1988ގެ ނޮވެމްބަރު 3ގައި ރާއްޖެއަށް ދިން ޓެރެރިސްޓް ހަމަލާ ނާކާމިޔާބުކޮށް ނަސްރުހޯދީ ދިވެހި ސިފައިން ކަމަށާއި އިންޑިއާ ސިފައިންގެ އެހީ ލިބުނީ އެދުވަހުގެ ހަނގުރާމަ ނިމުނު ފަހުން ކަމަށް 2023 ގެ ރިޔާސީ އިންތިޚާބުގައި ވާދަކުރައްވާކަން އިއުލާނު ކުރައްވާފައިވާ ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.
ސިފައިގެ މީހެއްގެ ގޮތުގައި ހުރެ 3 ނޮވެމްބަރުގެ ހަމަލާ ތަޖުރިބާ ކުރެއްވި އުމަރަށް "ޚަބަރު" އޮންލައިނުން ދެންނެވި ސުވާލަކަށް ޖަވާބު ދެއްވަމުން ވިދާޅުވީ، އެދުވަހުގެ އެ ބިރުވެރި ކަމާއިއެކު ވަނީ ކީއްކަން ނޭނގޭ ހާލުގައި ވެސް ދުޝްމަނުންނާ ކުރިމަތިލައި ވަރުގަދައަށް ހަނގުރާމަކޮށް ދުޝްމަނުން ބަލިކުރީ ސީދާ ދިވެހި ސިފައިން ކަމަށެވެ. ނަމަވެސް އިންޑިއާގެ އަސްކަރީ އެހީއަށް އެދުމުން ރަހީނުން މިނިވަންކޮށް ފިލައިގެންދިޔަ ޓެރަރިސްޓުން ހޯދުމުގައި ބައިނަލްއަޤްވާމީ ކަނޑުގެ ސަރަހައްދުގައި އިންޑިއާއިން ވެދިން އެހީ ޝުކުރާއިއެކު ފާހަގަ ކުރަން ޖެހޭކަމަށް އުމަރު ވިދާޅުވިއެވެ.
ނޮވެމްބަރު ތިނެއްގެ ނަސްރު ދިވެހިން ފާހަގަކުރަންޖެހޭ މައިގަނޑު ސަބަބަކީ މިއީ ދިވެހި ސިފައިން ހުއްޓުވާލި ހަމަލާއަކަށް ވުން ކަމަށް އުމަރު ވިދާޅުވިއެވެ. އަދި ދިވެހި ސިފައިން ހުއްޓުވާލި މި ހަމަލާއަކީ ދިވެހިންގެ މިނިވަން ކަމާއި އަމިއްލަ ވަންތަކަން ގެއްލޭފަދަ ހަމަލާއެއް ކަމަށާއި މިއީ ރާއްޖެ ދެމިއޮތްހާ ހިނދަކު ފާހަގަކުރަން ޖެހޭ ކަމެއް ކަމަށް އުމަރު ވިދާޅުވިއެވެ.
" ބައެއް މީހުން ބުނާނެ އިންޑިއާ މީހުނޭ ހުއްޓުވާލީ، އިންޑިއާ މީހުން އައި އިރު ހަނގުރާމަ ނިމިއްޖެ. އިންޑިއާމީހުން އެންމެ ބަޑިއެއްވެސް ނުޖަހާ ދިވެހި ރާއްޖެއަކު އެއް. އެމީހުންގެ މީހަކު މަރެއްވެސް ނުވޭ. އެންޖެރީ އެއްވެސް ނުވޭ. އެހެންވީމަ އޭގެން އެނގޭ އެއްޗަކީ މި ހަނގުރާމައިގަ އިންޑިއާއިން ބައިވެރިއެއް ނުވާކަން. މި ހަނގުރާމާގައި ބައިވެރިވީ ދިވެހި ސިފައިން ކަން."
– އުމަރު ނަސީރު
އެމްޑީޕީން ވެރިކަމަށް އަންނަ ކޮންމެ ފަހަރަކުވެސް ނޮވެމްބަރު ތިނެއްގެ ނަސްރު ފާހަގަކުރުން އެއީ ވަރަށް ނުކުރާ ކަމެއްކަމަށް އުމަރު ވިދާޅުވިއެވެ. އެގޮތުން 2008 ވަނަ އަހަރު ފެށުނު ރައީސް ނަޝީދުގެ ވެރިކަމުގައި އެއްގޮތަކަށްވެސް މިދުވަސް ފާހަގަ ނުކުރާ ކަމަށާއި، ނަމަވެސް މިހާރުގެ ވެރިކަމުގައި ކޮންމެ ވެސް ވަރަކަށް މި ދުވަސް ފާހަގަ ކުރާތަން ފެންނަ ކަމަށް އުމަރު ނަސީރު ވިދާޅުވިއެވެ.
