ކަސްޓަމްސް އޮފިސަރުންގެ 400 މިލިއަން ރުފިޔާގެ މާލީ މައްސަލައާ ގުޅިގެން، ކަސްޓަމްސްގެ އިސްވެރިން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީ (241 ކޮމިޓީ) އަށް ހާޒިރުކުރުމަށް ނިންމައިފިއެވެ.
މި މުހިންމު ބައްދަލުވުން އޮންނާނީ އަންނަ ހަފުތާގެ ބުރާސްފަތި ދުވަހުގައެވެ. މި ދުވަހަކީ މަޖިލީހުގެ އެހެނިހެން މަސައްކަތްތަކާ ގުޅިގެން ދައުރުން ބޭރުގައި ބާއްވާ ޖަލްސާއެއްގެ ދުވަސް ވެސް މެއެވެ. ކަސްޓަމްސްގެ އިތުރުން މި ބައްދަލުވުމަށް ދިވެހި ފުލުހުންގެ ޚިދުމަތާއި ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓްރީގެ އިސްވެރިން ވެސް ހާޒިރުކުރުމަށް ވަނީ ހަމަޖެހިފައެވެ.
މަޖިލީހުގެ ނައިބު ރައީސް އަޙްމަދު ނާޒިމް ވިދާޅުވި ގޮތުގައި މި ތިން އިދާރާގެ ވެރިން ހާޒިރުކުރެވެނީ ހިޔާނާތުގެ މައްސަލައިގެ އިތުރުން ކަސްޓަމްސްގެ ބޮންޑެޑް ވެއަރހައުސްއިން ގެއްލުނު ސިނގިރޭޓުގެ މައްސަލައާ ގުޅޭގޮތުން ސުވާލުކުރުމަށެވެ.
މި މައްސަލައިގައި ފުލުހުންގެ ތަޙުޤީޤުތައް އަމާޒުވެފައިވަނީ ކަސްޓަމްސްގެ އޮފިސަރުންގެ މަނީ ލޯންޑަރިންގ، ހިޔާނާތް އަދި ރިޝްވަތު ނެގުމުގެ ތުހުމަތުތަކާ ގުޅޭގޮތުންނެވެ. އިތުބާރުހުރި މަޞްދަރެއްގެ މަޢުލޫމާތު ދައްކާގޮތުގައި 400 މިލިއަން ރުފިޔާ ދައުރުވެފައިވަނީ ކަސްޓަމްސްގެ 10 އޮފިސަރެއްގެ އެކައުންޓުތަކުގައެވެ. ނަމަވެސް މިހާރު ތަޙުޤީޤު ކުރެވެމުންދަނީ އޭގެތެރެއިން 3 އޮފިސަރެއްގެ މައްސަލައެވެ. މި މައްސަލައާ ގުޅިގެން ކަސްޓަމްސްގެ އެއް އޮފިސަރެއްގެ ރިޓަޔަރމަންޓް ވަނީ މަޑުޖައްސާލެވިފައެވެ.
