މާދަމާ ބޭއްވުމަށް ހަމަޖެހިފައިވާ އެމެރިކާގެ ރިޔާސީ އިންތިޚާބުގައި ވާދަކުރާ ދެކެޑިޑޭޓުން ކަމުގައިވާ މިހާރުގެ ރައީސް ޑޮނަލްޓް ޓްރަމްޕާއި އަދި ކުރީގެ ނާއިބު ރައީސް ޖޯ ބައިޑަން ކެންޕޭންގެ އެންމެ ފަހުގެ ހަރަކާތްތައް ފައްޓަވައިފިއެވެ.
ދެބޭފުޅުންވެސް ގެންދަވަނީ އެންމެ ވާދަވެރިކަން ބޮޑު ސްޓޭޓުތަކުގައި ކެމްޕޭން އެއްވުންތައް ކުރިޔަށް ގެންދަވަމުންނެވެ.
މިގޮތުން ޖޯ ބައިޑްން ޕެންސެލްވޭނިއާ އަދި އޯހިއޯގައި ކެމްޕޭން ކުރައްވަމުން ގެންދަވާއިރު ޓްރަމްޕް ގެންދަވަނީ ޕެންސަލްވޭނިއާ، ވިސްކަންސިންގ، މިޗިގަން އަދި ނޯތު ކެރޮލިނާގައި ކެމްޕޭން ކުރައްވަމުންނެވެ.
އަންގާރަ ދުވަހު ބޭއްވުމަށް ހަމަޖެހިފައިވާ މި އިންތިޚާބުގެ ހުރިހާ ޚިޔާލު ހޯދުމުގެ ވޯޓަކުންވެސް ބޮޑުތަނުން ކުރީގައި އުޅުއްވަނީ ޑިމޮކްރަޓިކް ޕާޓީގެ ފަރާތުން ވާދައްކުރައްވާ ކެޑިޑޭޓް، އެމެރިކާގެ ކުރީގެ ނާއިބުރައީސް ޖޯ ބައިޑްންއެވެ.
އެހެންނަމަވެސް، ވާދަވެރިކަން ބޮޑު ބައެއް ސްޓޭޓުތަކުގައި ދެ ކެޑިޑޭޓުންގެ ދެމެދުގައިވާ ފަރަގު ވަރަށް ކުޑަކަމަށް މަސްރަހު ދިރާސާކުރާ ފަރާތްތަކުން ދަނީ ބުނަމުންނެވެ.
އެމެރިކާގެ ރިޔާސީ ނިޒާމު ހަމަޖެހިފަ އޮންނަގޮތުން އިންތިޚާބު ކާމިޔާބު ކުރާ ކެޑިޑޭޓަކު ކަނޑައެޅިގެން ދަނީ ވޯޓު ލާމީހުންގެ އަދަދުން ކުރި ހޯދައިގެނެއް ނޫނެވެ. މީގެ ބަދަލުގައި އިންތިޚާބު ކާމިޔާބު ވެގެންދަނީ ސްޓޭޓުތަކުގަ ވޯޓުލާ މީހުންގެ ނިސްބަތުން ކުރިހޯދާ، ގިނަ ސްޓޭޓްތައް ކާމިޔާބު ކުރާ ކެޑިޑޭޓެކެވެ. މިގޮތުން އެކި ސްޓޭޓްތަކަށް ކަޑައެޅިފައިވާ އިލެކްޓޯރަލް ވޯޓުތައް އެއްކޮށްލުމުން ބޮޑެތިބައެއް ސްޓޭޓްތައް ކާމިޔާބުކުރާ ކެޑިޑޭޓަކަށް އިންތިޚާބު ކާމިޔާބު ކުރުމުގެ ފުރުސަތު ބޮޑު ވެގެން ދެއެވެ.
މިގޮތުން ރިޔާސީ އިންތިޚާބު ކާމިޔާބު ކުރުމަށްޓަކާ އެމެރިކާގެ ހުރިހާ ސްޓޭޓްތަކުގެ މެދުގައި ބަހާލެވިފައިވާ 538 އިލެކްޓޯރަލް ވޯޓުގެ ތެރެއިން 270 ވޯޓު ކާމިޔާބު ކުރަން ޖެހެއެވެ.
