ވެރިކަން ކުރާ ކޯލިޝަންގައި ހިމެނޭ އަދާލަތު ޕާޓީއަކީ ވެރިކަމުގެ ނިޒާމު ބަދަލު ކުރަން ވާހަކަ ދެއްކޭ ސައިޒުގެ ޕާޓީއެއް ނޫންކަމުގައި އަލްހާން ފަހުމީ ވިދާޅުވެއްޖެއެވެ.
ރާއްޖޭގައި ވެރިކަން ހިންގުމުގެ ނިޒާމު ބަރުލަމާނީ އަށް ބަދަލުކުރުމުގެ މަޝްވަރާ އަށް އަދާލަތު ޕާޓީން ތައްޔާރު ކަމަށާއި ނަމަވެސް މި ވަގުތު އެ ޕާޓީގެ އަމާޒު ހުރީ މިހާރު އޮތް ރިޔާސީ ނިޒާމުގެ ތެރެއިން ވީހާ ވެސް ގިނަ ހިދުމަތްތަކެއް ދިނުމަށް ކަމަށް އެ ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ ވަނީ ވިދާޅުވެފައެވެ. އިމްރާންގެ ވާހައަށް ރައީސް ނަޝީދު ވަނީ ތާއީދު ކުރައްވައި، ނިޒާމު ބަދަލު ކުރުމަށް ހުރިހާ ޕާޓީއަކުންވެސް މަޝްވަރާއަށް ތައްޔާރަށް ތިއްބެވިކަމަށް ވިދާޅުވެފައެވެ.
އިމްރާންގެ ވާހަކަތަކާއި ގުޅިގެން އަލްހާން ވިދާޅުވީ ދިވެހި ރައްޔިތުން ރާއްޖޭގައި އޮތް ވެރިކަމުގެ ނިޒާމު ބަދަލު ކުރުމަށް ނޫޅޭކަމަށެވެ. މިމަސައްކަތަކީ ދުވަހަކުވެސް ރައްޔިތުންގެ ވޯޓަކުން ނަޝީދަށް ވެރިކަމަށް ނާދެވޭނެކަން ޔަގީންވުމުން، މަޖިލިސް ތެރެއިން ނިޒާމު ބަދަލު ކުރުމަށް ކުރެވޭ މަސައްކަތެއް ކަމަށެވެ. އެއްގޮތަކަށްވެސް މިއީ ޤައުމަށް ހެޔޮ އެދިގެން ކުރެވޭ ކަމެއް ނޫންކަމަށް އަލްހާން ވިދާޅުވިއެވެ.
ދިވެހި ރައްޔިތުންނެއް ނޫޅޭ ބަރުލަމާނީ ނުވެގެންނެއް! ތިޔަ ކަމަކީ ދުވަހަކުވެސް ވޯޓަކުން ދެން މުހައްމަދު ނަޝީދަށް ވެރިކަން ނުލިބޭނެކަމަށް އޭނާ އަށް ޤަބޫކު ކުރެއްވިގެން، މަޖްލިސް މެޖޯރިޓީ އޮތް ވަގުތު އަވަހަށް ވެރިކަން ދަމައިގަންނަން ރާވާ ހީލަތެއް! އަދާލަތަކީ ވެރިކަމުގެ ނިޒާމު ބަދަލުކުރަން ވާހަކަ ދެއްކޭ ސައިޒުގެ ޕާޓީ އެއް ނޫން!
– އަލްހާން ވިދާޅުވިއެވެ.
ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލުކުރުމަށް ނަޝީދު އިސްވެ ހުންނަވައިގެން ކުރައްވާ މަސައްކަތްތައް ކުރައްވަމުން ގެންދަވަނީ ރައީސް ސާލިހުގެ މަޝްވަރާގެ މަތިންކަމަށް ނަޝީދު ވިދާޅުވި ނަމަވެސް މީގެ ކުރިން ރައީސް ސާލިހު ވިދާޅުވެފައިވަނީ، ބަރުލަމާނީ ނިޒާމެއް ގައުމާމެެދު ވިސްނެވުމަށްވުރެ އެމަނިކުފާނު އިސްކަން ދެއްވަނީ ވެރިކަމަށް ވަޑައިގަތުމަށް ވެވަޑައިގެންނެވި ވައުދުތައް ފުއްދެވުމަށް ކަމަށެވެ. އަދި ރައީސް ސާލިހު ވިދާޅުވެފައިވަނި، ބަރުލަމާނީ ނިޒާމަމަށް އަލުން ދިޔަޔަސް ދެވެން އޮންނާނީ ރައްޔިތުންގެ އާންމު ފެންނަ ނުފެންނަ ވޯޓަކުން އެގޮތައް ނިންމައި ހާލަތެއްގައި އެކަނި ކަމަށެވެ.
އަދި ރައީސް ނަޝީދުގެ ބަރުލަމާނީ މަސައްކަތްތަކާ ގުޅޭގޮތު މީގެ ކުރިން ރައީސް އޮފީހުގެ ތަރުޖަމާން ވިދާޅުވެފައިވަނީ، ރައީސް ސާލިހު ދެކެވަޑައިގަންނަވާ ގޮތުގައި ވެރިކަމަށް ވަޑައޮގެންނެވުމަށް އެކުލަވާލެއްވި މެނިފެސްޓޯގައި ނިޒާމު ބަދަލުކުރާ ވާހަކަ ނެތްކަމަށާއި، އެހެންކަމުން، އެއީ މިސަރުކާރުގެ ސިޔާސަތު ނޫންކަމުގައެވެ.
ރާއްޖޭގައި މިހާރު މިއޮތް ވެރިކަމުގެ ނިޒާމު ބަދަލުކުރެވޭނީ އާންމު ރައްޔިތުންގެ ވޯޓަކުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ ވިދާޅުވެފައެވެ. 2008 ވަނަ އަހަރު ދިވެހިން ބަލައިގަތް ފެހި ޤާނޫނު އަސާސީއަށް އަމަލުކުރަން ފެށުމުގެ ކުރިން ރާއްޖޭގައި އޮންނަން ބޭނުންވާ ވެރިކަމުގެ ނިޒާމު ކަނޑައެޅުމަށް ނެގި ރައްޔިތުންގެ ފެންނަ ނުފެންނަ ވޯޓުގައި 95،619 މީހުން ވޯޓުދީފައިވަނީ ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށެވެ.
ބަރުލަމާނީ ނިޒާމު އޮންނަން ފެންނަކަމަށް ވޯޓުދީފައިވަނީ 58،504 މީހުންނެވެ. މި ވޯޓުގައި 199،841 މީހުން ވޯޓުލުމަށް ރަޖިސްޓްރީކުރިއިރު، ވެރިކަމުގެ ނިޒާމު ކަނޑައެޅުމަށް ވޯޓުދީފައިވަނީ 155،890 މީހުންނެވެ.
