ދިވެހިޖުމްހޫރިއްޔާއަށް މިހާތަނަށް އަންނާނެ އެންމެ ސާފުތާހިރު ފަސްއަހަރު ކަމުގައި، މިފަސްއަހަރު ވެގެންދާނެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ޖުމްހޫރީ ދުވަހުގެ މުނާޞަބަތުގައި ޤައުމާއި މުޚާޠަބުކުރައްވާ ވާހަކަފުޅު ދައްކަވަމުން ރައީސް ވިދާޅުވީ، ވޭތުވި 3 އަހަރަށް ފެށުމުގެ ކުރިން އެމަނިކުފާނު ދެންނެވި ވާހަކައެއް މިއަދުވެސް ހަނދާނުގައި ހުންނެވިކަމަށެވެ. އެއީ، ތަރައްގީގެ ވާހަކަ ދައްކަން ފެށޭނީވެސް ގައިން ތާހިރުވެ ތިބެގެންކަންކަމަށާއި، ދިވެހިޖުމްހޫރިއްޔަތުގެ ތެރޭން، ފާއިތުމިކުރި 3 އަހަރުގެ މައިގަނޑު އެއް އަމާޒަކީ، ހުރިހާ ރަށެއްގައި ސާފު ފެނާ، ނަރުދަމާގެ މަސައްކަތް ހިންގުންކަމަށް ރައީސް ވިދާޅުވިއެވެ. އެމަނިކުފާނު ވިދާޅުވީ ކުރިއަށް އޮތް ދެއަހަރާއެކު، ދިވެހިޖުމްހޫރިއްޔާއަށް މިހާތަނަށް އަންނާނެ އެންމެ ސާފުތާހިރު ފަސްއަހަރު ކަމުގައި، މިފަސްއަހަރު ވެގެންދާނެކަށެވެ.

ރައްޔިތުންގެ ހެލިފެލިވުމާ ގުޅިފައިވަނީ، އިގްތިޞޯދީ ޙަރަކާތް. އިގްތިޞޯދީ ހަރަކާތް ގުޅެނީ، ފުދުންތެރި މުޖުތަމައަކަށް. ފުދުންތެރި މުޖުތަމައަކުން އުފެދެނީ، އަރަފޯދިގެންވާ ޖުމްހޫރިއްޔަތެއްގެ ވެރި މުސްތަގިއްލު ގައުމެއް. ދިވެހިރާއްޖެ އައިގެން އަޅުގަނޑުމެން މިދަނީ އެމިސްރާބުގައި. ދިވެހިރާއްޖެ އޮތްދިގަށް، ސަރާސަރު ރާސްތާއެއްގައި، ވައިގެ މަގުން ގުޅާލެވޭނެ. ކަނޑުދަތުރުގެ ވިހިތިރީސް މިނެޓްގެ ދަތުރަކަށްފަހު، ކޮންމެ ރަށެއްގައި ހުރި ކޮންމެ ރައްޔިތަކަށްވެސް އުދުއްސައިގަނެވޭނެ. ވައިގެ އެވިއުގަ އެދަނީ އެމުނެމުން، ގެތި ތަރުތީބު ވަމުން.

– ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް

ރައީސް ވިދާޅުވީ، ކުރިއަށް އޮތް 2 އަހަރުގެ ތެރޭގައި، ސަރުކާރުގެ މައިގަނޑު ފޯކަސް ސީދާ ކުރައްވާނީ މިފަސްއަހަރަށްވީ ވަޢުދުތަށް ފުއްދާ ނިންމުމަށެވެ. ރައީސް ވިދާޅުވީ، 2022 ވަނަ އަހަރުގެ ބަޖެޓް ހުށަހެޅީ އެމިސްރާބަށް ވާޞިލްވުމުގެ އަމާޒުގައިކަމަށެވެ.  ކޯވިޑް-19 އިން ގެއްލުނު ދިގުމުއްދަތަކީ ބަހަނާ އެއްގެ ގޮތުގައި ބެލެވެން ނެތްކަމަށްވެސް ރައީސް ވިދާޅުވިއެވެ.

