އަރަބިއްޔާ ސްކޫލް ހިންގަމުން އަންނަ ޢިމާރާތުގައި ރެނދުލައި ބޮޑަށް ހަލާކުވަމުން ދާތީ އެ ޢިމާރާތުގެ އެސެސްމަންޓްތަކެއް ހެދުމަށް ބަޔަކާއި ހަވާލުކޮށްފައިވާކަމަށް އެޑިއުކޭޝަން މިނިސްޓްރީން ބުނެފިއެވެ.
އެޑިއުކޭޝަން މިނިސްޓްރީން ބުނީ އަރަބިއްޔާ ސްކޫލް ޢިމާރާތުގެ ކަންކަން އެމިނިސްޓްރީން ވަރަށް ގާތުން މޮނިޓަރކުރަމުން އަންނަކަމަށެވެ. މައްސަލަ އެމިނިސްޓްރީގެ ސަމާލުކަމަށް އައުމާއި ގުޅިގެން އިންޖިނިއަރުން ލައްވާ ޢަރަބިއްޔާ ސްކޫލް ޢިމާރާތުގެ ވިޝުއަލް އިންސްޕެކްޝަނެއް ހަދާފައިވާނެކަމަށް މިނިސްޓްރީން ބުންޏެވެ.
އިންސްޕެކްޝަން ރިޕޯޓުން ދައްކާގޮތުގައި ވަގުތުން ކުރަންޖެހޭ މަރާމާތުތައް އެނގޭނީ ސްޓްރަކްޗަރ އެސެސްމަންޓެއް ހަދައިގެންކަމަށާއި، އެކަމަށް 2 މަހެއްހާ ދުވަސް ނަގާނެކަމަށް މިނިސްޓްރީން ބުންޏެވެ. އަދި އެ މަސައްކަތް ބަޔަކާއި ހަވާލުކޮށްފައިވާކަމަށް މިނިސްޓްރީން ބުންޏެވެ.
މި އެސެސްމަންޓް ނިމޭހާ އަވަހަށް މަރާމާތުގެ މަސައްކަތް ފެށޭނެ. މިކަމާއި ގުޅިގެން ސީދާ މިނިސްޓަރ ވަނީ ބެލެނިވެރިންނާއި ބައްދަލުކޮށް މިކަމަށް މިނިސްޓްރީން ކުރަމުންދާ މަސައްކަތުގެ މަޢުލޫމާތު ދީފައި.
– އެޑިއުކޭޝަން މިނިސްޓްރީ
މިނިސްޓްރީން މިހެން ބުނެފައިވާއިރު، އަރަބިއްޔާ ސްކޫލް ހިންގަމުން އަންނަ ޢިމާރާތުގައި ރެނދުލައި ބޮޑަށް ހަލާކުވަމުން ދާތީ އެ ސްކޫލްގައި ކިޔަވަމުންދާ ދަރިވަރުން އެހެން ޢިމާރާތަކަށް ބަދަލުކޮށްދިނުމަށް ބައެއް ބެލެނިވެރިން ވަނީ ގޮވާލާފައެވެ.
ޢަރަބިއްޔާ ސްކޫލްގެ ޢިމާރާތުގައި ރެނދުލާފައި ހުރި ބައެއް ފޮޓޯތައް ސޯޝަލް މީޑިއާގައި އަންނަނީ ދައުރުވަމުންނެވެ. އެކަމުގެ ކަންބޮޑުވުން ފާޅުކުރަމުން ބައެއް ބެލެނިވެރިން ވަނީ، ފާޅުކޮށްފައެވެ.
ދީނީ ޢިލްމުވެރިޔާ ޑރ.މުޙައްމަދު އިޔާޟް ޢަބްދުއްލަޠީފް ވަނީ އެތަނުގެ ބައެއް ފޮޓޯތަކާއެކު ޓްވީޓްކުރައްވާ އެއީ ޢަރަބިއްޔާ ސްކޫލް ހިންގާ ޢިމާރާތުގެ ޙާލަތުކަމަށް ވިދާޅުވެފައެވެ. މިފަދަ ބިރުވެރި ޙާލަތެއްގައި ކުދިންނާއި ބެލެނިވެރިން ބައިތިއްބަވަން ނުހައްދަވާ އެހެން ޢިމާރާތަކަށް ސްކޫލާއި ކުދިން ބަދަލުކޮށް ދެއްވުމަށް އެޑިޔުކޭޝަން މިނިސްޓަރ ޑރ.އާއިޝަތު ޢަލީއާއި ނާއިބު ރައީސް ފައިސަލް ނަޞީމް ޓެގްކުރައްވާ ވިދާޅުވިއެވެ.
