ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު މާދަމާ ސްރީލަންކާއަށް ވަޑައިގަތުމަށް ހަމަޖެހިއްޖެއެވެ.
ރައީސް އޮފީހުގެ ތަރުޖަމާން މުޙައްމަދު މަބްރޫކް އަޒީޒް ވިދާޅުވީ ސްރީލަންކާގެ ރައީސް ގޮތަބަޔާ ރާޖަޕަކްސަގެ ދަޢުވަތަކަށް މާދަމާ ރައީސް ޞާލިޙް މާދަމާ ސްރީލަންކާއަށް ވަޑައިގަންނަވާނެކަމަށެވެ. މަބްރޫކް ވިދާޅުވީ ރައީސްގެ މި ދަތުރުފުޅަކީ، 4 ޤައުމު ހިމެނޭހެން މާދަމާ ސްރީލަންކާގައި ފަށާ "މަހިންދަ ރާޖަޕަކްސަ ޓްރޮފީ ކަޕް 2021″ ފެށުމަށް ބާއްވާ ރަސްމިއްޔާތު ޝަރަފްވެރިކޮށްދެއްވުމަށް އެޤައުމުގެ ރައީސް ގޮތަބަޔާ ރާޖަޕަކްސަ ދެއްވި ދަޢުވަތަކަށްކަމަށެވެ.
President @ibusolih will be traveling to Srilanka tomorrow, on invitation by President @GotabayaR as Chief Guest of the inaugural session of the Four Nations Football Tournament for the ‘Mahinda Rajapaksa Trophy 2021’
— Mabrook Azeez (@MvSpokesperson) November 7, 2021
ރައީސް މާދަމާ ލަންކާއަށް ވަޑައިގަންނަވާއިރު ސްކޮޓްލެންޑުގެ ގްލަސްގޯގައި ކުރިޔަށްދިޔަ 2021ގެ ޔުނައިޓެޑް ނޭޝަންސް ކްލައިމެޓް ޗޭންޖް ކޮންފަރެންސް އޮފް ދަ ޕާޓީސް (ކޮޕް 26) ސަމިޓުގައި ބައިވެރިވެވަޑައިގެންނެވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ކުރެއްވި ދަތުރުފުޅު ނިންމަވާލެއްވުމަށްފަހު ރާއްޖެ ވަޑައިގެންނެވީ މިމަހުގެ 4 ވަނަ ދުވަހުއެވެ.
މިމުބާރާތުގައި ވާދަކުރަނީ ސްރީލަންކާގެ އިތުރުން ދިވެހިރާއްޖެ، ބަންގްލަދޭޝް އަދި ސީޝެލްސްއެވެ. "މަހިންދަ ރާޖަޕަކްސަ ޓްރޮފީ ކަޕް 2021″ ފެށުމުގެ ރަސްމިއްޔާތު މާދަމާ ރައީސް ޞާލީހް ޝަރަފްވެރިކޮށްދެއްވާއިރު، މިމުބާރާތުގައި ރާއްޖެއިން ކުޅޭ ފުރަތަމަ މެޗް ކުޅޭނީ މާދަމާ ރޭ ސްރީ ލަންކާ އާއި ދެކޮޅަށެވެ.
