ވެލާނާ އިންޓަނޭޝަނަލް އެއާޕޯޓްގެ ވީއައިޕީ ލައުންޖު ބޭނުން ކުރެއްވުމަށް ރައްޔިތުންގެ މަޖިލީހުގެ މެމްބަރުންނަށް މިދިޔަ ތިން އަހަރުގެ ތެރޭގައި 3.6 މިލިއަން ރުފިޔާ ދައުލަތުގެ ބަޖެޓުން ހޭދަކޮށްފިއެވެ.
އަމިއްލަ ފަރާތެއް ކަމުގައިވާ އައިމަން ލަތީފަށް މަޖިލީހުގެ އިދާރާ އިން އެ މައުލޫމާތު ހިއްސާކުރީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން މަޖިލީހުގެ މެންބަރުން މިދިޔަ ތިން އަހަރު ވީއައިއޭގެ ވީއައިޕީ ލައުންޖު ބޭނުންކުރި ގޮތުގެ މައުލޫމާތު ހޯދުމަށް މަޖިލީހުގެ އިދާރާ އަށް ހުށަހެޅުމުންނެވެ.
މަޖިލީހުގެ އިދާރާ އިން ދިން މައުލޫމާތުތަކަށް ބަލާއިރު، މަޖިލީހުގައި މިހާރު ތިއްބެވި މެންބަރުންނަށް 2018 ގައި 121،080 ޑޮލަރު (1،870،686ރ.) ހަރަދުކޮށްފައި ވެ އެވެ. އަދި 2019 ގައި 89،100 ޑޮލަރު (1،376،595ރ.) 2020 ގައި 28،740 ޑޮލަރު (444،033ރ.) މެމްބަރުންނަށް ހޭދަކުރި ކަމަށް މަޖިލީހުގެ އިދާރާ އިން ބުނެ އެވެ.
ސަރުކާރުން އެކި ބޭނުންތަކަށް ހޭދަކުރާ ފައިސާގެ އަދަދުތަކާއި އެހެނިހެން މައުލޫމާތުތައް ގާނޫނުގެ ތެރެއިން މީގެ ކުރިން ވެސް ހޯދާފައިވާ އައިމަން ލަތީފުގެ ސުވާލުތަކާ ގުޅިގެން މަޖިލީހުގެ އިދާރާ އިން ބުނީ، މަޖިލީހުގެ މެންބަރުކަން ކުރިން ކުރައްވާފައިވާ ބޭފުޅުން ވީއައިޕީ ލައުންޖު ބޭނުންކުރެއްވުމަށް މަޖިލީހުގެ އިދާރާ އިން އެއްވެސް ހަރަދެއް ނުކުރާ ކަމަށެވެ.
މަޖިލީހުގެ މެންބަރުން މިދިޔަ ތިން އަހަރު ވީއައިއޭގެ ވީއައިޕީ ލައުންޖު ބޭނުންކުރި ގޮތް ހާމަކޮށްފައި މިވަނީ ނިމިގެން ދިޔަ 18 ވަނަ ރައްޔިތުންގެ މަޖިލީހާއި މިހާރު ހިނގަމުންދާ 19 ވަނަ މަޖިލީހުގެ މެމްބަރުންގެ ތެރެއިން އެންމެ ގިނައިން ވީއައިޕީ ލައުންޖުގެ ހިދުމަތް ހޯދި މެމްބަރުންގެ މައުލޫމާތު ހޯދަން މަޖިލީހުގެ އާންމު ކޮމިޓީން ވެސް ހޯދާފައި ވަނިކޮށެވެ.
މެންބަރުންގެ އާއިލާގެ އިތުރުން މެންބަރުން އިހުތިޔާރުކުރާ ދެ ރަހުމަތްތެރިޔަކަށް ވެސް ވީއައިޕީ ބޭނުންކުރެވޭ ގޮތް ހެދުމަށް ވެސް އާންމު ކޮމިޓީގެ ސިއްރު ބައްދަލުވުމެއްގައި ވަނީ ނިންމާފަ އެވެ. އެކަމަކު މަޖިލީހުގެ ނައިބް ރައީސް އީވާ އަބްދުﷲ ވަނީ ކޮމިޓީގެ ނިންމުން ތަންފީޒު ކުރަން ދެކޮޅު ހައްދަވާފައެވެ.
