ފާއިތުވެދިޔަ އަހަރަކީ ހުރިހާ ގޮތަކުންވެސް ދުނިޔޭގެ ގައުމުތަކުގެ އިގްތިސާދުތަކުން ބޮޑެތި ބުރަތައް އުފުލި އަހަރެކެވެ. ގައުމުތަކުގެ ބޯޑަރުތައް ބަންދުކޮށް، ވިޔަފާރިތައް ހުއްޓުމަކަށް އައިސް، އަދި އޭގެ އިތުރުން ގައުމުތަކުގެ ސިއްޙީ ނިޒާމުތައް އިދަޖެހިގެން ދިޔަނުދީ ހިފެހެއްޓުމަށް ކުރަންޖެހުނު ބޮޑެތި ހޭދަތަކާއެކީ، ދުނިޔޭގެ ހުރިހާ ގައުމުތަކުގެ އިގުތިސާދުތައްވެސް އޮތީ އިނދަޖެހިފައެވެ.

މިގޮތުން ގައުމުތަކުން ކުރަން ޖެހުނު ހޭދަތަކާއި އަދި އިގުތިސާދުތަކަށް ކުރި ނުރަގަޅު އަސަރުތަކުގެ ނަތީޖާ އެކި ގައުމުތަކަށް ކޮށްފައިވަނީ އެކި މިންވަރަށެވެ. މި ގޮންޖެހުންތަކުގެ ނޭދެވޭ އަސަރު އިގްތިސާދުންތަކުން ދައްކާފައިވަނީ އިގްތިސާދުތަކުގެ ވަރުގަދަކަމާއި، އެކުލުންތެރިކަމާއި އަދި މުރަނަ ކަމުގެ މައްޗަށް ބިނާ ވެގެންނެވެ.

ހަމައެއާއެކު، ދުނިޔޭގެ ހުރިހާ ގައުމަކުންވެސް، ކޯވިޑްގެ އާލަމީ ވަބާގެ ނަތީޖާއެއްގެ ގޮތުން ލިބުނު އިގްތިސާދީ ގެއްލުންތަކުން އަރައިގަތުމުގައި އިގްތިސާދީ ސިޔާސަތުތަކަށް ބަދަލުގެނެސް، އިގްތިސާދު މަރުނުވެ، ދިރި ދުނިޔޭގައި ބޭއްވުމަށްޓަކާ އެކި ރޭވުންތައް ރާވާ، އިގްތިސާދީ ސިޔާސަތުތަކަށް ބޮޑެތި ބަދަލުތައް ގެނެސްފައިވެއެވެ. ބޭރު ގައުމުތަކާއި، މާލީ އިދާރާތަކުގެ ހިލޭ އެހީއާއި، ދިގުމުއްދަތުގެ ލޯނުތައް ނަގައިގެންނައި، ބޮންޑު ވިއްކައިގެންނާއި، އަދި އާންމު ރައްޔިތުންގެ މުހުތާދުތައް ފުއްދުމަށްޓަކާ، އިގްތިސާދުގެ ތެރޭގައި ދައުރުކުރާނޭ ފައިސާ ކުރު މުއްދަތުގައި ހޯދުމަށް ފައިސާ ޗާޕްކުރުން ފަދަ އިގްތިސާދީ އެތަކެއް ބަދަލުތަކެއް ގެނެސްފައި ވެއެވެ.

ނަތިޖާއެއްގެ ގޮތުން، ބައެއް ގައުމުތަކުގެ އިގްތިސާދުތަކަށް ވަގުތީ ހައްލު ހޯދިފައި އެބަ ހުއްޓެވެ. މިވަގުތައް ކައިގެން ބޮއިގެން އުޅެވޭނޭ މަގު ފަހިވެފައި އެބަހުއްޓެވެ. އެހެންނަމަވެސް، ދަރަނި އިންތިހާއަށް މަތިވެ، ފައިސާގެ އަގު ވެއްޓި، އިފްލޭޝަން މަތިވާން ފަށާ، ބޭރުފައިސާގެ އަގު އުފުލުން ފަދަ، ހަފަރާތުން އިގްތިސާދީ އުދަރެސް ބަނަކުރަން ފަށާފައިވާ ގައުމުތައްވެސް މިއަދު މަދެއް ނޫނެވެ.

