މަޖިލީހުގެ ތިންވަނަ ދައުރުގެ މަސައްކަތްތައް މިދިޔަ މަހުގެ 12 ވަނަ ދުވަހު ނިމުނު ނަމަވެސް، އިތުރު މަސައްކަތްތަކެއް ހުރުމާ ގުޅިގެން ދައުރުން ބޭރުގެ ޖަލްސާތަކެއް ބޭއްވުމަށް ނިންމާއިފިއެވެ. މި ގޮތުން މި މަހުގެ 16 އަދި 20 ވަނަ ދުވަހު ދައުރުން ބޭރުގެ ޖަލްސާތައް ބޭއްވުމަށް ހަމަޖެހިފައިވާ ކަމަށް މަޖިލީހުގެ ނައިބު ރައީސް އަހުމަދު ނާޒިމް ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައި ވެއެވެ.
މި ޖަލްސާތަކުގައި މައިގަނޑު ގޮތެއްގައި އިލެކްޝަންސް ކޮމިޝަންގެ ހުސްވެފައިވާ ދެ މަޤާމަށް މެންބަރުން އައްޔަންކުރުމުގެ މަސައްކަތް ކުރިއަށް ގެންދިއުމަށް ވަނީ ހަމަޖެހިފައެވެ. މި ދެ މަޤާމު ހުސްވެފައިވަނީ އަލީ ނަޝާތު އަދި މުހައްމަދު އާސިފް މިދިޔަ ނޮވެމްބަރު 25 ވަނަ ދުވަހު މަޤާމުން ވަކިކުރުމާ ގުޅިގެންނެވެ.
އިލެކްޝަންސް ކޮމިޝަންގެ ޤާނޫނުގައި ބަޔާންކޮށްފައިވާ ގޮތުން، މެންބަރުކަމުގެ މަޤާމެއް ހުސްވާތާ 60 ދުވަހުގެ ތެރޭގައި އެ މަޤާމަށް މެންބަރަކު އައްޔަންކުރަންޖެހެއެވެ. މަޖިލީހުގެ އާ ދައުރު ފެށުމަށް ހަމަޖެހިފައިވަނީ ފެބްރުއަރީ 1 ވަނަ ދުވަހު ކަމަށްވާތީ، މި މުއްދަތުގެ ތެރޭގައި މެންބަރުން އައްޔަންކުރުމަށްޓަކައި ދައުރުން ބޭރުގެ ޖަލްސާތައް ބާއްވަން ޖެހިފައިވެއެވެ.
ހުސްވެފައިވާ މަޤާމުތަކަށް ރައީސުލްޖުމްހޫރިއްޔާ ހުށަހަޅުއްވާފައިވަނީ ހިއުމަން ރައިޓްސް ކޮމިޝަންގެ ކުރީގެ ނައިބު ރައީސް މުހައްމަދު ޒާހިދު އަދި ހޯމްލޭންޑް މިނިސްޓްރީގެ ކުރީގެ ޕަރމަނަންޓް ސެކްރެޓަރީ އަބްދުއްރަހްމާން ސަލާހު ރަޝީދުގެ ނަންފުޅެވެ.
