މީހާގެ ސިފައާއި ފިންގާ ޕްރިންޓުން އެމިހާގެ ހުރިހާ މަޢުލޫމާތެއް ހޯދޭގޮތަށް ޑޭޓާބޭހެއް ހެދުމަށް ސަރުކާރަށް ލަފާދިނުމަށް ރައްޔިތުންގެ މަޖިލީހުން ނިންމައިފިއެވެ.
އިންފޮމޭޝަން، ޓެކްނޯލޮޖީ، ސައިންސް އަދި ކޮމިއުނިކޭޝަންގެ ދާއިރާގައި ދިވެހިރާއްޖެ އޮތް ޙާލަތު ދެނެގަނެ، އެސެސްމެންޓެއް ހެދުމަށް ހުށަހަޅުއްވާފައިވާ މައްސަލައި މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީން ހެދި އެސެސްމަންޓަކަށް ފަހު މި މަހުގެ އެކެއްގައި އެކުލަވައިލި ރިޕޯޓްގައިވާ ގޮތުން އިންފޮމޭޝަން ޓެކްނޯލޮޖީގެ ދާއިރާއިން ގިނަ ކަންތައްތަކެއް ކުރުމަށް ވަނީ ނިންމާފައެވެ. އޭގެ ތެރޭގައި ޓެކްނޯލޮޖީއާ ގުޅޭގޮތުން ހުށަހަޅާ 9 ކަމަކާއި، ކޮމިއުނިކޭޝަންއާ ގުޅޭގޮތުން 6 ކަމެއް ހިމެނެއެވެ.
ޓެކްނޮލޮޖީ ދާއިރާގެ މުހިންމު ނިންމުންތައް:
* ސަރުކާރުގެ ވުޒާރާތަކާއި، މުއައްސަސާތަކާއި، އިދާރާތައް ހިންގުމަށް ބޭނުންވާ އެންމެހައި ސޮފްޓްވެއަރތައް ދިރާސާކޮށް، ފަރުމާކޮށް އަދި ބަލަހައްޓާ ތަރައްޤީކުރުމަށް މުޅި ނިޒާމު އެއް ވިއުގައަކުން ގުޅުވާލެވިފައިވާ ޑިޖިޓަލް އޭޖެންސީއެއް ޤާއިމުކުރުން.
* މީހާގެ ސިފައާއި، އިނގިލީގެ ނިޝާނުން އެމީހާގެ އައިޑެންޓިޓީ ވެރިފައިކުރެވޭ، އަދި މީހާގެ ޙާލަތު ބަދަލުވަމުން އަންނަގޮތް އެ މީހަކަށް އަޕްޑޭޓްކުރެވޭގޮތައް އޮންނަ، ޚިދުމަތް ހޯދާ ފަރާތްތަކަށް އަމާޒުކުރެވި، އޭނާގެ އައިޑެންޓިޓީއަށް ބަރޯސާވާ ސެންޓްރަލް ޑޭޓާ ބޭސް ނިޒާމެއް ޤާއިމުކުރެވިފައި އޮތުން.
* ފަރުމާކުރެވޭ ނިޒާމަކީ، މުޅި ދައުލަތުގެ ތެރޭގައިވެސް އެއް މަސައްކަތެއް ތަކުރާރުކޮށް އެކި މުއައްސަސާތަކުން ކުރަން ނުޖެހޭނެހެން ފަރުމާކުރެވިފައިވާ ނިޒާމަކަށްހެދުން.
ކޮމިއުނިކޭޝަން ދާއިރާގެ މުހިންމު ނިންުންތައް:
* ކުދި ވިޔަފާރިތަކަށް އުނދަގޫވާނެހެން، އެފަރާތްތަކުން ކުރާ މަސައްކަތަކުގެ ތެރެއަށް ބޮޑެތި ކުންފުނިތަކުންވަންނަމުންދާކަން ފާހަގަވެފައިވެފައިވާތީ، ވިޔަފާރީގެ ވާދަވެރިކަމަށް ހުރަސްއަޅާ ޢަމަލުތަކާއި ވިޔަފާރީގައި ހިންގޭބޭއިންޞާފު މުޢާމަލާތްތައް ހުއްޓުވައި މަނާކުރުން.
* ރައްޔިތުންނަށް އެންމެ ފައިދާހުރި ގޮތަށް، ވާދަވެރި މާހައުލެއްގައި ފްރެކުއެންސީތައް ދޫކޮށް މެނޭޖްކުރުން.
* .ކޮމިއުނިކޭޝަންސް އޮތޯރިޓީ އޮފް މޯލްޑިވްސް އިން އެކުލަވާލަންޖެހޭ، އެންމެހައި ގަވާއިދުތައް ފުރިހަމައަށް އެކުލަވައިލައި ނިންމުން.
ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީން މިހާތަނަށް ވަނީ ދައުލަތުގެ ގިނަ އިދާރާތަކެއްގެ ކަމާ ބެހޭ މުވައްޒަފުންނާ ބައްދަލުކޮށް މައުލޫމާތު އެއްކޮށްފައެވެ.އެކޮމިޓީން ފާހަގަކުރާގޮތުގައި ރާއްޖޭގައި އިންފޮމޭޝަން ޓެކްނޯލޮޖީ އާއި ސައިންސްގެ ދާއިރާއިން މަސައްކަތްކުރަމުން އަންނަނީ އެންމެ ފައިދާހުރި ގޮތަކަށްނޫނެވެ. އެހެންކަމުން އެދާއިރާއިން ގިނަ ކަންތައްތަކެއް އަދިވެސް ތަޢާރަފްކުރަންޖެހޭކަން ކޮމިޓީން ފާހަގަކުރެއެވެ.