މިއީ ޢަރަބިއްޔާ ސްކޫލް ހިންގާ ޢިމާރާތުގެ ޙާލަތަކީ. މިފަދަ ބިރުވެރި ޙާލަތެއްގައި ކުދިންނާއި ބެލެނިވެރިން ބައިތިއްބަވަން ނުހައްދަވާ އެހެން ޢިމާރާތަކަށް ސްކޫލާއި ކުދިން ބަދަލުކޮށް ދެއްވާ. @aisthly @ibusolih @FaisalNasym pic.twitter.com/00a3Q9wwP1
— Dr.Mohamed Iyaz (@dr_iyaz) November 21, 2021
ކުރީގެ އިސްލާމިކް މިނިސްޓަރ ޑރ.މުޙައްމަދު ޝަހީމް ޢަލީ ސަޢީދުވެސް ވަނީ، އަލްމަދްރަސަތުލް ޢަރަބިއްޔަތުލް އިސްލާމިއްޔާގެ ޢިމާރާތައް ދިމާވެފައިވާ ޙާލަތާމެދު ކަންބޮޑުވުން ފާޅުކުރައްވާފައެވެ. އަދި ވީ އެންމެ އަވަސް ފުރުޞަތެއްގައި ދަރިވަރުން އަމާން މާޙައުލަކަށް ބަދަލުކުރުމަށާއި ޢަރަބިއްޔާއަށް އާއިމާރާތެއް އަޅަން، އާ ބަޖެޓްގައި ހިމެނުމަށް ވެސް ވަނީ ގޮވާލައްވާފައެވެ.
އަލްމަދްރަސަތުލްޢަރަބިއްޔަތުލްއިސްލާމިއްޔާގެ ޢިމާރާތައް ދިމާވެފައިވާ ޙާލަތާމެދު ކަންބޮޑުވުން ފާޅުކުރަން. އަދި ވީ އެންމެ އަވަސް ފުރުޞަތެއްގައި ދަރިވަރުން އަމާން މާޙައުލަކަށް ބަދަލުކުރުމަށާއި ޢަރަބިއްޔާއަށް އާއިމާރާތެއް އަޅަން، އާ ބަޖެޓްގައި ހިމެނުމަށް ވެސް ގޮވާލަން pic.twitter.com/tGa8CmH5XD
— Mohamed Shaheem Ali Saeed (@Mohamedshaheem1) November 21, 2021
އެޑިއުކޭޝަން މިނިސްޓްރީން ބުނީ ޢަރަބިއްޔާ ސްކޫލް ޢިމާރާތުގައި ރެނދުލާފައި ހުރުމުގެ ސަބަބުން އެ ސްކޫލް ޢިމަރާތުގެ އެސެސްމަންޓެއް ދެފަހަރަކު ހަދާފައިވާކަމަށެވެ. އެޑިއުކޭޝަން މިނިސްޓްރީން ވަނީ އެ ޢިމަރާތުގައި މަރާމާތުގެ މަސައްކަތްތަކެއް ކުރަންޖެހިފައިވާކަން މީގެ ކުރިންވެސް ހާމަކޮށްފައެވެ.
މިއީ ޢަރަބިއްޔާ ސްކޫލް ހިންގާ ޢިމާރާތުގެ ޙާލަތަކީ. މިފަދަ ބިރުވެރި ޙާލަތެއްގައި ކުދިންނާއި ބެލެނިވެރިން ބައިތިއްބަވަން ނުހައްދަވާ އެހެން ޢިމާރާތަކަށް ސްކޫލާއި ކުދިން ބަދަލުކޮށް ދެއްވާ. @aisthly @ibusolih @FaisalNasym pic.twitter.com/00a3Q9wwP1
— Dr.Mohamed Iyaz (@dr_iyaz) November 21, 2021
2013 ވަނަ އަހަރު ހުޅުވި ޢިމާރާތުގައި ޢަރަބިއްޔާގެ ދަރިވަރުންނަށް ކިޔަވައިދެމުން އަންނައިރު، މީގެ ކުރިން އެ ސްކޫލް އިންގީ ކުރީގެ އީޕީއެސް ސްކޫލް ހުންނަ ޢިމާރާތުގައެވެ. އަދި ޓާޓާ ފްލެޓް ހުންނަ ތަނުގައިވެސް ޢަރަބިއްޔާ ސްކޫލް ކުރިން ހިންގާފައިވެއެވެ.