ފައިސާ ޗާޕް ކުރުމުގެ ނުރައްކާ!

ގައުމުގެ އިގްތިސާދީ ހާލަތު އިދަޖެހިގެންދާ ދަނޑިވަޅުތަކުގައި ފައިސާ ޗާޕް ކުރުމަކީ ބައެއް ގައުމުތަކަށް މަޖުބޫރީ ހާލަތަކަށް ވެގެން ދެއެވެ. އެހެން ނަމަވެސް އެއީ ނާދިރު، އަދި ވަރަށް އާދަޔާ ޚިލާފް ހާލަތްތަކެއް މެދުވެރި ވުމުންނެވެ. މިސާލެއްގެ ގޮތުން އިރާން ފުދެއެވެ.

އެމެރިކާއިން އެތައް އަހަރެއް ވަންދެން އެގައުމާ ދެކޮޅަށް އަޅާފައިވާ ދަތިކުރުމުގެ ބޮޑެތި ފިޔަވަޅުތަކުގެ ނަތީޖާއެއްގެ ގޮތުން، ދައުލަތް ހިންގުމަށް އިރާނަށް ފައިސާ ޗާޕުކުރުން ނޫން ހައްލެއް ފެންނާން ނެތްކަމަށް އެގައުމުގެ ސެންޓްރަލް ބޭންކް އޮފް އިރާންގެ ޗެއަރމަން ވިދާޅުވެފައި ވެއެވެ. އަދި އޭގޭ ނަތީޖާ އެގައުމުގެ އިގްތިސާދުން ވަރަށް ދަތިގޮތަކަށް ދަނީ ފެންނަމުން ވެސްމެއެވެ.

ފައިސާ ޗާޕުކުރުމުން ނުކުންނަ އެންމެ ފުރަތަމަ އަދި އެންމެ ބޮޑު މައްސަލައަކީ، އިންފްލޭޝަން އެވެ. އިގްތިސާދުގައި އެބުރޭ ފައިސާގެ އަދަދު އިތުރުވެ، އަދި އެއާއި އެއްވަރަށް އުފެއްދުންތެރިކަން އިތުރުނުވެ، ތަކެތީގެ އަގު އުފުލިގެން ދިއުމެވެ. މަދު އަދަދެއްގެ ތަކެތި ފަހާ ގިނަ އަދަދެއްގެ ފައިސާއަށް ދުވަން ޖެހެނީއެވެ. އަދި އޭގެ ނަތީޖާއަކަށް ވެގެން ދަނީ، އާދައިގެ ރައްޔިތުންނަށް ލިބޭ މުސާރައިގެ "އަގު" ދަށްވެ، (އަތުގައި ހުންނަ ފައިސާގެ އަގެއް ނެތުން) އާންމުކޮށް ބޭނުން ކުރަން ހުންނަ ތަކެތީގެ އަގުތައް އުފުލި، ކެއިން ބުއިމަށްވެސް ކޮންމެ ދުވަހަކުހެން ކަހަލަ ގޮތަކަށް އާންމުކޮށް ބޭނުންވާ ތަކެއްޗަކީ އާންމު ރައްޔިތުންނަށް ފަސޭހައިން ގަނެވޭ އަގުގެ ތަކެއްޗަށް ވެގެން ނުދަނީއެވެ.

ފާއިިތުވެދިޔަ މާޒީތަކުގައި ދުނިޔޭގެ ބައެއް ގައުމުތަކުންވަނީ މި ތަޖުރިބާ ވަރަށްވެސް ހިތި ގޮތަކަށް ކޮށްފައެވެ. 2000ގެ އަހަރު ތަކުގައި ޒިންބާބުވޭގައި ކޮންމެ މަހެއްގެވެސް އިންފްލޭޝަން 80 ބިލިއަން އިންސައްތައަށް އުފުލިގެން ގޮސްފައި ވެއެވެ. އަދި އެންމެ ފަހުން އެމެރިކާ ޑޮލަރާ އަޅާކިޔާ، އެގައުމުގެ ފައިސާއަކީ އެއްވެސް އަގެއް ނެތް އެއްޗަކަށް ވެގެން ދިޔައެވެ.

