ރާއްޖޭގައި އަވަށްޓެރި ބައެއް ޤައުމުތަކާއި ދެކޮޅަށް ހިންގަމުންދާ ހަރަކާތްތަކަކީ އޭގައިން ނުބައި އަސަރު ރާއްޖެއަށް ކޮށްފާނެ ކަމެއް ކަމަށާއި، އެފަދަ ހަރަކާތްައް ހުއްޓުވެންޖެހޭ ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.

ވައްޑެ މިފަދައިން ވިދާޅުވީ އިދިކޮޅު ފަރާތްތަކުން އިންޑިއާ އައުޓް ނަމުގައި ހުންގަމުންދާ ކެމްޕެއިން ފުޅާކޮށް މާލެއާއި އަތޮޅު ތެރޭގައިވެސް ހަރަކާތްތައް ފުޅާކޮށްފައިވާ ދަނޑިވަޅެއްގައެވެ. ވައްޑެ ވިދާޅުވީ އަވަށްޓެރި ޤައުމުތަކާއި ދެކޮޅަށް ހިންގޭ ހަރަކާތްތަކަކީ އެކަމުން ނޭދެވޭ އަސަރުތަކެއް ރާއްޖެއަށް ކޮށްފާނެ ކަމެއްކަމަށެވެ. އަވަށްޓެރި ޤައުމުތަކާއި ޖެހިގަނެގެން ކުރެވޭނެ ކަމެއް ނެތްކަމަށް ވައްޑެ ވިދާޅުވިއެވެ. އަދި މިފަދަ ހަރަކާތްތަކަކީ ވަރަށް ދަށް ފެންވަރުގެ ހަރަކާތްތަކެއްކަމަށްވެސް ވަހީދު ވިދާޅުވިއެވެ.

އިންޑިޔާ އައުޓް، ލަންކާ އައުޓް، ބަނގްލަދޭޝް އައުޓް. މިބާވަތުގެ ބަސްމަގު ބޭނުންކޮށްގެން އަވައްޓެރި ޤައުމުތަކާ ޖެހިގަންނަން ހިންގާ ކެމްޕޭނުތަކަކީ ދިވެހީން ބަދުނާމުކޮށް ދުނިޔެއިން އެކަހެރި ކުރުވަން މަދު ބަޔަކު ހިންގާ ވަރަށް ދަށްފެންވަރުގެ ހަރަކާތްތަކެއް.

– ވައްޑެ ވިދާޅުވިއެވެ.

ވައްޑެ ވިދާޅުވީ ނުރުހޭ ކޮންމެ ފަހަރަކު ޤައުމުތަކާއި ދެކޮޅަށް ވަރުގަދަ ކެމްޕެއިންކޮށް އެކި ހަރަކާތް ހިންގުމަކީ ބުއްދި ވެރި ގޮތެއް ނޫންކަމަށެވެ. އެހެން ޤައުމުތަކުގައި ރާއްޖެއާއި ދެކޮޅަށް ހަރަކާތްތައް ހިންގާނަމަ އެކަމުގެ ނުރަނގަޅު އަސަރު ރާއްޖެއަށްވެސް ކުރާނެކަން ގަބޫލުކޮށް މިފަދަ ނާތަހުޒީބު އަމަލުތަކާއި ދުރުވާންޖެހޭކަމަށް ވައްޑެ ވަނީ ވިދާޅުވެފައެވެ.

އެހެން ޤައުމެއްގެ ބަޔަކު ‘މޯލްޑިވްސް އައުޓް’ ގޮވަން އަޅުގަނޑުމެން ނުރުހޭފަދައިން، އެޤައުމު ތަކުގެ ރައްޔިތުންނަށްވެސް މިފަދަ ކަންކަމުން އަސަރުކުރާނެ. މީގެ ނުރަގަޅު އަސަރާ ދިވެހީންނަށްވެސް ކުރިމަތިލާން ޖެހިދާނެ. މިފަދަ ކަންކަން ހުއްޓުވެން ވާނެ.

– ވައްޑެ ވިދާޅުވިއެވެ.

ވައްޑެ މިފަދައިން ވިދާޅުވިއިރު އިދިކޮޅު ކޯލިޝަނުން ވަނީ މިއަދުވެސް މާލޭގައި ބޮޑު ހިނގާލުމެއް ބާއްވަން ނިންމާފައެވެ. މި ހިނގާލުމަކީވެސް ރާއްޖޭގައި ތިބި އިންޑިއާ ސިފައިން ބޭލުމަށާއި، އިންޑިއާއާއިއެކު ހަދާފައިވާ ގޮތް ނޭގޭ އެއްބަސްވުންތައް ހާމަކުރުމަށް ގޮވާލައި ބާއްވާ ހިނގާލުމެކެވެ.