ލަންކާގައި މިއަދު ފެށި މަހިންދަ ރާޖަޕަކްސަ ފޯ ނޭޝަންސް ފުޓްބޯޅަ މުބާރާތުގެ ފުރަތަމަ މެޗުގައި ރާއްޖެއިން 4 ލަނޑު ޖަހާފައިވަނިކޮށް، ދެވަނަ ހާފްގައި ފަހަތުން އަރައި 4 ލަނޑު ޖަހައި ލަންކާއިން ރާއްޖެ ހިފަހައްޓައިފިއެވެ.
ކޮލަމްބޯ ރޭސްކޯސް ސްޓޭޑިއަމްގައި ކުޅުނު މި މެޗުގައި ރާއްޖެއިން ލަނޑު ޖަހާ ލީޑު ނެގީ މެޗުގެ 8 ވަނަ މިނެޓުގައެވެ. ރާއްޖެއަށް ލިބުނު ކޯނަރަކުން ޢަލީ އަޝްފާގުގެ އެހީތެރިކަމާއެކު މި ލަނޑު ކާމިޔާބުކޮށްދިނީ ކެޕްޓަން އަކްރަމް ޢަބްދުލްޣަނީއެވެ. އަކްރަމް ފުރަތަމަ ލަނޑު ޖެހިތާ މިނެޓެއް ފަހުން ޢަލީ ފާސިރު ވަނީ ރާއްޖެއަށް އިތުރު ލަނޑެއް ކާމިޔާބުކޮށްދީ ލީޑު ފުޅާކޮށްފައެވެ. މި މެޗުގައި ރާއްޖެއިން ޖެހި 3 ވަނަ ލަނޑު 34 ވަނަ މިނެޓުގައި ކާމިޔާބުކޮށްދިނީ އިބްރާހިމް މަހުދީ ޙުސައިންއެވެ.
މި މެޗަށް ރާއްޖެއިން ނެރުނު ފުރަތަމަ 11 އިން 2 ބަދަލެއް ވަނީ ފާހަގަކުރެވިފައެވެ. އެއީ ރާއްޖޭގެ ގޯލް ބެލެހެއްޓުމަށް ޒުވާން ކީޕަރ ޢަލީ ނާޖިހަށް ފުރުސަތު ދިނުމެއެވެ. އަދި އަނިޔާއިން މުޅިން ރިކަވާ ނުވާތީ ހަމްޒާގެ ބަދަލުގައި އުމައިރު ވަނީ މިއަދުގެ މެޗުގެ ފުރަތަމަ 11 ގައި ހިމަނާފައެވެ.
މި މެޗުގެ ދެވަނަ ހާފް ފަށައިގެން 57 ވަނަ މިނެޓުގައި ޢަލީ އަޝްފާގު ވަނީ ރާއްޖޭގެ 4 ވަނަ ލަނޑު ކާމިޔާބުކޮށްދީ، ބޮޑު ލީޑެއް ނަގާފައެވެ.
ރާއްޖެއިން 4 ލަނޑުގެ ލީޑެއް ނެގިފަހުން ލަންކާއިން ވަނީ ކުޅުން ރަނގަޅުކޮށް އެޓޭކްތައް ގިނަކޮށްފައެވެ. އެގޮތުން ލަންކާގެ ފުރަތަމަ ލަނޑު 64 ވަނަ މިނެޓުގައި އެޓީމަށް ކާމިޔާބުކޮށްދިނީ އަހުމަދު ވަސީމް ރަޒީކްއެވެ. ފުރަތަމަ ލަނޑު ޖެހިތާ 3 މިނެޓު ފަހުން ވަސީމް ވަނީ ދެވަނަ ލަނޑެއް ލަންކާއަށް ކާމިޔާބުކޮށްދީ ނަތީޖާގެ ފަރަގު ކުޑަކޮށްފައެވެ. ލަންކާއިން 2 ލަނޑު ޖަހާ މެޗުގެ ތެރެއަށް ރަނގަޅަށް ވަދެވިފައި އޮތް ވަގުތުގައި ވަސީމް ވަނީ އޭނާ ހެޓްރިކް ފުރިހަމަކޮށްފައެވެ. ހެޓްރިކް ފުރިހަމަކުރި ލަނޑު އޭނާ ޖެހީ 72 ވަނަ މިނެޓުގައެވެ. ލަންކާ އިން ނަތީޖާ ހަމަހަމަކުރީ އިތުރު ވަގުތުގެ ގޮތުގައި ދެއްކި ތިން މިނިޓްގެ ތެރޭގަ އެވެ. ކޯނަރެއްގައި ލަންކާ ކުޅުންތެރިއަކު ބޮލުން ޖައްސާލި ބޯޅައެއް ކޮންޓްރޯލް ކޮށްލުމަށް ފަހު ވަސީމް ވަނީ ގޯލުގެ ކަނަށް ބޯޅަ ފޮނުވާލައިފަ އެވެ.
ރާއްޖެ އާއި ލަންކާގެ އިތުރުން މުބާރާތުގައި ވާދަކުރަނީ ސީޝެލްސް އާއި ބަންގްލަދޭޝް އެވެ. މުބާރާތް ފެށުމަށް އެންމެ ފުރަތަމަ ތާވަލުކުރީ އިއްޔެ އެވެ. އެކަމަކު ލަންކާ އަށް ވިއްސާރަވުމުގެ ސަބަބުން މިއަދަށް މެޗުތައް ފަސްކުރީއެވެ.
ރާއްޖެ ކުޅޭ ދެ ވަނަ މެޗުގައި އަންނަ ބުރާސްފަތި ދުވަހު ނުކުންނާނީ ބަންގްލަދޭޝްއާ ދެކޮޅަށެވެ. ފައިނަލް މެޗު އޮންނާނީ މި މަހުގެ 19 ވަނަ ދުވަހުއެވެ.