1920ވަނަ އަހަރު ޖަރުމަނު ވިލާތަށް އައި "ހައިޕަރ އިންފްލޭޝަން"ގައި މީހުން މަގުތަކުގައި ގާޑިޔާތަކަށް ފައިސާ އަޅައިގެން އުފުލާފައިވާކަމަށް ތާރީޚީ ފޮތްތަކުން ފެންނާން އެބަހުއްޓެވެ.

ނަތީޖާއެއްގެ ގޮތުން، ދުނިޔޭގެ ކުރިއަރާފައިވާ ގައުމުތަކުގައި، ފައިސާ ދައުރުވުން (މަނީ ސަޕްލައި) ކޮންޓްރޯލް ކުރުމުގެ ޒިންމާ ހަވާލު ކޮށްފައި އޮންނަނީ އެގައުމުތަކުގެ ސެންޓްރަލް ބޭންކުތައް މިނިވަން މުވައްސަސާތަކުގެ ގޮތުގައި ކަނޑައަޅާ އެބޭންކުތަކާއެވެ. އެމެރިކާގައި މި މަސްއޫލިއްޔަތު ހަވާލުވެފައި އޮންނަނީ އެގައުމުގެ "ޔޫއެސް ފެޑެރަލް ރިޒާވް"އާއި އެވެ. އިގިރޭސިވިލާތުގައި "ބޭންކް އޮފް އިންގްލޭންޑް" އާއިއެވެ. ޔުރަޕްގެ އިއްތިހާދުގައި "ޔޫރަޕިއަން ސެންޓްރަލް ބޭންކް"އާއި އެވެ. ދިވެހިރާއްޖޭގައި ނަމަ "އެމްއެމްއޭ"އާއި އެވެ.

މިގޮތުން މި ބޭންކުތަކުން، އިގްތިސާދު މެނޭޖްކުރުމުގައި ސަރުކާރުތަކާ މުޢާމަލާތު ކުރިނަމަވެސް، މިއީ ސިޔާސީ ނުފޫޒު ނުފޯރާ އަމިއްލަ މިނިވަން މުވައްސަސާތަކުގެ ގޮތުގައި ކަޑައަޅާފައިވަނީ، އަންނަ އިގްތިސާދީ ގޮންޖެހުންތައް މެނޭޖް ކުރުމުގައި، އިގްތިސާދީ އާ ހޯދުމެއް، އާމްދަނީ ހޯދޭނެ އާ ވަސީލަތެއް ނުހޯދާ، ފައިސާ ޗާޕްކުރުންފަދަ ފަސޭހަމަގުތައް އިޚްތިޔާރު ކުރުމަށް ސަރުކާރުތަކުން ބޭނުންވެ، މިއުސޫލުން އަންނަ ޕްރެޝަރުތަކުން އިގްތިސާދުތައް މިންޖުކުރުމުގެ މަގުސަދުގައި ވެސްމެއެވެ.

އިންވެސްޓަރުންގެ އިތުބާރު ގެއްލި ބޮޑެތި ގެންޖެހުންތަކެއް ކުރިމަތިވާނެ!

އާންމު ގޮތެއްގައި، ގައުމުގެ ދިފާއީ ނިޒާމު ވަރުގަދަ ކުރުމާއި، ސިއްޙީ ހާލަތާއި، ތައުލީމީ ހާލަތު ކުރިއެރުވުން ފަދަ ގައުމީ ތަރައްގީއާއި ގުޅުންހުރި ކަންކަމަށްވުރެ ބޮޑަށް ސެންޓްރަލް ބޭންކުގެ ޝައުގުވެރިކަން ހުންނާނީ އިގުދިސާދުގެ ދުޅަހެޔޮ ކަމަށެވެ.

