުގެ ބަޖެޓުން 80 އިންސައްތަ ޚަރަދުކުރަމުންދާކަމަށް ބުނެ އެކަމާއި ގުޅޭގޮތުން މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމާއި ސުވާލުކުރައްވާފައެވެ.
ސަލްމާން މިސްކިތް ހުޅުވަން މިހާރު ތައްޔާރުވަމުންދަނީ އަންނަ އަހަރުގެ ރޯދަ މަހަށެވެ. ސަރުކާރުން ވަނީ އެކި ފަހަރުގެ މަތިން ސަލްމާން މިސްކިތް ހުޅުމުގެ މަސައްކަތް މީގެ ކުރިން ވެސް ކޮށްފަ އެވެ. ނަމަވެސް މިސްކިތް ހުޅުވުން ތަފާތު ސަބަބުތަކާ ހެދި ވަނީ ލަސްވެފަ އެވެ. އެއީ އެ މިސްކިތަކީ ސައުދީ ރަސްގެފާނު ހަދިޔާ ކުރައްވާ މިސްކިތަކަށްވެ، އެ މިސްކިތް ހުޅުވަން ސައުދީގެ އިސް ބޭފުޅުން ރާއްޖެ ވަޑައިގަންނަވަން ބޭނުންފުޅުވާތީ އެވެ. އެ ދަތުރު ކުރަން ދަތިވެފައި ވަނީ ކޮވިޑްގެ ހާލަތު މުޅި ދުނިޔޭގައި ވެސް ގޯސްވެފައިވާތީ މިވަގުތު އެއް ގައުމުން އަނެއް ގައުމަށް ދަތުރުކުރުން ރައްކާތެރި ކަމަކަށް ނުވާތީ ކަމަށްވެސް ދިވެހި ސަރުކާރުން ބުނެއެވެ.
ސަޢުދީ ސަރުކާރާއި ގުޅިގެން އަންނަ ރަމަޟާން މަހަށް މިސްކިތް ހުޅުވުމަށް ސަރުކާރުން އަންނަނީ މަސައްކަތް ކުރައްވަމުންކަމަށް އިސްލާމިކް މިނިސްޓްރީން ވަނީ މީގެކުރިން ހާމަކުރައްވާފައެވެ. އޭގެކުރިންވެސް މިސްކިތް ހުޅުވުމަށް ގިނަ ތާރީޚުތަކެއް ދެއްވިނަމަވެސް އެކި ސަބަބުތަކާއި ހުރެެގެން ފަސްކުރަންޖެހިފައިވެއެވެ. އެހެންނަމަވެސް މިކަމާއި ގުޅޭ ޚާއްސަ ބައްދަލުވުންތަކެއް ބޭއްވުމަށް މިއަހަރުގެ އޯގަސްޓްމަހު ސަޢުދީ ސަރުކާރުގެ ވަފުދެއް ވަނީ ރާއްޖެއަށް ޒިޔާރައްކުރައްވާފައެވެ.
