މޫސުމާބެހޭ ބައްދަލުވުން، ކޮޕް26 ގައި ބައިވެރިވެވަޑައިގަތުމަށް އިނގިރޭސިވިލާތަށް ކުރެއްވި ދަތުރުފުޅު ނިންމަވާލެއްވުމަށްފަހު، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު މިއަދު މާލެ ވަޑައިގެންފިއެވެ.
ކޮޕް ސަމިޓް ބާއްވާފައިވަނީ ނޮވެމްބަރު 1 އިން 12 އަށް ސްކޮޓްލޭންޑްގެ ގްލާސްގޯވގައެވެ. މި ސަމިޓްގައި ރައީސް ނަޝީދު ވަނީ ދުނިޔޭގެ ވަރަށް ގިނަ ލީޑަރުންނާއި ބައްދަލުކުރއްވާފައެވެ. ނަމަވެސް ސަމިޓް ނިމުނުފަނުންވެސް ރައީސް ނަޝީދު ރާއްޖެ ވަޑައިނުގެ ވަނީ އިނގިރޭސިވިލާތުގައި މަޑުކުރައްވާފައެވެ.
ރައީސް ނަޝީދު ކޮޕް26 ސަމިޓަށް ކުރެއްވި ދަތުރުފުޅުގައި ވަނީ، ސީއެންއެންއިން ގެނެސްދޭ ކަނެކްޓް ދަ ވޯލްޑް ޕްރޮގްރާމުގައި މޫސުމަށް އަންނަ ބަދަލު ތަކާއި ގުޅޭ ގޮތުން ވާހަކަ ދައްކަވާފައެވެ. ރައީސް ނަޝީދު ވިދާޅުވީ، މޫސުމީ ބަދަލުތަކުގެ ހިރާސްތައް ކުރިމަތިވެފައިވާ ރާއްޖެ އެތައް ޤައުމެއްގައި އެމަނިކުފާނު ތަމްސީލު ކުރައްވާކަމަށެވެ. އެގޮތުން ކްލައިމެޓް ވަލްނަރަބަލް ފޯރަމަށް އިޝާރާތް ކުރައްވާ ރައީސް ނަޝީދު ވިދާޅުވީ، ރާއްޖެ ހިމެނިގެން 48 ޤައުމު ތަމްސީލު ކުރެވޭއިރު މިއިން ކޮންމެ ޤައުމަކީވެސް މޫސުމަށް އަންނަ ކޮންމެ ބަދަލަކުން ބޮޑެތި ގެއްލުންތަކެއް ވާނެ ޤައުމުތަކެއް ކަމަށެވެ.
އަދި ދުނިޔޭގެ ފިނިހޫނުމިން 1.2 ޑިގްރީއަށް މައްޗަށް ދިއުމުން، ރާއްޖޭއާއި ޖަރުމަންވިލާތާއި، އެމެރިކާ، ސާބިއާ އަދި އެންޓާޓިކާ ފަދަ ތަންތަނުގައި މިހާރު ވަމުންދާ ގޮތް ފެންނަމުންދާ ކަން ރައީސް ނަޝީދު ފާހަގަ ކުރެއްވިއެވެ. އަދި މިކަންކަމުގައި ރާއްޖޭގެ %0.001 ހިއްސާވެސް ދުނިޔޭގެ ނިސްބަތުން ނެތް ކަން އެމަނިކުފާނު ފާހަގަކުރެއްވިއެވެ.
އެމަނިކުފާނު ވަނީ މި ސަމިޓްގެ ހަވާސައިން މެމްބަރުންނަށް ޚާއްސަކޮށްގެން އެ ގައުމުގެ ގާނޫނު ހަދާ މަޖިލީހުގައި ކުރިއަށް ގެންދިޔަ ދަންފަޅީގައިވެސް ވާހަކަފުޅު ދައްކަވާފައެވެ. އެގޮތުން ވެށީގެ ހިމާޔަތުގައި ރާއްޖެއިން ކުރަމުންދާ މަސައްކަތުގައި ބައިވެރިވެވަޑައިގަތުމަށް ދުނިޔޭގެ ޤާނޫނު ހަދާ މަޖިލިސްތަކުގެ މެމްބަރުންނަށް ނަޝީދު ގޮވާލެއްވިއެވެ.
ނަޝީދު ވިދާޅުވީ ތިމާވެށި ހިމާޔަތް ކުރުމަށް ޤައުމުތަކުގެ މަޖިލީސްތަކުން ގިނަ މަަސައްކަތްތަކެއް ކުރެވިދާނެ ކަމަށެވެ. އަދި އެ މަސައްކަތްތައް ކުރުމުގައި ރާއްޖޭގެ ޤާނޫނު ހަދާ މަޖިލީހުގެ އެހީތެރިކަން ދުނިޔޭގެ ކޮންމެ ގައުމަކަށް ވެސް ލިބޭނެ ކަމަށް ނަޝީދު ވިދާޅުވިއެވެ. މޫސުމީ ބަދަލުތަކުން ރާއްޖެއަށް ލިބޭ ގެއްލުންތަކާ މެދު ކަންބޮޑުވުން ފާޅުކުރައްވާ ނަޝީދުވަނީ ރާއްޖޭގެ ރަށްތައް ގިރަމުންދާކަން ފާހަގަކުރައްވާފައެވެ. ނަޝީދު ވިދާޅުވީ ރާއްޖެ އަޑިއަށްދާތަން ބަލަން ހުންނަން އެމަނިކުފާނު ބޭނުންފުޅު ނުވާކަމަށާއި ގައުމު އަޑިއަށް ދިއުމުގެ ކުރިން ސަލާމަތްވުމަށް ކުރެވެން ހުރި ހުރިހާ މަސައްކަތެއް ކުރަމުން އަންނަކަމަށެވެ. އަދި އެކަމުގައި އެހެން ގައުމުތަކުގެ އެއްބާރުލުމަށް ވެސް ނަޝީދު އެދިވަޑައިގަތެވެ.