މިގޮތުން، ގައުމެއްގެ ސެންޓްރަލް ބޭންކުން ސީދާ ގޮތެއްގައި ސަރުކާރަށް ފައިސާ ދޫކުރަން ފަށައިފިނަމަ، އެގައުމެއްގެ  އިގްތިސާދަށް ކުރިމަތިވެގެންދާނެ އެންމެ ބޮޑެ އެއް ގޮންޖެހުމަކަށް ވެގެންދާނީ، އިންވެސްޓަރުންގެ އިތުބާރު ގެއްލިގެން ދިއުމެވެ. ސަބަބަކީ، ގައުމެއްގެ އިގްތިސާދީ ހަގީގީ ދުޅަހެޔޮކަން ފެނިގެންދާނީ، ފައިސާ ދައުރުވާ ނިސްބަތާއި އަދި އެކްސްޗޭންޖް ރޭޓުގެ މައްޗަށް ކަމަށްވާތީއެވެ.

މީގެ އިތުރު ތަފްސީލަކަށް ދާނަމަ، ސަރުކާރުން، އިގްތިސާދީ ހައްލެއްގެ ގޮތުގައި ފައިސާ ޗާޕުކުރުން އިޚްތިޔާރު ކޮށްފިނަމަ، އިންފްލޭޝަން މަތިވެ، އޭގެ ނަތީޖާއެއްގެ ގޮތުން، ސަރުކާރުން ވިއްކާ ބޮންޑުތަކުގެ އަގު ދަށްވެގެން ދާނެއެވެ. ސަބަކަކީ، ތަކެތީގެ އަގު އުފުލި، ފައިސާގެ އަގު ވެއްޓެން މެދުވެރިވާ ހާލަތުގައި، ސަރުކާރުން ބޮންޑު ގަނެގެގެން އޭގެއިން ނަފާ ހޯދުމުގެ ޝައުގުވެރިކަން އިންވެސްޓަރުންގެ މެދުގައި ކުޑަވެގެން ދާނެތީއެވެ. ނަތީޖާއަކަށް ވެގެންދާނީ އިންވެސްޓަރުންގެ ބާޒާރުގައި ބޮންޑު ވިއްކުން ސަރުކާރަށް ދަތިކަމަކަށް ވެގެން ދާނެއެވެ. މާނައަކީ، އިންޓަރެސްޓް ރޭޓް އިންތިހާއަށް މަތިކޮށްގެން މެނުވީ، ބަޖެޓް މެނޭޖްކުރުމަށްވެސް އަދި ދަރަނި ފޫބެއްދުމަށްވެސް ބޮންޑު ވިއްކުން ނުވަތަ އިންވެސްޓަރުންގެ ޝައުގުވެރިކަން ހޯދުން ސަރުކާރަށް ވެގެންދާނީ ދަތި ކަމަކަށެވެ.

އަދި، ސަރުކާރުން ފައިސާ ޗާޕުކޮށް، ތަކެތީގެ އަގު އުފުލުން (އިންފްލޭޝަން) އަތް ނުފޯރާ ފަށަށް ހިގައްޖެނަމަ، އަމިއްލަ ގައުމުގެ އިންވެސްޓަރުން އަތުންވެސް، އަދި ބައިނަލްއަގުވާމީ ވިޔަފާރީގެ ބާޒާރުންވެސް، އިންވެސްޓަރުން އަތުން ފައިސާ ލިބިގަތުން އެންމެފަހުން ވެގެންދާނީ މުސްތަހީލު ކަމަކަށެވެ.

މާނައަކީ، ދައުލަތުގެ ދަރަނި ފޫބެއްދުމަށް ނުވަތަ ތަރައްގީގެ މަޝްރޫޢުތައް ހުއްޓުމަށް އަޔަނުދިނުމަށްޓަކާ ނަމަވެސް، ސެންޓަލް ބޭންކުން ސަރުކާރަށް ފައިސާ ދޫކުރަން ފަށައިފިނަމަ، ފައިސާގެ އަގު ދަށަށް ގޮސް، އޭގެ ނޭދެވޭ އަސަރު އެކްސްޗޭންޖެ ރޭޓަށް ކޮށް، އާޚިރު ނަތީޖާއަކަށް ވެގެންދާނީ "ވެން މަސް ވެނަށް ކާންދިނުން" ކަމުގައެވެ. އަދި ޖުމްލަ ގޮތެއްގައި، ފައިސާ ޗާޕުކުރުމުން ލިބިދޭ ހައްލުތަކަށްވުރެ ގިނަ ފަހަރަށް އޭގެއިން އުފައްދާ މައްސަލަތައް އޮންނަނީ އިތުރުވެ، ގޮންޖެހުންތައް ބޮޑު ވެފައެވެ.