"ދެން އެކަމަކު އަހަރެމެނަށް ފެނުނު ލުތުފީ ބަހައްޓައިގެން އޭނައަށް ޕްރޮޓެކްޝަން ދީގެން ލަންކާއެމްބަސީގައި ގެންގުޅެނިކޮށްވެސް. މި ސަރުކާރަކީ ނޮވެމްބަރު ތިނެއްގެ އުދުވާނީ ހަމަލާ ރާއްޖެއަށް ދިނުމުގައި ބައިވެރިވި އިސްމީހުންނާ ތިމާގެ ކަމާއި، އެކި ގޮތްގޮތުން ވިޔަފާރީގެ ގުޅުންތަކާއި އެކިއެކި ގުޅުންތައް ތިބިމީހުން. އެހެންވީމަ އަހަރެމެނަށް ފެންނަނީ ވަރަށް ބޮޑަށް ނޮވެމްބަރު 3 ފަސްއަޅާ ފޮރުވާލާފައި އޮއްވާ"
– އުމަރު ނަސީރު
އަދުގެ ޖީލުތަށް އެދުވަހުގެ ކަންކަން ހިނގާފާއި ވާ ގޮތާއި އެދުވަހުގެ ހަގީގީ ބާޢީންނާއި، އެދުވަހުގެ ހަގީގީ ބަތަލުން ރަނގަޅަށް އަންގައި ދޭން ޖެހޭކަމަށަށް އުމަރު ވިދާޅުވިއެވެ. އަދި ގައުމެއްގެ މިނިވަން ކަމާކީ ކޮބައި ކަމާއި، އެ މިނިވަންކަން ދިފާއުކުރުމުގެ މުހިންމުކަން އަދުގެ ޖީލަށް އަންގައިދިނުމުގެ މުހިންމުކަންވެސް އުމަރު ފާހަގަކުރެއްވިއެވެ.
1988ވަނަ އަހަރުގެ ނޮވެމްބަރު 3ވަނަ ދުވަހު ގެ ހަމަލާއަށް ފިލުމަށް ސިފައިންގެ އިސް ބޭފުޅުންނާއި އޭރުގެ ރައީސުލްޖުމްހޫރިއްޔާ އާއި ދިފާއީ ވުޒާރާގެ އިސްވެރިން މަސައްކަތް ކުރެއްވިކަމަށް އެމްޑީޕީގެ ބައެއް އިސް ފަރާތްތަކުން ފާޅުގައި ގެންދަނީ ވިދާޅުވަމުންނެވެ. އެބޭފުޅުން ވިދާޅުވާގޮތުން ނަމަ ރާއްޖެ އެދުވަހު ސަލާމަތްކޮށްދިނީ އިންޑިއާގެ އަސްކަރިއްޔާއިންނެވެ.
މި ފަހުގެ ތާރީހެއްގައި ރާއްޖެ ދުށް އެންމެ ނާމާން ބިރުވެރި ދުވަހަކީ ނަސްރުގެ ދުވަހުގެ ގޮތުގައި ދިވެހިން ފާހަގަ ކުރާ 1988 ނޮވެމްބަރު 3 ވަނަދުވަހެވެ. ރާއްޖޭގައި އޭރު އޮތް ވެރިކަން ބަދަލުކުރުމަށް އަމިއްލަ އެދުމުން ފޯވެފައިވާ ދިވެހިންތަކެއް އަޑީގައި ތިބެގެން ދިވެހީންގެ ގައުމަށް ގައްދާރުވެ، ލަންކާގެ ކުލީ ސިފައިންގެ ބަޔަކު ގޮވައިގެން އެ ޚާއިނުން މާލެ އަރާ 19 ދިވެހިން ޝަހީދުކޮށްލި ދުވަސް ދިވެހިންގެ ހިތްތަކާއި ތާރީހުން ފުހެލަން ދަތިވާނެއެވެ.
