ކުރީގެ ރައީސް ޢަބްދުﷲ ޔާމީންނަށް ފަސް އަހަރުގެ ޖަލު ޙުކުމް އިއްވެވި ފަނޑިޔާރުންގެ ބެންޗުގައި ހިމެނިވަޑައިގަންނަވާ ފަނޑިޔާރުންގެ އަޑުކަމަށް ބުނެ ލީކްވެފައިވާ އޯޑިއޯގައި ހިމެނޭ އަޑުތައް ރާއްޖެއިން ބޭރަށް ފޮނުވައިގެން ހެދި ތަހުލީލްތަކުން އެއީ ފޭކް އޯޑިއޯތަކެއްކަން ދައްކާފައިވާކަމަށް ފުލުހުން ބުނެފިއެވެ.
ފުލުހުން ބުނީ ލީކް ވެފައިވާކަމަށް ބުނާ އޯޑިއޯތައް މެލޭޝިއާއަށް ފޮނުވައިގެން ތަހުލީލްކޮށްފައިވާކަމަށާއި، އޭގެ ނަތީޖާ މިހާރު ލިބިފައިވާކަމަށެވެ. އަދި އޭގެ ނަތިޖާ ދައްކާގޮތުން އެ އޯޑިއޯތަކަކީ ޞައްޙަ އޯޑިއޯތަކެއް ނޫންކަމަށްވެސް ފުލުހުން ބުންޏެވެ. އަދި އެ އޯޑިއޯތަކުގެ ނަތީޖާ މިހާރު ވަނީ ކަމާ ގުޅުންހުރި ފަރާތްތަކާއި ހިއްސާކޮށްފައެވެ.
ފުލުހުން މިހެން ބުނެފައިވާއިރު، ކުވި ފަނޑިޔާރުންގެ އޯޑިއޯތަކުން ޤާޟީ އަލްއުސްތާޛު ޙުސައިން ފާއިޒު ރަޝާދުގެ އަޑު ދިމާވާކަމަށް ޖުޑީޝަލް ސަރވިސް ކޮމިޝަނުން ވަނީ ބުނެފައެވެ. ޖޭއެސްސީން ބުނީ އޯޑިއޯ އެނާލިސިސްގެ ނަތީޖާއިން އެނގޭ ގޮތުގައި ބައެއް މީޑިއާތަކުން ތުހުމަތު ރައްދުކުރި ތިން ފަނޑިޔާރުންގެ ތެރެއިން، ކްރިމިނަލް ކޯޓުގެ ގާޒީ އަލީ އާދަމް އާއި ޑްރަގް ކޯޓުގެ ގާޒީ މުހައްމަދު ސަމީރުގެ އަޑާ އެ އޯޑިއޯތަކުގައި ވާހަކަދައްކާފައިވާ މީހާގެ އަޑު ދިމާނުވާކަން ކަށަވަރުވާ ކަމަށެވެ. އަދި ގާޒީ އަލީ އާދަމް އާއި މަހައްމަދު ސަމީރުގެ މައްޗަށް އުފައްދާފައިވަނީ ދޮގު ތުހުމަތުތަކެއްކަން ފާހަގަކޮށް އެ ދެ ފަނޑިޔާރުންގެ މައްޗަށް ތުހުމަތުކުރެވޭ މައްސަލައެއް ނެތްކަމަށް އެ ކޮމިޝަނުން ނިންމާފައިވާ ކަމަށެވެ.
ކްރިމިނަލް ކޯޓުގެ ގާޒީ ހުސައިން ފާއިޒު ރަޝާދުގެ އޯޑިއޯކަމަށް ބުނާ އޯޑިއޯއަކީ ވެސް ޓެމްޕަރ ކޮށްފައިވާ އޯޑިއޯއެއް ކަމަށް އެ ބަޔާނުގައި ބުނެފައިވެއެވެ. އެ އޯޑިއޯގައި އިވެނީ ގާޒީ ފާއިޒުގެ އަޑުކަމަށް އޭނާ އިންކާރު ކުރިކަމުގައި ވިޔަސް، އޯޑިއޯގެ އަޑާ އޭނާގެ އަޑު ދިމާވާކަމަށް އޯޑިއޯ އެނަލެސިސްއިން ވަނީ ކަނޑައަޅާފައެވެ. އެހެންކަމުން، ޖޭއެސްސީން ވަނީ އެ މައްސަލަ ތަހުގީގު ކުރަން ނިންމާ ތަހުގީގު ކޮމެޓީއެއް އެކުލައިލައިފައި ކަމަށް ޖޭއެސްސީން ނެރުނު ބަޔާނެއްގައިވެއެވެ. ބަޔާނުގައި ބުނެފައިވެއެވެ.
ގާޒީ ފާއިޒުގެ އަޑާ ދިމާވާ އޯޑިއޯގައި ދައްކާފައިހުރި ވާހަކަތަކަށް ބާލައިރު، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް ކްރިމިނަލް ކޯޓުގައި ހިންގި ޝަރީއަތާ ގުޅިގެން އެއްވެސް ފަރާތަކުން އެއްވެސް ފަނޑިޔާރަކާ ބައްދަލުކޮށްފައިވާކަމަށް، ނުވަތަ ބައްދަލު ކުރަން އެދިފައިވާކަމަށް ނުވަތަ އެ ޝަރީޢަތަށް ނުފޫޒުހިންގުމަށް އެއްވެސް މަސައްކަތެއްކޮށްފައިވާކަމަށް ބުނެފައި ނުވާކަން ފާހަގަކުރެވޭ ކަމަށް ޖޭއެސްސީގެ ބަޔާނުގައިވެއެވެ.
ތިން ޤާޞީއެއްގެ ލީކުވެފައިވާ އޯޑިއޯތަކުގެ މައްސަލައިގައި، އޯޑިއޯ ތަހުލީލް ކުރުމަށް ފުލުހުންގެ ތަހުގީގް ގޮސްފައިވާ ހިސާބެއް ބެލުމަށް މިއަދު އިދިކޮޅު ކޯލިޝަނުން ފުލުސް އޮފީހަށް ދިއުމުން ފުލުހުން އިދިކޮޅު ކޯލިޝަނާއި ބައްދަލުކޮށްފައެއް ނުވެއެވެ.