ރާއްޖޭގެ ހާލަތު!

ކޯވިޑްގެ އާލަމީ ވަބާގެ އަސަރު އެންމެ ބޮޑަށް ކުރި ދުނިޔޭގެ އިގްތިސާދުތަކުގެ ތެރޭގައި ދިވެހިރާއްޖެ ހިމެނެއެވެ. ސަބަބަީ ދިވެހި އިގްތިސާދުގެ ޟައީފްކަމެވެ. ފަތުރުވެރިކަމުގެ ސިނާއަތުގެ މައްޗަށް އެކަނި އިގުތިސާދުގެ ބޮޑުބައި ބަރޯސާވެފަ އޮންނަ އޮތުމެވެ. ފާއިތުވެދިޔަ ސަރުކާރުތަކަށް، ނުވަތަ އިގްތިސާދީ ވަޒީރުން، ދައުލަތަށް އާމްދަނީ އިތުރު ކުރާނެ އާ ވަސީތްލަތްތަލެއް އިޖާދު ކޮށްފައި ނެތުމުގެ ނަތީޖާއެއްގެ ގޮތުންނެވެ.

މިގޮތުން ކޯވިޑަށް ކުރަން ޖެހުނު ޚަރަދުތަކާއެކު އިގްތިސާދަށް ކުރިމަތިވީ ބޮޑެތި ގޮންޖެހުންތަކުން އަރައިގަތުމަށް ކުރަން ޖެހުނު މަސައްކަތްތަކުގެ ނަތީޖާއެއްގެ ގޮތުން ދައުލަތުގެ ދަރަނި މިވަނީ މިހާރު އަތް ނުފޯރާފަށަށް މަތިވެގެން ގޮސްފައެވެ.

2022 ވަނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް ހުށަހަޅުއްވަމުން ފިނޭން މިނސްޓަރު ވިދާޅުވެފައިވާ ގޮތުގައި، މިއަރު ނިމޭއިރު ދައުލަތުގެ ދަރަނި ހުންނާނޭ ކަމަށް ލަފާކޮށްފައިވަނީ 94 ބިލިއަން ރުފިޔާގައެވެ. މިއީ ޖިޑީޕީގެ ނިސްބަތުން 122 އިންސައްތައެވެ. އަދި ކުރިޔަށް އޮތް 2022 ވަނަ އަހަރު ނިމިގެން ދާއިރު ދައުލަތުގެ ދަރަނި 100 ބިލިއަން ފަހަނައަޅާ މަތިވެގެން ދާނެއެވެ.

މީގެ އިތުރުން ދެން އޮތީ ކޯވިޑް މެނޭޖުކުރުމަށް ފައިސާ ޗާޕް ކުރުމުގެ ވާހަކައެވެ.

ސަރުކާރުގެ ކޭޝްފްލޯ ހަމަޖެއްސުމަށްޓަކައި މަރުކަޒީ ބޭންކް (އެމްއެމްއޭ)ގެ ޕަބްލިކް އެކައުންޓުން ފައިސާ ނެގުމަށްޓަކައި ސަރުކާރުން އެދުނު އެއް އަހަރު ދުވަހުގެ ހުއްދަ ދޭން ރައްޔިތުންގެ މަޖިލީހުން އެންމެ ފުރަތަމަ ފާސް ކޮށްފައިވަނީ 2020 ވަނަ އަހަރުގެ އެޕްރިލް މަހުއެވެ.