ރައީސްގެ ވާހަކަފުޅުގައި އަންނަ އަހަރު، އިޖްތިމާޢީ ދާއިރާއަށް ޚާއްޞަ އިސްކަމެއް ބަޖެޓްގައި ދެވިފައިވާނެކަމަށް ވިދާޅުވިއެވެ. އެގޮތުން ސިއްޚީ ދާއިރާގެ ޚިދުމަތްތައް ފުޅާކުރުމަށް އިތުރު ޑޮކްޓަރުންނާ، ނަރުހުން، ހޯދުމަށް ބެޖޓުކުރެވިފައިވާކަން ރައީސް ފާހަގަކުރެއްވިއެވެ.

ނަފްސާނީ ބަލިތަކާމެދު ނަފްސުތަށް ހޭލެވެން ފެށިއިރު އޭގެ ފަރުވާ ހޯދުންވެފައި އޮތީ ވަރަށް ބޮޑު ދަތިކަމަކަށް. އައިޖީއެމްއެޗްއިން އެޕޮއިންޓްމެންޓެއް ހަދައިގެން ޑޮކްޓަރަށް ދެއްކުމަށް ކުރަން ޖެހޭ އިންތިޒާރު ދިގު. މި މުއްދަތު ކުރުކޮށް، ރައްޔިތުންނާ ގާތުން މިހިދުމަތް ވެސް ފޯރުކޮށްދިނުމަށް ކުރަންޖެހޭ މަސައްކަތް ދަނީ ކުރެވެމުން. މާލޭގެ އިތުރުން، އަތޮޅުތެރޭގައި ރީޖަނަލް މެންޓަލް ހެލްތު ޕްރޮގްރާމް އަންނަ އަހަރު ފެށޭނެ. ޓާޝަރީ ހޮސްޕިޓަލްތަކުގައި މެންޓަލް ހެލްތް ޔުނިޓްތައް ތަރައްޤީކުރެވޭނެ.

– ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް

ރައީސްގެ ވާހަކަފުޅުގައި އަންހެނުންނާ ކުޑަކުދިންނަށް ކުރާ ގޯނާއާއި، އަނިޔާގެ މައްސަލަ މީގެކުރިން ވަޅުލެވި ހިނދިގެން ދާދިއުމަށް މިހާރު ހުއްޓުން އަރަން ފަށައިފިކަމަށް ވިދާލުވިއެވެ. އެގޮތުން ހޭލުންތެރިކަން އިތުރުވެ މައްސަލަތަށް ފެންމަތިކޮށް ރިޕޯރޓް ކުރުމުގެ ހިތްވަރާ އާދަ ދަނީ އަށަގަންނަމުންކަމަށްވެސް ރައީސް ވިދާޅުވިއެވެ. ކުރިއަށްއޮތް ތަނުގައި މިފަދަ އިޖުތިމާޢީ ބަލިމަޑުކަމުން އަރައިގަތުމަށް ބޭނުންވާ ވަސީލަތްތަކާއި، ޤާބިލްކަން އިތުރުކުރުމަށް ސަރުކާރުން ޚާއްސަ އިސްކަމެއްދެއްވާނެކަމަށްވެސް ރައީސް ވިދާޅުވިއެވެ.

ސަރުކާރުގެ އިދާރާތަކުން ރައްޔިތުންނަށް ދޭ ޚިދުމަތް މާބޮޑަށްވެސް އަވަސްކުރަން އެބަޖެހޭ. އަންނަ އަހަރު ސަރުކާރުން އިސްކަންދޭނެ އަނެއް ކަމަކީ އެއީ. ޚިދުމަތްތައް، އެކުވެނި، އެއް ފުރާޅެއްގެ ދަށުން، ފޯރުކޮށްދިނުމަށް އަންނަ އަހަރު މަސައްކަތް ފެށޭނެ. ޚިދުމަތްތައް ޑިޖިޓަލައިޒްކުރުމަށް އަންނަ އަހަރަށް ވަރަށްބޮޑު އިސްކަމެއްދީގެން ބަޖެޓްކުރެވިފައިވާނެ.

– ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް

ރައީސް ވިދާޅުވީ، މާލެ ސަރަހައްދުގެ ބޯހިޔާވަހިކަމަށް އޮތް ތާށި ފިލުވުމަށް ކުރަންޖެހޭ ކަންކަން ގިނަކަމަށެވެ. އެގޮތުން ގްރޭޓަރމާލެ ސަރަހައްދުގައި މިހާރު އެޅުމަށް މަސައްކަތް ކުރެވެމުންދާ ހައުސިން ޔުނިޓްތަކަކީ މުޅިން ހައްލެއް ނޫންކަމަށާއި، ބިން އުފެއްދުމާ، އުފެދިފައި ހުރިބިންތަށް ގުޅުވާލުން މުހިންމުކަމަށް އެމަނިކުފާނު ވިދާޅުވިއެވެ.

އަތޮޅުތެރޭގެ ބޯހިޔާވަހިކަމަށް 1.5 ބިލިއަން ރުފިޔާ ކުރިއަށް އޮތްތަނުގައި ހޭދަކުރުމަށް ސަރުކާރުން ނިންމާފައިވާކަންވެސް ރައީސް ވަނީ އިއުލާންކުރައްވާފައެވެ.

މަސްތުވާތަކެތި އެތެރެވާ ދޮރުތައް ބަންދުކުރުމަށް މިދިޔަ 3 އަހަރު ކުރެވުނު ގިނަ މަސައްކަތްތަކުގެ ނަތީޖާ ރަނގަޅުކަން ރައީސް ފާހަގަކުރެއްވިއެވެ. އަތުލައިގަނެވޭ މަސްތުވާ ތަކެތީގެ އަދަދު އިންތިހާއަށް މަތިކަމަށާއި، ނަމަވެސް، މަސްތުވާތަކެތީގައި ޖެހި މުޖުތަމައުން އެކަހެރިވެފައިވާ ފަރާތްތައް އަނބުރާ މުޖުތަމައަށް ގެންނަން ޖެހޭކަމަށް ރައީސް ވިދާޅުވިއެވެ. މަސްތުވާ ތަކެތިން މުޖުތަމަޢު ސަލާމަތްކުރުމަކީ މުހިންމު، އަދި ބުރަ މަސައްކަތެއްކަން ފާހަގަކުރައްވާ ރައީސް ވިދާޅުވީ، މުޖުތަމަޢާ ގުޅިގެން މިހާރަށްވުރެ ފުޅާދާއިރާއެއްގައި، ގާތުން ފަރުވާ ދިނުމަކީ މިކަމުގައި ސަރުކާރުން އިސްކަމެއްދޭ ސިޔާސަތެއްކަމަށެވެ.  ކޮމިއުނިޓީ ބޭސްޑް ޑްރަގް ރިހެބިލިޓޭޝަން ޕްރޮގްރާމް ހިންގުމަށް މިހާރު އެވަނީ ބަޖެޓް ކުރެވިފައިވާކަމަށާއި، ޒުވާނުންނަށް ރީހެބިލިޓޭޝަން އާއި، ކުޅިވަރާ، ވަޒީފާ އާއި، ހުނަރު ލިއްބައިދިނުން ވަރަށް މުހިންމުކަމަށްވެސް ރައީސް ވިދާޅުވިއެވެ. ކުރިއަށް އޮތްތަނުގައި ޒުވާނުންނާ، މަސްތުވާ ތަކެތީގެ މައްސަލަތަކަށް ސަރުކާރުގެ ނަޒަރު އިހުނަށްވުރެ ސީދާ ކުރެވޭނެކަމަށްވެސް ރައީސް ވަނީ މިރޭ ވިދާޅުވެފައެވެ.