ނޮވެމްބަރު މަހުގެ 3 ވަނަ ދުވަހު ބޭއްވުމަށް ހަމަޖެހިފައިވާ މިއިންތިޚާބުގައި، ދުރާލާ ވޯޓުލުމަށް ހުޅުވާލެވުނު ފުރުސަތުގައި، ޕޯސްޓުގެ ޒަރީޢާއިން މިހާތަނަށް އައިއިރު 98 މިލިއަން މީހުން ވަނީ ވޯޓު ލައިފައެވެ. މި އަދަދަށް ބަލާއިރު ފާއިތުވެދިޔަ އެއް ގަރުނުގެ ތެރޭގައިވެސް އެމެރިކާގައި އެންމެ ގިނަ އަދަދަކަށް ވޯޓުލާން މީހުން ނިކުންނަ އިންތިޚާބަށް މިއިންތިޚާބު ވުން ވަރަށް ގާތެވެ.
މިއަހަރުގެ ރިޔާސީ އިންތިޚާބު މިބައްދަލު ކުރީ މުޅި ދުނިޔެވެސް ކޯވިޑް19 ކާރިސާގެ ނުރައްކަލުގެ ތެރޭގައި ވަނިކޮށެވެ. އަދި ވަކިން ޚާއްސަކޮށް މި ބަލީގައި އެމެރިކާގެ ދެލައްކައަށްވުރެ ގިނަ މީހުން މަރުވެފައި ވަނިކޮށެވެ. ހޯމަ ދުވަހު އެކަނިވެސް އެމެރިކާގައި 81،000 އަށްވުރެ ގިނަ މީހުންވަނީ މިބައްޔަށް ޕޮޒިޓިވް ވެފައެވެ.
އާދިއްތަ ދުވަހު އެމެރިކާގެ 6 ސްޓޭޓެއްގައި ކެންޕޭން ކުރެއްވުމަށްފަހު ހޯމަދުވަހު ރައީސް ޓްރަމްޕް ވަނީ އިތުރު 4 ސްޓޭޓެއްގައި ކެމްޕެން ކުރައްވާފައެވެ. މިގޮތުން ނޯތު ކެރޮލިނާގައި ތާއީދުކުރާ ފަރާތްތަކާއި ވާހަކަ ދައްކަވަމުން ޓްރަމްޕް ވިދާޅުވެފައިވަނީ ކުރިޔަށް އޮތް އަހަރު ވެގެންދާނީ އެމެކާގެ މުޅި ތާރީޚުގައިވެސް އިގްތިސާދީގޮތުން އެންމެ ފާގަތި އަހަރުކަމުގައެވެ.
ހޯމަދުވަހު ޖޯ ބައިޑްން ކެމްޕޭން ކުރައްވާފައިވަނީ ޕެންސެލްވޭނިއާގައެވެ. މި ސިޓީގެ ޕިޓްސްބާގުގައި ބައިޑްން ބޭއްވި ކްމެޕޭން އިވެންޓުގައި އެމެރިކާގެ މަޝްހޫރު ލަވަކިޔުންތެރިޔާ ލޭޑީ ގާގާ ވަނީ ބައިޑްއަށް ތާއީދު ކުރާކަން ހާމަ ކުރައްވާފައެވެ. އަދި މަޝްހޫރު މިއުޒިކީ ފަންނާނު ޖޯން ލެޖެންޑް ވަނީ ބައިޑްންގެ ރަނިންގ މޭޓު ކާމިލާ ހެރިސްއާއި އެކީ ކެމްޕޭން ކުރައްވާފައެވެ.
ބައިޑްންގެ ކެމްޕޭން އެންމެ ފަހުގެ މަންޒިލެއްގެ ގޮތުގައި އެމެރިކާގެ އޯހިއޯ ސްޓޭޓުގައި ސަޕޯޓަރުންނާއި މުޚާތަބުކޮށް ބައިޑްން ވިދާޅުވެފައިވަނީ މިއިންތިޚާބަކީ އެމެރިކާގެ ފުރާނައާއި ގުޅިފައިވާ އިންތިޚާބެއް ކަމުގައެވެ. އަދި ވިދާޅުވީ މިއީ ޓްރަމްޕް ދަބަހަށް އެއްޗިހި އަޅުއްވައިގެން ދުރަށް ވަޑައިގަންނަވަންވީ ވަގުތު ކަމަށާއި، ޓްރަޕްގެ ޓުވީޓުތަކާއި، ނަފްރަތާއި އަދި ޓްރަމްޕް އެމެރިކާގެ ރައްޔިތުންގެ މެދުގައި އުފެއްދި ރުޅިވެރިކަމަށް އެމެރިކާގެ ރައްޔިތުން ނޫނެކޭ ބުނާނެކަމަށެވެ.