އެފަހަރު އެއް އަހަރު ދުވަހުގެ ތެރޭގައި އެމްއެމްއޭ އިން 4.2 ބިލިއަން ރުފިޔާ ދަރަންޏަށް ނެގުމަށްޓަކައި ގާނޫނީ ގޮތުން ބޭނުންވާ ހުއްދަ ދިނުމަށް މަޖިލީހުން ފާސް ކޮށްފައި ވެއެވެ. އަދި އެއަށްފަހު، އިތުރަށް ފައިސާ ޗާޕުކުރަން ނުވަތަ އެމްއެމްއޭގެ ޕަބްލިކް އެކައުންޓުން އޯވަ ޑްރޯ ކުރުމުގެ ހުއްދަ ހޯދުމަށްޓަކައި، ދައުލަތުގެ ޚަރަދަށް ޒިންމާވުމުގެ ގާނޫނުގެ ވަކި މާއްދާތަކަކަށް އަމަލުކުރުން ހުއްޓާލާފައި އޮތް އޮތުން އެއް އަހަރުގެ މުއްދަތަކަށް އިތުރުކުރަން ރައްޔިތުންގެ މަޖިލީހުން ވަނީ މިއަހަރުގެ އެޕްރިލް މަހުގެ 25 ދުވަހު ފާސް ކޮށްފައެވެ.

އެއަށް ފަހު، އެންމެ ފަހުން، ޕަބްލިކް އެކައުންޓުން އޯވަ ޑްރޯ ކުރުމުގެ މުއަދަތު އެއް އަހަރަށް އިތުރު ކޮށް ދީފައިވި ނަމަވެސް، މިމުއްދަތު ހަމަ ނުވަނީސް، ރައްޔިތުންގެ މަޖިލީހުގެ ކޮމިޓީން މިވަނީ އަނެއްކާވެސް މުއްދަތު އެއް އަހަރަށް އިތުރު ކޮށްދީ، ފައިސާ ޗާޕްކުރެވޭނެ ލިމިޓްކަމަށް 2.5 ބިލިއަން ރުފިޔާ ކަނޑައަޅާ ދީފައެވެ.

ފާއިތުވެދިޔަ ދޮޅު އަހަރު ދުވަހުގެ ތެރޭގައި، ކޯވިޑުން ކުރިމަތިވީ ބޮޑެތި ގޮންޖެހުންތަކުން އަރައި ގަތުމުގައި ސަރުކާރުން މިވަނީ ތިން ފަހަރެއްގެ މަތީން ޕަބްލިކް އެކައުންޓުން އޯވަ ޑްރޯ ކުރުމުގެ ހުއްދަ ހޯދާ ފައިސާ ޗާޕުކުރަމުން ބަޖެޓް މެޖޭޖް ކުރުމަށް މަސައްކަތް ކޮށްފައެވެ.

އެހެންކަމުން، ފާއިތިވެގެންދާ ދެ އަހަރެއްހާ ދުވަހުގެ، ސަރުކާރުގެ އިގްތިސާދީ ސިޔާސަތުގެ ތެރެއިން، ފާހަގަވާން އޮތް މުހިންމު ދެ ކަމެއްގެ ގޮތުގައި ފެންނާން އޮތީ ބޮންޑު ވިއްކައިގެން ބަޖެޓް ޑެފިސިޓް ފޫ ބެއްދުމާއި، އަދި ފައިސާ ޗާޕްކޮށްގެން، ތައްރައްގީގެ މަޝްރޫއުތަކަށް ހޭދަކުމުން ގެންދިއުމެވެ. ދައުލަތުގެ މާލިއްޔަތަށް ނުކަތާވަރުގެ ތަރައްގީގެ ބޮޑެތި މަޝްރޫޢުތައް ކުރިޔަށް ގެންދިއުން މަޑުޖައްސާލުމުގެ ވިސްނުމެއް، އަދި މިއުސޫލުން ދައުލަތުން ކުރަމުންދާ ހޭދަތައް ކުޑަކުރުމުގެ ވިސްނުމެއް ސަރުކާރުގެ އިގްތިސާދީ ސިޔާސަތުގެ ތެރެއިން ފެނިގެނެއް ނުދެއެވެ.

ހައްލަކީ ކޮބާ؟

އެހެންކަމުން، ގުދުރަތީ ވަސީލަތްތައް ނެތް، ސިނާއީ މަސައްކަތްތެރިކަމުގެ ވަރުގަދަކަން ނެތް، އަދި އިންސާނީ ވަސީލަތްތަކުގެ ގޮތުންވެސް ބަލިކަށި ގައުމަކަށް ފައިސާ ޗާޕްކުރުމަކީ އިގްތިސާދީ ދަތިތަކުން އަރައިގަތުމަށް އޮތް ހައްލަކަށްވުރެ ބޮޑަށް، އިގްތިސާދަށް ކުރިމަތި ވެގެންދާނެ ބޮޑު މައްސަލައެކެވެ. ބައެއް ހާލަތްތަކުގައި، ފައިސާ ޗާޕްކުރުމުން، އިގްތިސާދުގައި ވަގުތީ ގޮތުން އެބުރޭ ފައިސާގެ އަދަަދު އިތުރުވެ، ތަރައްގީގެ މަޝްތޫއުތަކަށް އެވަގުތަކަށް ހޭދަކުރެވި، ސިޔާސަތު ރާވާ ފަރާތްތަކުގެ ސިކުޑިއަށް ވަގުތީ ލުއިތަކެއް ލިބިގެން ދިއުމަކީ އެކަށީގެންވާ ކަމެކެވެ.

އެހެންނަމަވެސް، އިގުތިސާދީ މިސިޔާސަތުން މިހާތަނަށްވެސް ގައުމަށް ކުރިމަތި ވެފައިވާ އިގްތިސާދީ މައްސަލަތަކަށް ހައްލު ހޯދާ ދީފައެއް ނުވެއެވެ. ޑޮލަރުގެ އަގު ދަށްވެގެން ނުދާތާ ދޮޅު އަހަރުވެގެން ދިޔައީއެވެ. ތަކެތީގެ އަގު ދަނީ އުފުލެމުންނެވެ. އަދި ފާއިތިވެދިޔަ 2 އަހަރުގެ މުއްދަތުގައި ޗާޕް ކުރެވިގެންދާ 6 ބިލިއަނެއްހާ ދިވެހި ރުފިޔާއަކީ، އެގެ ޒާތުގައި އިގްތިސާދަށް އިތުރު ނަފާވެރިކަމެއް ގެނުވާނެ ވަސީލަތަކަށް ނުވެ (ހަމަ އެކަނި ކުރެވޭ ހޭދައެއް)، މިއީ ކުރިޔަށް އޮތް މުއްދަތުގައި، ދައުލަތުން މިހާރުވެސް އުފުލަންޖެހިފައިވާ ދަރަނީގެ ބޮޑު ބުރައިގެ މައްޗަށް މުޅިގައުމުގެ އެންމެހާ ރައްޔިތުން އުފުލަންޖެހޭނޭ ބޮޑު އިގްތިސާދީ ބުރައްއަކަށް މެނުވީ ވެގެން ނުދާނޭ ކަމީ ކަށަވަރުވެ ޔަގީންވާ ކަމެކެވެ.

އެހެންކަމުން، އިގްތިސާދު ކުރިއަރާކަމުގެ ވާހަކަތައް ދެއްކުން މަދުކޮށް، ސިޔާސަތު ރާވާ ފަރާތްތަކުން މިއަދު ދައްކަން ޖެހިފައި އޮތް ވާހަކައަކީ، ދައުލަތަށް އާމްދަނީ އިތުރު ކުރެވޭނޭ ގޮތްތަކުގެ ވާހަކައެވެ. އިގްތިސާދީ އާ ސިނާއަތުތައް އުފަންކުރެވޭނޭ ގޮތްތައް ހޯދާ ބަލަން އެބަޖެހެއެވެ. ފަތުރުވެރިކަމުގެ ސިނާއަތުން "ދިޔަ ފެލާލާއިގެން" އެ ސިނާއަތުން ލިބޭ އެއްޗަކުން އެކަނި ކައިގެން ބޮއިގެން ތިބުމުގެ ވިސްނުން ދޫކޮށްލަން އެބަޖެހެއެވެ. އާ ވިސްނުމަކުން ނުވިސްނާ، ފައިސާ ޗާޕުކޮށްގެން އިގްތިސާދީ ގޮންޖެހުންތައް މިއަދު މެނޭޖް ކުރެވިދާނެއެވެ. އެހެންނަމަވެސް މާދަމާ ފެންނަމުންދަނީ ވަރަށްވެސް ބަނަކޮށެވެ.